"МАКТАБ ҲУДУДИНИ ЯШИЛ МАСКАНГА АЙЛАНТИРАМИЗ" ШИОРИ ОСТИДА КЎЧАТ ЭКИШ АКЦИЯСИ ЎТКАЗИЛДИ

Юртимизда эълон қилинган «Яшил макон» умуммиллий лойиҳаси асосида дарахт кўчатларини экиш бўйича «Долзарб 40 кунлик» доирасида Халқ таълими вазирлиги томонидан умумтаълим мактабларида «Мактабни яшил масканга айлантирамиз» акцияси эълон қилинди. Барча ҳудудлардаги мактабларда мазкур лойиҳага кўра оммавий равишда кўчат экиш тадбирлари бошлаб юборилди.

13 ноябрь куни акция доирасида тумандаги 36-сонли мактабда ҳам "Мактабни яшил масканга айлантирамиз" шиори остида тадбирлар ташкил этилди. Тадбирда мактаб директори Қаҳрамон Нуримбетов барча мактабларда “Ўзбекистон – яшил макон” мавзусида иншолар танлови, “Мактабни яшил масканга айлантирамиз” шиори остида оммавий дарахт экиш тадбирлари ўтказилаётгани, ушбу эзгу ишлар юртимиз табиатини, экологиясини яхшилаш мақсадида Президентимиз ташаббуси билан ташкил этилаётгани хусусида сўз юритди. Шунингдек, акция доирасида “Менинг дарахтим” мобил илова дастури ишлаб чиқилиб, 9-11-синф ўқувчилари ўртасида “Обод мактаб” мобиль илова дастурини яратиш бўйича танлов ўтказилиши, ўқув йили якунида “Энг обод мактаб” номинацияси бўйича ғолиб деб топилган 14 та мактаб электрон доска билан тақдирланиши белгилангани, Халқ таълими вазирлиги мазкур акцияда соҳа ходимлари, ўқувчилар, ота-оналар ва кенг жамоатчиликни фаол иштирок этишга чақирганлигини таъкидлаб ўтди.

Айтиш жоизки, Президентимиз Шавкат Мирзиёев томонидан илгари сурилган «Яшил макон» умуммиллий лойиҳаси юртимизда боғ-роғлар барпо этиш ва теварак-атроф мусаффолигини таъминлашда муҳим аҳамият касб этади. Шу боис лойиҳа доирасида йилига 200 млн. туп дарахт ва бута кўчатларини экиш режалаштирилган. Дарахтлар ҳаводаги зарарли карбонат ангидридни ютиб, ўрнига кислород ишлаб чиқаради ва бизнинг нафас олишимизга ёрдам беради. Улар иссиқда салқинлик беради, атроф-муҳитни шовқинлардан ҳимоя қилади.

Мактаб директори Қаҳрамон Нуримбетов барчага намуна бўлиб, кўчат экиш ишларини ўзи бошлаб берди. Шундан сўнг, ўқитувчилар ва ўқувчилар мактаб ҳовлисига мевали ва манзарали дарахтлар кўчатлари экишди. 

Мактабда «Ўзбекистон – яшил макон» мавзусида иншолар танлови ҳам бўлиб ўтди. Танловда мактабнинг юқори синф ўқувчилари иштирок этишди. Мактабнинг она тили ва адабиёт фани ўқитувчилари томонидан ташкил этилган ушбу танловда ўқувчилар иншоларида юртимиздаги табиат, экологик муаммолар, уларни бартараф этиш борасидаги фикрларини, мулоҳазаларини баён этишди. Танлов натижаларига кўра 11-“А”синф ўқувчиси Марямжон Ўрозматова 1-ўрин, 11-“В”синф ўқувчиси Лайло Отамуродова 2-ўрин, 11-“В”синф ўқувчиси Асал Бобожонова эса 3-ўрин ғолиби деб топилди. Ғолиблар мактаб маъмурияти томонидан фахрий ёрлиқлар билан тақдирланди.

Тадбир давомида мактаб ҳовлисига 75 туп олча, 40 туп олма, 4 туп арча, 16 туп манзарали дарахтлар кўчатлари ўтқазилди. Шунингдек, 6 нафар 1-синф ўқувчилари «Менинг биринчи ниҳолим» номи билан ўз устози билан биргаликда мактаб ҳовлисига биринчи ниҳолини экдилар. Ундан ташқари, 12 сотих ер майдони шудгор қилиниб, баҳорги экиш ишларига тайёрлаб қўйилди.

Мактабнинг ўқитувчи ва ўқувчилари яшил челленжга қўшилиб, хайрли ишга ўз ҳиссаларини қўшишди.

О. Худойберганова, 36-сонли мактабнинг маънавий-маданий масалалар бўйича тарғиботчиси.