Туманимизда “Яшил макон” умуммиллий лойиҳаси доирасидаги кўчат экиш ишлари тизимли давом эттирилмоқда

Мамлакатимизда давлатимиз раҳбари ташаббуси билан табиатни асраш ва экологик ҳолатни яхшилаш мақсадида  дарахт экиш давлат сиёсати даражасига кўтарилди. Президентимиз раислигида ўтказилган аҳолини уй-жой билан таъминлаш ҳамда яшил майдонларни кенгайтириш мақсадидаги йиғилишда дарахтзорларни кўпайтиришга алоҳида эътибор қаратилиб, шу мақсадда “Яшил макон” умуммиллий лойиҳасини амалга ошириш юзасидан тегишли чора-тадбирлар белгилаб берилди. Бу лойиҳа доирасида йилига 200 миллион туп дарахт ва бута кўчатларини экиш, шу орқали шаҳарлардаги яшил майдонларни ҳозирги 8 фоиздан 30 фоизга ошириш режалаштирилган бўлиб, жорий йилнинг 10 декабрга қадар дарахт экиш бўйича “долзарб 40 кунлик” эълон қилинди. Юртимизнинг ҳар бир ҳудудида ушбу лойиҳани амалга ошириш юзасидан амалий ишлар давом этмоқда.

Амударё туманида ҳам Президент ташаббуси билан илгари сурилган “Яшил макон” умуммиллий лойиҳаси ва лойиҳа доирасидаги “Долзарб 40 кунлик”да мевали ва манзарали дарахтлар кўчатларини экиш ишлари уюшқоқлик билан амалга оширилмоқда. Ушбу савобли ишда туман ҳокими Султонбой Йўлдашев бошчилигидаги барча мутасадди раҳбарлар, ҳар бир муассаса, корхона-ташкилотлар ходимлари ҳамда аҳоли вакиллари фаол иштирок этмоқдалар.

Ўзбекистон Экологик партияси туман кенгаши масъуллари ҳамда партия фаоллари Чойкўл овули ҳудудидаги фермер хўжаликлари экин майдонлари четларига мевали ва манзарали дарахтлар кўчатларини экиш ишларида фаол иштирок этдилар. Бугунги кунда ҳаётимизда экологик муаммолар тобора авж олаётганини, табиатни асраш ва экологик ҳолатни яхшилашда дарахт экишнинг аҳамиятини чуқур англаган ҳолда партия фаоллари ушбу савобли тадбирга ўзларининг муносиб ҳиссаларини қўшдилар.

Шу ўринда маълумот тариқасида айтиш жоизки, “Яшил макон” умуммиллий лойиҳаси доирасида Амударё туманида жами 1 млн 159 минг дона кузги ва баҳорги дарахтлар кўчатларини экиш режалаштирилган. Шундан 434600 донаси 2021 йил кузда экиладиган, 724400 донаси баҳорда экиладиган дарахтлар кўчатлари ҳисобланади. Дарахт кўчатларини экиш ишлари доирасида тумандаги 9,6 км йўлларда томчилатиб суғориш жорий этилиши ҳамда йўллар четларини кўкаламзорлаштириш мақсадида йўллар ёқаларига 2200 дона кўчатлар экиш режалаштирилган.

Шунингдек, тумандаги қишлоқ хўжалиги ерларида иҳота дарахтзорлар барпо этиш мақсадида, 98 та фермер хўжаликлари экин ер майдонлари четларига, ижтимоий соҳа обектлари ҳудудларига, корхона ва хизмат кўрсатиш обектлари ҳудудларига, туман Ободонлаштириш бошқармаси ҳудудларига, маҳаллалар ва кўчаларга дарахтлар кўчатларини экиш ишлари ҳамжиҳатлик билан олиб борилмоқда.

Қолаверса, тумандаги аҳоли хонадонларида 10 турдаги 316 минг 100 дона мевали дарахтлар кўчатлари, 30 минг дона узум кўчатларини экиш ишлари режалаштирилган бўлиб, аҳоли вакиллари ҳам хайрли ишда фаол иштирок этмоқдалар.

Айтиш керакки, туманимизда “Яшил макон” умуммиллий лойиҳасини амалга оширишда ҳамда мевали ва манзарали кўчатлар етказиб беришда Қипчоқ давлат ўрмон хўжалиги тизимли фаолият олиб бормоқда. Ўзбекистон Экологик партияси туман кенгаши масъуллари ўрмон хўжалигига бориб, хўжаликда етиштирилаётган кўчатларнинг ҳолати, турлари ҳамда хўжалик фаолияти билан яқиндан танишдилар.

Ҳозирда хўжаликда 1 млн 200 дан ортиқ турли кўчат ҳамда ниҳоллар етиштирилаётган бўлиб, уларнинг 200 мингдан ортиғи мевали ва манзарали дарахтлар кўчатларидир. Хўжалик масъуллари “Долзарб 40 кунлик”да дарахт кўчатларини ўз вақтида етказиб беришда машаққатли меҳнат қилиб, лойиҳани амалга оширишда ўзларининг муносиб ҳиссаларини қўшмоқдалар.

Туман ҳокимлигининг Ахборот хизмати.