СЕМИНАР-ТРЕНИНГ БЎЛИБ ЎТДИ

Кейинги йилларда мамлакатимизда аҳолининг, шу жумладан, ташкилотлар ва корхоналар хизматчиларининг ҳуқуқий саводхонлигини оширишга алоҳида эътибор берилмоқда. Шунингдек, соҳани янада такомиллаштиришга эришилмоқда.

Муҳтарам Президентимизнинг шу йил 29 июндаги “Давлат органлари ва ташкилотларига юридик хизмат кўрсатиш фаолиятини янада такомиллаштириш чора-тадбирлари тўғрисида”ги Қарори бу борадаги ишлар самарадорлигини оширишга хизмат қилмоқда.

Ушбу қарорга мувофиқ жорий йилнинг 1 октябридан бошлаб мамлакатимизнинг барча ҳудудий Адлия бошқармалари ва бўлимлари ҳузурида юридик хизмат кўрсатиш марказлари фаолияти йўлга қўйилиб, давлат ташкилотларига юридик хизмат кўрсатиш билан боғлиқ маълумот, жараёнларни электрон равишда йиғиш, қайта ишлаш, таҳлил қилиш имконини берувчи “Е - ҳуқуқшунос” электрон тизими жорий этилди.

Республикамизнинг барча ҳудудларидаги Адлия бошқармалари, бўлимлари ҳузуридаги юридик хизмат кўрсатиш марказлари ходимлари давлат ташкилотлари, идоралари ходимларига ушбу қарор мазмун-моҳиятини тушунтириб, “Е - ҳуқуқшунос” электрон тизими имкониятларидан қандай фойдаланиш муминлиги юзасидан билим ва кўникмаларини шакллантириш мақсадида турли тадбирлар – ўқув семинарлар, семинар-тренинглар ўтказишмоқда.

Айтиш жоизки, янги марказ фаолияти юридик хизмат кўрсатиладиган давлат органлари ва ташкилотлари фаолиятини ҳуқуқий жиҳатдан таъминлаб, уларга сифатли ва малакали юридик ёрдам кўрсатиши, давлат ташкилотлари ходимларининг ҳуқуқий саврдхонлиги  ва ҳуқуқий маданияти ошишига хизмат қилиши билан жуда аҳамиятлидир.

Амударё тумани ҳокимлиги биносида бўлиб ўтган тадбир ҳам шу масалага бағишланди. Туман Адлия бўлими ва юридик хизмат кўрсатиш маркази томонидан “Юридик хизмат кўрсатиладиган ташкилот ва идораларда “Е-ҳуқуқшунос” тизими орқали ишловчи ходимларнинг ҳуқуқий билимини ошириш ва кўникмаларини шакллантириш” юзасидан ўтказилган семинар-тренингни туман Адлия бўлими бошлиғи Мўъминжон Матюсупов очди ва “Е-ҳуқуқшунос” тизимининг афзалликлари хусусида гапирди. Туман Юридик хизмат кўрсатиш маркази бошлиғи Нилуфар Жуманиёзова “Е – ҳуқуқшунос” тизими ташкил этилганидан бери тизим орқали келиб тушган ҳужжатларнинг таҳлили бўйича маълумот берди ва мурожаат қилишда йўл қўйилган хато-камчиликларга тўхталди.

Семинар-тренингда бундай хатоларни бартараф этиш йўл-йўриқлари кўрсатилиб, таклифлар билдирилди.

Тадбирда иштирокчиларни қизиқтирган саволларга қонуний асослантирилган жавоблар берилди.

Семинар-тренинг барча иштирокчиларнинг ҳуқуқий билимларини оширишга хизмат қилди.

О.РАЖАБОВА.