“Ёшлар – янги Ўзбекистон бунёдкорлари” лойиҳаси доирасида давра суҳбати ўтказилди

“Жайхун илҳомлари” нодавлат нотижорат ташкилоти томонидан амалга оширилаётган “Ёшлар – янги Ўзбекистон бунёдкорлари” лойиҳаси доирасида ташкил қилинаётган учрашувларда маҳалла фаоллари, ёшлар, маънавият тарғиботчилари, турли касб эгалари қатнашиб, ёшларни янги Ўзбекистоннинг ҳақиқий бунёдкорлари бўлишга чақирмоқдалар. Бунинг учун аввало, маънавий-маърифий ишларни йўлга қўйиш лозимлиги уқтирилмоқда.

Ана шундай навбатдаги учрашув туман Халқ таълими бўлимига қарашли 56-сонли умумтаълим мактабида ўтказилди. Ёшлар маънавиятини юксалтириш, уларни китобхонликка жалб қилиш орқали гиёҳвандлик, ичкиликбозлик, турли ахлоқсизликлардан ҳимоя қилиш мақсадида ўтказилган бу давра суҳбатида туманимизда ижод қилаётган ёзувчи ва шоирлар, журналистлар. Маънавият тарғиботчилари,ёш ижодкорлар мактаб ўқувчилари билан учрашди.

Давра  суҳбати иштирокчилари олдида туманимизда фаолият олиб бораётган “Жайхун илҳомлари” нодавлат нотижорат ташкилоти раиси Ўрозали Рейимов ёшлар орасида маънавий-маърифий ишларни яхши йўлга қўйиш, ижодкор ёшларнинг имкониятларини янада ошириш, уларнинг ижодини оммага таништириш, шу орқали уларни ҳақиқий Ўзбекистон бунёдкорлари этиб тарбиялаш учун туманимиздаги кенг қулайликлар ҳақида тўхталиб ўтди. Ҳақиқатан ҳам ҳақиқий Ватанпарварларни тарбиялашда, элга фидоий инсонларнинг камол  топишида адабиёт ва санъатнинг ўрни бебаҳо. Бу ўринда ёш ижодкор шоир ва ёзувчиларнинг ижоди катта роль ўйнайди.

Туманимизда ҳозирги кунда “Тараққиёт кўзгуси” ва “Менинг оилам” газеталари мунтазам чоп этилиб, бу газеталарда ёш ижодкорларнинг ижод маҳсуллари мунтазам ёритиб борилмоқда. Интернетдаги сайтлар ва ижтимоий тармоқлар, Амударё телевидениеси орқали ёшлар тарбиясига оид кўрсатувлар, адабий учрашув-суҳбатлар бериб борилмоқда. “Тараққиёт кўзгуси” кўзгуси газетаси ёнидаги нашриётда туман ижодкорларининг китоблари чоп қилинмоқда. Бу имкониятларнинг барчаси ҳам туман ёшларининг маънавиятли, маърифатли бўлиб камолга етишига муҳим омил бўлади албатта.

Ёш шоира, тумандаги 35-сонли мактабнинг 10-синф ўқувчиси Барно Самандарова ҳозирги кунда иккита шеърлар тўпламининг муаллифи. Унинг дастлабки китоби “Илк парвозим”, иккинчи китоби эса “Меҳр” деб номланган. Давра суҳбатида сўзга чиққан Барно Самандарова ўз тенгқурларига ижоди, келажак орзулари ҳақида гапириб берди. Унинг бир вақтнинг ўзида мактабда аъло баҳоларга ўқиб, ижод билан шуғулланишга улгуриши, инглиз, турк тилларини ўрганаётганлиги, турли фанлар олимпиадаларида қатнашаётганлиги барчанинг ҳавасини келтирди. Сўзи сўнгида Барно Самандарова ўз китобларидан мактаб ўқувчиларига совға қилди.

Тажрибали журналист, меҳнат фахрийси Алламберган Жуманиёзов давра суҳбати иштирокчиларига ўзининг иш тажрибасидан гапириб берди. Мактаб ўқувчиларининг ҳар бир ижодий ишида яқиндан ёрдам беришда ўз кучи ва тажрибасини аямаслигини билдириб ўтди.

Мактаб ўқувчилари ўзларини қизиқтирган саволларга жавоблар олдилар. Давра суҳбатидан олган таассуротлар мактаб ўқувчиларининг келажакда аъло баҳоларга ўқиб чинакам Ватан фидойилари бўлиб етишига ишонч билдирдилар.

Ў.РЕЙИМОВ.