БОШЛАНҒИЧ ТАЪЛИМ ФАН ОЙЛИГИ ТААССУРОТЛАРГА БОЙ БЎЛДИ

Инсоннинг шахс сифатида шаклланишида илк қадам мактабдан, бошланғич таълим йўналишидаги билим асосларини пухта эгаллашдан бошланади. Бошланғич синфларда илм асосларини пухта эгаллашга киришган бола кейинчалик умумтаълим фанларини ўзлаштиришда асло қийналмайди. Айниқса, синфдан-синфга ўтиш сари ўзининг алоҳида қобилиятга эга эканлигини намоён этиб, қизиқишлари ортиб боради.
Шу сабаб, умумтаълим мактабларининг бошланғич синф ўқитувчиларининг юқори малакага эга бўлишлари талаб этилмоқда. Чунки қўлига илк қалам олган мурғак болажонларнинг ҳайрат ва ҳаяжонларга тўла қизиқиш ва орзуларини бир ўзанга солиб, аниқ мақсад сари йўналтиришда айнан бошланғич  синф ўқитувчисининг касбий малакаси, ўзига  хос тажрибаси ва услуби ўта муҳим аҳамиятга эга.
Шу жиҳатлардан олиб қараганда, туманимиздаги 47-сонли умумтаълим мактабида бошланғич синф ўқитувчиларини танлаш, уларга келажагимиз эгалари бўлган ёш авлоднинг илк таълими ва тарбиясини ишониб топширишда ана шу, юқоридаги каби талаблар эътиборга олинади. Шу боис мактабнинг бошланғич синфлар ўқитувчилари орасида “Ўрган-ўргат” тамойили асосида иш олиб борилади.
Бу ҳар йили сентябрь – бошланғич таълим фан ойлиги доирасида ўтказиладиган илмий-амалий ва назарий дарс-машғулотларида, турли хил заковат баҳслари, синфлараро, гуруҳлараро беллашувлар ҳамда турли хил саналар муносабати билан ўтказиладиган маданий-маърифий тадбирларда яққол намоён бўлади.
Бошланғич таълим фан ойлиги доирасида 3-а, 3-в синфларда ўтказилган математика кечасида ҳар иккала синф ўқувчилари гуруҳларга бўлиниб, қизиқарли математик ўйинлар ташкил этилди, ментал арифметика бўйича катта ва кичик ҳажмли сонларни ёддан қўшиш, айириш, бўлиш ва кўпайтириш амалларини бажаришди. Мисол ва масалалар ечиш бўйича ўзаро баҳслашишди.
Мазкур синфларда очиқ дарслар ташкил этилди. Очиқ дарсларни мактабнинг тажрибали мутахассис-ўқитувчилари кузатиб боришди. Очиқ дарсларда ўқувчиларнинг 1-,2-,3-синфларда эгаллаган билим ва кўникмалари синовдан ўтказилди. Уларнинг дарсларни ўзлаштириш даражаси, нутқий ривожланиши, мустақил фикрлаш қобилиятлари, эслаб қолиш, ўз фикрини дадил ифода этиш иқтидорлари ўрганилиб, баҳо берилди.
Ойлик доирасида 4-синф ўқувчилари иштирокида ўтказилган “Кимнинг хати чиройли?” мавзусидаги диктантлар танлови янада қизиқарли бўлди. Унда чиройли ва бехато хуснихат эгалари бўлган аълочи ўқувчилар рағбатлантирилиб, уларнинг диктантлари тенгдошларига намуна қилиб кўрсатилди.
Сентябрь ойи охирида бошланғич таълим фан ойлиги доирасида ўтказилган барча тадбирлар умумташтирилиб, фан ойлиги тадбирларида фаол иштирок этган синфлар раҳбарлари меҳнати ва ташкилотчилиги алоҳида эътироф этилди. “Математик ўйинлар”, заковат баҳслари, ментал арифметика машқлари ҳамда “Кимнинг хати чиройли?” диктантлар танловлари ғолиблари аниқланди.
Ғолиб ўқувчиларнинг алоҳида билим ва қобилиятлари эътироф этилиб, мактаб маъмурияти ҳамда фан ойлиги доирасидаги тадбирлар ташкилотчилари томонидан рағбатлантирилди ҳамда фаол ва аълочи ўқувчиларга эсдалик совғалари берилди.

Робия ЙЎЛДОШЕВА.