ТАЪЛИМ-ТАРБИЯДА УСТОЗ ВА МУРАББИЙЛАРНИНГ ҲИССАЛАРИ БЕҚИЁС

Бугунги кунда мамлакатимизда таълим-тарбия тизимининг сифати ва самарадорлигини ошириш, боғча тарбияланувчилари, ўқувчи ва талаба ёшларда замонавий билим ва кўникмаларни шакллантириш, таълим тизимлари ҳамда илм-фан соҳаси ўртасида яқин ҳамкорлик ва интеграцияни, таълимнинг узвийлиги ва узлюксизлигини таъминлаш борасида тизимли ишлар амалга оширилмоқда.

Шунингдек, таълим-тарбия ва илм-фан соҳаларини янада такомиллаштириш, жамиятимизда ўқитувчи ва педагог ходимлар, илмий ва ижодкор зиёлиларга бўлган ҳурмат-эътиборни янада ошириш, ўқувчиларнинг касбий маҳоратини ривожлантириш, тизимда хусусий сектор иштирокини кенгайтириш борасида самарали ишлар қилинмоқда.

Амударё тумани Халқ таълими бўлими бугунги кунда мамлакатимизда таълим-тарбия соҳаси ривожини янада жадаллаштириш юзасидан олиб борилаётган чора-тадбирлар ижросини таъминлаш борасида  самарали фаолият юритмоқда.

Ҳозирда туман Халқ таълими бўлимига қарашли жами 86 та таълим муассасаси мавжуд болиб, шундан 82 та умумтаълим мактаблари, 1 та бошланғич мактаб, 2 таси  ихтисослаштирилган мактаб, 1 та “Баркамол авлод” мактаби фаолият олиб бормоқда. Уларда жами 4206 нафар ўқитувчилар фарзандларимизга таълим-тарбия бериб келмоқда.

Ўқитувчиларнинг 68,4 фоизи аёл ўқитувчилар бўлиб, жами педагог ходимларнинг 123 нафари олий тоифали, 511 нафари биринчи тоифали, 1114 нафари иккинчи тоифали, 1873 нафари мутахассис ўқитувчилардан иборат.

Жорий йилда умумтаълим муассасаларининг моддий-техник базасини мустаҳкамлаш борасида самарали ишлар қилинмоқда. Инвестиция дастурига биноан 35-сонли мактабда 4 млрд. 667 млн. сўмлик капитал реконструкция ва мукаммал таъмирлаш ишлари, “Обод қишлоқ” ва “Обод маҳалла” дастурларига биноан 5 та мактабларда 9 млрд. 842 млн. сўмлик қурилиш-таъмирлаш ишлари, маҳаллий бюджет маблағлари ҳисобидан 28-сонли умумтаълим мактабида 609 млн. сўмлик жорий таъмирлаш ишлари амалга оширилди. Айни пайтда туманимизда фаолият юритаётган барча умумтаълим мактабларида замон талабларига мос равишда таълим бериш учун барча шароитлар етарли.

Туман Халқ таълими бўлими томонидан янги ўқув йилига тайёргарлик юзасидан самарали ишлар ташкил этилди. Янги 2021-2022 ўқув йили ҳамда куз-қиш мавсумига тайёргарлик ишлари бўйича 65 та таълим муассасаларига режадаги 1675 тонна кўмир маҳсулотлари тўлиқ етказиб берилди. Умумтаълим мактаблари янги ўқув йилига тайёр ҳолатга келтирилди.

2020-2021 ўқув йилида 30-сонли ва 40-сонли умумтаълим мактаблари Халқаро тадқиқотларга йўналтирилган таянч мактаб қилиб белгиланиб, ўқув йили бошида барча мактаблардан 2 нафардан тренер-ўқитувчилар тайёрланди. Халқаро тадқиқотларга йўналтирилган таянч мактабларнинг уларга бириктирилган мактаблар билан ишлаш механизми ишлаб чиқилди ҳамда семинар-тренинглар ташкил этилди.

Умумтаълим мактабларини 2020-2021-ўқув йилида жами 2978 нафар ўқувчи 11-синфни битирган бўлиб, 9 нафар битирувчиларимиз олтин, 8 нафар битирувчиларимиз кумуш медаль билан муваффақиятли тамомладилар. Соҳада ташкил этаётган самарали ишлар натижасида умумтаълим мактабларини тамомлаган ёшларимизнинг олий таълимда ўқишга қизиқишлари йилдан йилга ортиб бормоқда.

Жорий йилги битирувчи ўқувчилардан 2103 нафари олий таълим муассасаларига ҳужжат топширган бўлса, уларнинг 574 нафари кириш имтиҳонларида юқори натижаларни қўлга киритиб, олий таълимда ўқиш ҳамда талаба бўлиш бахтига муяссар бўлишди.

Бундай натижага эришишимизда, шубҳасиз, таълим масканларида машаққатли меҳнат қилаётган устоз ва мураббийларимизнинг ҳиссаси беқиёс. Шу фурсатдан фойдаланиб, машаққатли ва шарафли касб эгалари - устоз ва мураббийларни яқинлашиб келаётган 1 октябрь – касб байрамлари билан самимий муборакбод этамиз!

Акмал Исмаилов, туман Халқ таълими бўлими мудири.