УМУМТАЪЛИМ МАКТАБЛАРИГА “КИТОБЛАР КАРВОНИ” КИРИБ БОРДИ

Президентимиз Шавкат Мирзиёев ёшлар маънавиятини янада юксалтириш мақсадида илгари сурган 5 та муҳим ташаббуснинг бири ёшлар ўртасида  китобхонлик муҳитини яратиш, интеллектуал билимдон ёшларни шакллантиришда китобнинг аҳамиятини янада ошириш, уларни китоб ўқишга қизиқтириш ва шу орқали мустақил фикр-мулоҳаза юритувчи инсонлар бўлиб етишишларини таъминлашдан иборатдир.

Шу мақсадда сўнгги йилларда умумтаълим муассасалари ҳузуридаги кутубхоналар фаолиятини янада жонлантириш, ўқувчи-ёшлар ўртасида китобхонлик тадбирлари, кўрик-танловларини ташкил этиш орқали уларнинг интеллектуал салоҳиятини юксалтиришга алоҳида эътибор қаратилмоқда.

Туманимизда ҳам умумтаълим мактабларининг ўқувчи-ёшлари ўртасида турли мавзуларда китобхонлик кечалари, “Мен севган адиб”, “Менинг  севимли асарим”, “Энг ёқимли абадий асар қаҳрамони”, “Замонамиз қаҳрамонлари ҳақидаги энг язши асар” мавзуларида иншолар танловлари ўтказилиб, ғолиблар маънавий жиҳатдан рағбатлантириб борилмоқда. Шу баробарида умумтаълим мактаблари ҳузуридаги кутубхонаар, электрон кутубхоналар ҳар йили янги-янги адабиётлар билан бойитиб борилаётгани боис, китобсевар ёшлар сафи тобора ортмоқда.

Жорий  2021-2022 ўқув йилида ҳам ўқувчи-ёшларнинг китобга бўлган маънавий эҳтиёжини қондириш, ўзлари севган ёзувчиларнинг китобларини ҳеч муаммосиз мутолаа қилишларини таъминлаш мақсадида туман Халқ таълими бўлими томонидан “Китоблар карвони” тадбири ўтказилди. Умумтаълим мактабларидаги кутубхоналар китоб жамғармаларини  янада бойитишни кўзлаб амалга оширилган ушбу тадбир давомида ўқувчи-ёшлар жаҳон ва мумтоз ўзбек адабиёти намоёндалари, шунингдек ҳозирги замон ўзбек ҳамда қардош халқлар адабиётларининг таниқли вакиллари ижод намуналаридан баҳраманд бўлишди.

Тадбир жараёнида “Китоблар карвони” кириб бормаган биронта ҳам умумтаълим мактаби қолмади. Туман Халқ таълими бўлими мудири Акмал Исмоилов ҳамда Халқ таълими бўлимининг дарсликлар бўйича услубчиси Озод Қидирбоевлар иштирокида амалга оширилган тадбир жараёнида 3 минг 260 та бадиий ва илмий-маърифий китоблар 87 та умумтаълим мактаблари кутубхоналарига бепул тарқатилди.

Тадбирдан мамнун кутубхоналар аъзолари бўлган ўқувчи-ёшлар халқимизнинг севимли фарзанди, йирик давлат ва жамоат арбоби ҳамда жаҳонда таниқли ёзувчи Шароф Рашидов ҳаёти ва серқирра фаолияти, ижод йўли ҳақида ҳикоя қилувчи асарлар, шунингдек, қорақалпоқ болалар адабиёти дурдоналари билан яқиндан танишиш мақсадида китоблар танлаб олдилар.

Бугунги кунда  умумтаълим мактабларининг барчасида кутубхоналар китобсевар ёшлар билан ҳамиша гавжум бўлади. Айниқса, қорақалпоқ болалар адабиёти намуналари, шунингдек, ўзбек, рус, қозоқ адабиёти дурдоналарини севиб мутолаа қилинади.

Дарҳақиқат, китоб – билим булоғи, китоб – келажак шамчироғи. Ўз ҳаётини китоб билан дўст-у қадрдонликда ўтказувчи инсон, шубҳасиз, барча орзуларига етишади. Чунки, китоб орқали ёшликда эгалланган билим тошга ўйилган нақш каби асло ўчмасдир.

Рисолат ИБРАГИМОВА.