3 та фуқаролар йиғинларига мебель жамланмалари топширилди

Мамлакатимизда аҳоли муаммоларини аниқлаш ва ҳал этиш бўйича «маҳалла — сектор — Халқ қабулхонаси — маҳалла» тамойили асосида самарали ҳамкорлик тизимини жорий этилиб, маҳаллани халқ билан давлат ўртасида ишончли «кўприк» бўлишини амалда таъминлаш, оила ва хотин-қизларни қўллаб-қувватлаш борасида тизимли чора-тадбирлар амалга оширилмоқда.

9 август куни Амударё тумани Маҳалла ва оилани қўллаб-қувватлаш бўлими биносида Қорақалпоғистон Республикаси Маҳалла ва оилани қўллаб-қувватлаш вазири Сағиндиқ Турманов иштирокида тумандаги овул ва маҳаллалар фуқаролар йиғинлари моддий техник базасини яхшилаш борасида йиғилиш бўлиб ўтди. Йиғилишда туман ҳокими Султонбой Йўлдашев, туман Маҳалла ва оилани қўллаб-қувватлаш бўлими бошлиғи Алишер Йўлдашев, бўлим ходимлари ҳамда Қипчоқ овул, Чордар ва Намуна маҳалла фуқаролар йиғинлари масъуллари  қатнашдилар.

Тадбирда Қорақалпоғистон Республикаси Маҳалла ва оилани қўллаб-қувватлаш вазири Сағиндиқ Турманов Ўзбекистон Республикаси Президентининг “2020-2023 йилларда Қорақалпоғистон Республикасини комплекс ижтимоий- иқтисодий ривожлантириш чора-тадбирлари тўғрисида”ги қарорида белгиланган вазифалар хусусида тўхталиб, тумандаги Қипчоқ овул ҳамда Чордара ва Намуна маҳалла фуқаролар йиғинларининг моддий техник базасини яхшилаш мақсадида уларга мебель жамланмалари, яъни хар бир маҳаллага 1 та раҳбар столи, 2 та компьютер столи, 2 та шкаф ҳамда 8 та стул ва компьютер жамланмаларини топширди.

Амударё туманида жорий йилда тадбиркорлар томонидан давлат-хусусий шерикчилик асосида Бой овул ва Янгиобод маҳалла фуқаролар йиғини бинолари қурилиш ишлари олиб борилмоқда. Шунингдек, тумандаги Тош ёп, Тўлқин, Бобур овул фуқаролар йиғинлари биноларини мукаммал таъмирлаш ишлари бошлаб юборилган.

“Обод қишлоқ” дастури доирасида Хитой овул фуқаролар йиғини биносини мукаммал таъмирлаш учун жами 449 млн сўм маблағ ажратилиб, тўлиқ таъмирлаш ишлари якунланган. Шунингдек, Жумуртов шаҳарча, Уйшин маҳалла фуқаролар йиғинлари биноларини таъмирлаш ишлари олиб борилмоқда.

Қолаверса, тумандаги фуқаролар йиғинларининг самарали фаолият юритишлари учун барча қулайликлар, шароитлар яратилган. 49 та фуқаролар йиғинларида жами 162 та компьютер, 125 та принтер ва 15 та телефон аппарати билан таъминланган. 2021 йилнинг ўзида 24 та фуқаролар йиғинларига компьютер, 20 та фуқаролар йиғинларига принтер, 3 та фуқаролар йиғинларига кондиционер берилган. Ўз навбатида барча овул ва маҳалла фуқаролар йиғинлари яратилган шарт-шароитлардан унумли фойдаланган ҳолда самарали фаолият юритиб келмоқда.

Туман ҳокимлигининг Ахборот хизмати.