Спортчи қизларга спорт кийимлари топширилди
Бугунги кунда туманимиз ёшлари орасида жисмоний тарбия ва спорт билан шуғулланувчилар сони тобора ортиб бормоқда. Спортнинг деярли барча турлари ривожланиб, спортчиларимиз кўплаб мусобақаларда юқори натижаларни қўлга киритиб келмоқдалар. Нафақат ўғил болалар, балки қизларимизнинг ҳам спорт ва унинг турларига бўлган қизиқишлари юқори. Спортнинг футбол тури бўйича Амударё тумани қизлар термажамоаси бугунги кунда Ўзбекистондаги энг илғор жамоалардан бири ҳисобланиб, беллашувларда совринли ўринларни эгаллаб келишмоқда. Буларнинг барчаси туманимизда спортни янада ривожлантириш борасида олиб борилаётган тизимли ишлар самараси, албатта.
Жорий йилнинг 5 июль санасида туман Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова ҳамда Халқ депутатлари туман кенгаши депутати, “Тамара Текстил" масъулияти чекланган жамияти раҳбари Тамара Юсуповалар футболчи қизларимиз билан учрашдилар. Холимбег овулидаги спорт майдончасида ташкил этилган учрашувда масъуллар спортчи қизларнинг эришаётган ютуқлари билан самимий табриклаб, уларни қийнаётган муаммолар билан танишдилар.
Учрашув мобайнида “Тамара Текстил" масъулияти чекланган жамиятида ишлаб чиқарилган спорт кийимлари 20 нафар спортчи қизларимизга Тошкент шаҳрида ўтказиладиган мусобақада кийишлари учун совға сифатида топширилди.
Шу ўринда айтиш керакки, 16 ёш қизлар ўртасида туманимиз қизлар футбол терма жамоаси шу кунга қадар қатор мусобақаларда ғолибликни қўлга киритиб келишмоқда.
Хусусан, футбол бўйича 16 ёш қизлар орасида ўтказилаётган Ўзбекистон чемпионати мусобақасида республиканинг "Арал самалы" гуруҳи таркибида туманимизнинг спортчи қизлари Қорақалпоғистон Республикаси ва туманимиз шаънини ҳимоя қилишмоқда. Спортчи қизларимиз иштирокида “Арал самалы” жамоаси “Навоий” жамоасини 7:0 ҳисобида мағлуб қилган. Шунингдек, “Арал самалы” жамоаси Хоразм жамоаси билан бўлган бахсларда 16:0 ҳисобида ғолиб бўлган. Қолаверса, спортчи қизларимиз “Арал самалы” жамоасининг Бухоро жамоасини 7:2 ҳисобида мағлуб қилишида ҳам катта ҳисса қўшган.
Туманимиз фахрига айланган спортчи қизларимиз билан суҳбат мобайнида туман Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова бугунги кунда мамлаклатимизда ёшларимизнинг ҳар томонлама баркамол авлод бўлиб етишишлари учун яратилаётган шарт-шароитлар, жисмоний тарбия ва спортни ёшлар орасида оммалаштириш, спортга қизиқувчи ва спорт шуғулланувчилари сонини ошириш, соғлом турмуш тарзини яратиш борасида олиб борилаётган кенг қамровли ислоҳотлар хусусида сўз юритди.
Шунингдек, суҳбат чоғида масъуллар футболчи қизларнинг қизиқишлари, келгусида орзу-мақсадлари, режалари билан ўртоқлашдилар, самимий мулоқот якунида спортчи қизларнинг олдиндаги мусобақаларида катта омад ҳамда муваффақият тиладилар.
Чарос Арслонова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
