КАРАНТИН ҚОИДАЛАРИГА АМАЛ ҚИЛИНИШИ БЎЙИЧА РЕЙДЛАР ЎТКАЗИЛМОҚДА

Коронавирус инфекцияси янада кенг тарқалишининг олдини олиш мақсадида барча жойларда бўлгани каби Амударё туманида ҳам карантин қоидаларига амал қилиниши назоратга олиниб, аниқланган ҳолатлар бўйича тегишли чоралар кўрилмоқда. Дастлабки лавҳамиз шу мақсадда ташкил қилинган рейд тадбирлари хусусида.

Мамлакатимизда коронавирус инфекцияси билан зарарланганлар сони ортиши билан жорий йилнинг апрель ойидан бошлаб карантин қоидаларига амал қилинишини назорат қилиш янада кучайтирилди. Боғча ва мактабларда касалланиш ҳолати аниқланган тақдирда, уларнинг фаолиятини зудлик билан тўхташиш ва ҳамда карантинга олиниши, ушбу вақт мобайнида улар онлайн тартибда фаолият юритиши белгиланди. Йирик савдо мажмуалари ва бозорларда, дўконларда карантин қоидаларига қатъий амал қилиниши, жумладан, қўлларни антицептик воситалари билан зарарсизлантириш, одамларнинг тиббий ниқоб тақиши, ижтимоий масофа сақлаши қатъий назорат қилинмоқда.

Амударё туманида ҳам карантин қоидаларига амал қилинишини назорат қилиш бўйича қатор чора-тадбирлар амалга оширилмоқда. Туман ИИБ томонидан назорат тадбирлари ташкил қилиниб, йўл қўйилаётган қоидабузарликлар аниқланмоқда ҳамда тегишли жазо чоралари қўлланилмоқда.

Хусусан, жорий йилнинг 4 август куни тумандаги Қипчоқ шаҳарчаси ҳамда Бештом маҳалласида жойлашган умумий овқатланиш шохобчаларида карантин қоидаларига риоя қилиниши бўйича рейд ўтказилди. Туман ички ишлар бўлимининг ҳуқуқбузарликлар профилактикаси бўлинмаси томонидан олиб борилган текширишлар натижасида қатор қоидабузарликлар, карантин қоидаларига амал қилмаганлик ҳолатлари аниқланди. Ҳудудлардаги соат 20:00дан кейин иш юритаётган умумий овқатланиш шохобчалари эгаларига тегишли жазо чоралари қўлланилди.

Шу ўринда айтиш керакки, ушбу касалликка курашишнинг энг биринчи шарти санитария-гигиена қодаларига амал қилишдир. Санитарияга оид қонун ҳужжатларини ёки эпидемияга қарши кураш қоидаларини бузганлик учун қонунчилигимизда жуда кескин жавобгарликлар мавжуд ва эндиликда улар янада кучайтирилмоқда.  

Хусусан, Ўзбекистон Республикаси Маъмурий жавобгарлик тўғрисидаги кодекснинг 53-моддасида - Санитария қонун ҳужжатларини, санитария нормаларини, қоидаларини ва гигиена нормативларини бузганда фуқароларга базавий ҳисоблаш миқдорининг бир бараваридан уч бараваригача, мансабдор шахсларга эса — беш бараваридан ўн бараваригача миқдорда жарима солишга сабаб бўлиши кўрсатилган.

Шунингдек, Ўзбекистон Республикаси Маъмурий жавобгарлик тўғрисидаги кодекснинг 54-моддасида - карантинли ва инсон учун хавфли бўлган бошқа юқумли касалликлар пайдо бўлиши ёки тарқалишининг олдини олиш мақсадида белгиланган мажбурий қоидаларни бузганда фуқароларга базавий ҳисоблаш миқдорининг уч бараваридан беш бараваригача, мансабдор шахсларга эса — ўн бараваридан ўн беш бараваригача миқдорда жарима солишга сабаб бўлиши белгиланган.

Ўзбекистон Республикаси Жиноят кодекси тегишли моддаси билан санитарияга оид қонун ҳужжатларини ёки эпидемияга қарши кураш қоидаларини бузиш ҳолати одамларнинг оммавий касалланишига олиб келса, 11 млн 150 минг сўмдан 22 млн 300 минг сўмгача миқдорда жарима солиш ёки 5 йилгача муайян ҳуқуқдан маҳрум қилиш ёки 2 йилгача ахлоқ тузатиш ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш билан жазоланади.

Шу ўринда юртдошларимиздан ўрнатилган карантин қоидаларига амал қилишларини, ниқоб тақишларини, антисептик воситалардан фойдаланишларини, ижтимоий масофани сақлаб, шахсий гигиена қоидаларига амал қилишларини сўраймиз.

Туман ҳокимлигининг Ахборот хизмати.