KARANTIN QOIDALARIGA AMAL QILINIShI BOʻYIChA REYDLAR OʻTKAZILMOQDA

Koronavirus infektsiyasi yanada keng tarqalishining oldini olish maqsadida barcha joylarda boʻlgani kabi Amudaryo tumanida ham karantin qoidalariga amal qilinishi nazoratga olinib, aniqlangan holatlar boʻyicha tegishli choralar koʻrilmoqda. Dastlabki lavhamiz shu maqsadda tashkil qilingan reyd tadbirlari xususida.

Mamlakatimizda koronavirus infektsiyasi bilan zararlanganlar soni ortishi bilan joriy yilning aprel oyidan boshlab karantin qoidalariga amal qilinishini nazorat qilish yanada kuchaytirildi. Bogʻcha va maktablarda kasallanish holati aniqlangan taqdirda, ularning faoliyatini zudlik bilan toʻxtashish va hamda karantinga olinishi, ushbu vaqt mobaynida ular onlayn tartibda faoliyat yuritishi belgilandi. Yirik savdo majmualari va bozorlarda, doʻkonlarda karantin qoidalariga qatʼiy amal qilinishi, jumladan, qoʻllarni antitseptik vositalari bilan zararsizlantirish, odamlarning tibbiy niqob taqishi, ijtimoiy masofa saqlashi qatʼiy nazorat qilinmoqda.

Amudaryo tumanida ham karantin qoidalariga amal qilinishini nazorat qilish boʻyicha qator chora-tadbirlar amalga oshirilmoqda. Tuman IIB tomonidan nazorat tadbirlari tashkil qilinib, yoʻl qoʻyilayotgan qoidabuzarliklar aniqlanmoqda hamda tegishli jazo choralari qoʻllanilmoqda.

Xususan, joriy yilning 4-avgust kuni tumandagi Qipchoq shaharchasi hamda Beshtom mahallasida joylashgan umumiy ovqatlanish shoxobchalarida karantin qoidalariga rioya qilinishi boʻyicha reyd oʻtkazildi. Tuman ichki ishlar boʻlimining huquqbuzarliklar profilaktikasi boʻlinmasi tomonidan olib borilgan tekshirishlar natijasida qator qoidabuzarliklar, karantin qoidalariga amal qilmaganlik holatlari aniqlandi. Hududlardagi soat 20:00dan keyin ish yuritayotgan umumiy ovqatlanish shoxobchalari egalariga tegishli jazo choralari qoʻllanildi.

Shu oʻrinda aytish kerakki, ushbu kasallikka kurashishning eng birinchi sharti sanitariya-gigiyena qodalariga amal qilishdir. Sanitariyaga oid qonun hujjatlarini yoki epidemiyaga qarshi kurash qoidalarini buzganlik uchun qonunchiligimizda juda keskin javobgarliklar mavjud va endilikda ular yanada kuchaytirilmoqda.  

Xususan, Oʻzbekiston Respublikasi Maʼmuriy javobgarlik toʻgʻrisidagi kodeksning 53-moddasida - Sanitariya qonun hujjatlarini, sanitariya normalarini, qoidalarini va gigiyena normativlarini buzganda fuqarolarga bazaviy hisoblash miqdorining bir baravaridan uch baravarigacha, mansabdor shaxslarga esa — besh baravaridan oʻn baravarigacha miqdorda jarima solishga sabab boʻlishi koʻrsatilgan.

Shuningdek, Oʻzbekiston Respublikasi Maʼmuriy javobgarlik toʻgʻrisidagi kodeksning 54-moddasida - karantinli va inson uchun xavfli boʻlgan boshqa yuqumli kasalliklar paydo boʻlishi yoki tarqalishining oldini olish maqsadida belgilangan majburiy qoidalarni buzganda fuqarolarga bazaviy hisoblash miqdorining uch baravaridan besh baravarigacha, mansabdor shaxslarga esa — oʻn baravaridan oʻn besh baravarigacha miqdorda jarima solishga sabab boʻlishi belgilangan.

Oʻzbekiston Respublikasi Jinoyat kodeksi tegishli moddasi bilan sanitariyaga oid qonun hujjatlarini yoki epidemiyaga qarshi kurash qoidalarini buzish holati odamlarning ommaviy kasallanishiga olib kelsa, 11 mln 150 ming soʻmdan 22 mln 300 ming soʻmgacha miqdorda jarima solish yoki 5-yilgacha muayyan huquqdan mahrum qilish yoki 2-yilgacha axloq tuzatish ishlari yoki 1-yildan 3-yilgacha ozodlikni cheklash yoxud 3-yilgacha ozodlikdan mahrum qilish bilan jazolanadi.

Shu oʻrinda yurtdoshlarimizdan oʻrnatilgan karantin qoidalariga amal qilishlarini, niqob taqishlarini, antiseptik vositalardan foydalanishlarini, ijtimoiy masofani saqlab, shaxsiy gigiyena qoidalariga amal qilishlarini soʻraymiz.

Tuman hokimligining Axborot xizmati.