Қурбон ҳайити байрами арафасида хайр-саховат ишлари амалга оширилмоқда

Муборак Қурбон ҳайитининг халқимизга хос бўлган инсонпарварлик, меҳр-оқибат, саховат ва ўзаро ҳамжиҳатлик каби фазилатларни қарор топтиришдаги муҳим аҳамиятини эътиборга олиб ҳамда миллий-диний қадриятларимизни улуғлаш мақсадида 2021 йилда 13 июль куни Ўзбекистон Республикаси Президентининг “Қурбон ҳайитини нишонлаш тўғрисида”ги қарори имзоланди.

Мазкур қарор билан 2021 йилда Қурбон ҳайитининг биринчи куни 20 июль – сешанбага тўғри келиши муносабати билан, мамлакатимизда 20 июль санаси Қурбон ҳайити байрами этиб белгиланди. Шунингдек, Ўзбекистон Республикаси Президентининг тегишли Фармони билан 2021 йил 21–22 июль кунлари ҳам дам олиш кунлари сифатида белгиланди.

Айтиш керакки, халқимизда азал-азалдан шундай улуғ айём кунларида кексалар, боқувчисини йўқотганлар, ёрдамга муҳтож, эҳтиёжманд кишилар ҳолидан хабар олиш, уларни байрам билан табриклаш, совға-саломлар улашиш, хайр-эҳсон қилиш, меҳр-саховат улашиш миллий анъанага айланган.

Амударё туманидаги секторлар раҳбарлари ташаббуслари билан Қурбон ҳайити айёми арафасида моддий ва маънавий кўмакка муҳтож юртдошларимиз ҳолидан хабар олиниб, уларга байрам совғалари берилди. Секторлар раҳбарлари тумандаги ижтимоий ҳимояга муҳтож, кам таъминланган, эҳтиёжманд, “Темир дафтари”, “Аёллар дафтари”, “Ёшлар дафтари”га киритилган инсонлар ҳолидан хабар олдилар.

Масъуллар уйма-уй юриш орқали юртдошларимизнинг яшаш шароитлари билан танишдилар. Аҳоли билан дилдан суҳбат қуриб, уларнинг муаммоларини тингладилар ҳамда улуғ Қурбон ҳайити айёми билан самимий табрикладилар. Мутасаддилар байрам совғаси сифатида турли хил озиқ-овқат маҳсулотларидан иборат жамланмаларни ҳамюртларимизга тақдим этдилар. Тумандаги тўртта сектор ҳудудидаги жами 400 нафарга яқин ижтимоий ҳимояга, маънавий кўмакка муҳтож кишилар хайр-саховат ишлари давомида ҳар томонлама қўллаб-қувватланди.

Туман ҳокими, биринчи сектор раҳбари Султонбой Йўлдашев ушбу хайр-саховат ишлари мобайнида уйма-уй юриш орқали 1-сектор ҳудудида яшовчи “Темир дафтари”, “Аёллар дафтари” ва “Ёшлар дафтари”га киритилган инсонларнинг яшаш шароитлари, ҳаёт тарзи билан яқиндан танишди. Юртдошларимиз туман ҳокими билан суҳбат чоғида ўзларига қаратилаётган бу каби юксак эътибор ҳамда ҳар томонлама кўрсатилаётган кўмакдан турмуш тарзи тобора яхшиланиб бораётгани айтиб, миннатдорчилик изҳор этдилар.

Шу каби хайрли ишлар Ўзбекистон “Маҳалла” хайрия жамоат фонди туман бўлими томонидан ҳам амалга оширилди. Бўлим масъуллари туманимиз фаоллари томонидан туманимиздаги еттита маҳалларда ижтимоий ҳимояга муҳтож, боқувчисини йўқотган, кам таъминланган кишилар ҳолидан хабар олиниб, байрам совғалари берилди.

Масъуллари тумандаги Арна бўйи, Фаровон, Чордара, Навоий, Хизр эли, Юқори қишлоқ, Янгиобод маҳаллаларида яшовчи эҳтиёжманд инсонларнинг ахволидан хабар олдилар ва байрам билан табрикладилар. Моддий ва маънавий кўмакка муҳтож кишиларга байрам совғаси сифатида бир қоп ун ҳамда 5 литр ўсимлик ёғи берилди. Ҳамюртларимиз бу каби хайрли ишдан ғоят хурсанд бўлдилар ҳамда миннатдорчилик изҳор этдилар.

Таъкидлаш керакки, ҳайит айёми – хайр-эҳсон, саховат, меҳр-мурувват байрами бўлиб, жамиятда кишилар ўртасида тенглик, тотувлик каби инсоний фазилатлар ривож топишида хизмат қиладиган хайр-саховат ишларини амалга оширадиган кундир. Улуғ айём кунларида кишиларга, айниқса, кўнгли ўксик инсонларга кўнгилни кўтарувчи бир оғиз ширин сўз ҳамда яхши муомала ҳам туҳфа, айни пайтда савоб ишдир.

Ютдошларимиз мамлакатимиздаги эпидемиологик вазиятдан келиб чиқиб, карантин талабларига амал қилган ҳолда Қурбон ҳайити байрами билан яқинларини, қариндош-дўстларини ўзаро илиқ сўзлар билан йўқлаши, масофадан туриб яқинлари ҳолидан хабар олиши эса коронавирус пандемияси хавф солиб турган бугунги куннинг талабидир.

Чарос Арслонова, туман ҳокимлигининг Ахборот хизмати раҳбари.