Qurbon hayiti bayrami arafasida xayr-saxovat ishlari amalga oshirilmoqda

Muborak Qurbon hayitining xalqimizga xos boʻlgan insonparvarlik, mehr-oqibat, saxovat va oʻzaro hamjihatlik kabi fazilatlarni qaror toptirishdagi muhim ahamiyatini eʼtiborga olib hamda milliy-diniy qadriyatlarimizni ulugʻlash maqsadida 2021-yilda 13-iyul kuni Oʻzbekiston Respublikasi Prezidentining “Qurbon hayitini nishonlash toʻgʻrisida”gi qarori imzolandi.

Mazkur qaror bilan 2021-yilda Qurbon hayitining birinchi kuni 20-iyul – seshanbaga toʻgʻri kelishi munosabati bilan, mamlakatimizda 20-iyul sanasi Qurbon hayiti bayrami etib belgilandi. Shuningdek, Oʻzbekiston Respublikasi Prezidentining tegishli Farmoni bilan 2021-yil 21–22-iyul kunlari ham dam olish kunlari sifatida belgilandi.

Aytish kerakki, xalqimizda azal-azaldan shunday ulugʻ ayyom kunlarida keksalar, boquvchisini yoʻqotganlar, yordamga muhtoj, ehtiyojmand kishilar holidan xabar olish, ularni bayram bilan tabriklash, sovgʻa-salomlar ulashish, xayr-ehson qilish, mehr-saxovat ulashish milliy anʼanaga aylangan.

Amudaryo tumanidagi sektorlar rahbarlari tashabbuslari bilan Qurbon hayiti ayyomi arafasida moddiy va maʼnaviy koʻmakka muhtoj yurtdoshlarimiz holidan xabar olinib, ularga bayram sovgʻalari berildi. Sektorlar rahbarlari tumandagi ijtimoiy himoyaga muhtoj, kam taʼminlangan, ehtiyojmand, “Temir daftari”, “Ayollar daftari”, “Yoshlar daftari”ga kiritilgan insonlar holidan xabar oldilar.

Masʼullar uyma-uy yurish orqali yurtdoshlarimizning yashash sharoitlari bilan tanishdilar. Aholi bilan dildan suhbat qurib, ularning muammolarini tingladilar hamda ulugʻ Qurbon hayiti ayyomi bilan samimiy tabrikladilar. Mutasaddilar bayram sovgʻasi sifatida turli xil oziq-ovqat mahsulotlaridan iborat jamlanmalarni hamyurtlarimizga taqdim etdilar. Tumandagi toʻrtta sektor hududidagi jami 400 nafarga yaqin ijtimoiy himoyaga, maʼnaviy koʻmakka muhtoj kishilar xayr-saxovat ishlari davomida har tomonlama qoʻllab-quvvatlandi.

Tuman hokimi, birinchi sektor rahbari Sultonboy Yoʻldashev ushbu xayr-saxovat ishlari mobaynida uyma-uy yurish orqali 1-sektor hududida yashovchi “Temir daftari”, “Ayollar daftari” va “Yoshlar daftari”ga kiritilgan insonlarning yashash sharoitlari, hayot tarzi bilan yaqindan tanishdi. Yurtdoshlarimiz tuman hokimi bilan suhbat chogʻida oʻzlariga qaratilayotgan bu kabi yuksak eʼtibor hamda har tomonlama koʻrsatilayotgan koʻmakdan turmush tarzi tobora yaxshilanib borayotgani aytib, minnatdorchilik izhor etdilar.

Shu kabi xayrli ishlar Oʻzbekiston “Mahalla” xayriya jamoat fondi tuman boʻlimi tomonidan ham amalga oshirildi. Boʻlim masʼullari tumanimiz faollari tomonidan tumanimizdagi yettita mahallarda ijtimoiy himoyaga muhtoj, boquvchisini yoʻqotgan, kam taʼminlangan kishilar holidan xabar olinib, bayram sovgʻalari berildi.

Masʼullari tumandagi Arna boʻyi, Farovon, Chordara, Navoiy, Xizr eli, Yuqori qishloq, Yangiobod mahallalarida yashovchi ehtiyojmand insonlarning axvolidan xabar oldilar va bayram bilan tabrikladilar. Moddiy va maʼnaviy koʻmakka muhtoj kishilarga bayram sovgʻasi sifatida bir qop un hamda 5 litr oʻsimlik yogʻi berildi. Hamyurtlarimiz bu kabi xayrli ishdan gʻoyat xursand boʻldilar hamda minnatdorchilik izhor etdilar.

Taʼkidlash kerakki, hayit ayyomi – xayr-ehson, saxovat, mehr-muruvvat bayrami boʻlib, jamiyatda kishilar oʻrtasida tenglik, totuvlik kabi insoniy fazilatlar rivoj topishida xizmat qiladigan xayr-saxovat ishlarini amalga oshiradigan kundir. Ulugʻ ayyom kunlarida kishilarga, ayniqsa, koʻngli oʻksik insonlarga koʻngilni koʻtaruvchi bir ogʻiz shirin soʻz hamda yaxshi muomala ham tuhfa, ayni paytda savob ishdir.

Yutdoshlarimiz mamlakatimizdagi epidemiologik vaziyatdan kelib chiqib, karantin talablariga amal qilgan holda Qurbon hayiti bayrami bilan yaqinlarini, qarindosh-doʻstlarini oʻzaro iliq soʻzlar bilan yoʻqlashi, masofadan turib yaqinlari holidan xabar olishi esa koronavirus pandemiyasi xavf solib turgan bugungi kunning talabidir.

Charos Arslonova, tuman hokimligining Axborot xizmati rahbari.