Туманимизда Республика «Маънавият фестивали» доирасида қатор тадбирлар ўтказилмоқда
Республика Маънавият ва маърифат маркази «Маърифат» тарғиботчилар жамияти юртбошимиз томонидан белгиланган вазифалар ижросини таъминлаш мақсадида Қорақалпоғистон Республикаси, вилоятлар ва Тошкент шаҳрида анъанавий «Маънавият фестивали»ни ўтказмоқдалар. 28 июнь куни Қорақалпоғистон Республикасида “Маънавият фестивали”га старт берилди.
Республика миқёсида фестивал доирасида турли тадбирлар, учрашувлар, матбуот анжуманлари, концерт дастурлари, ўқув семинарлари ташкил қилинмоқда. Фестивалда таниқли актёр ва актрисалар, санъат вакиллари, ёзувчи ва шоирлар, журналистлар, маънавият ва маърифат соҳасида самарали меҳнат қилиб келаётган ўқитувчилар, нуроний ва фахрийлар, “Маърифат” тарғиботчилар жамиятининг аъзолари, талаба ва ўқувчилар ҳамда кенг жамоатчилик вакиллари иштирок этмоқдалар.
29 июнь куни фестивал доирасидаги тадбирлар Амударё туманида давом эттирилди. Дастлаб “Маърифат” тарғиботчилар жамияти аъзолари “Маърифат тур” лойиҳаси доирасида туманимиздаги Чилпиқ тарихий ёдгорлигига саёҳат уюштирдилар. Меҳмонлар саёҳат давомида Чилпиқ меъморий ёдгорлиги ҳамда туманимиз тарихи билан ҳам танишдилар.
Айтиш керакки, Чилпиқ туманимиздаги энг қадим тарихдан хабар берувчи қадамжо бўлиб, мазкур тарихий ёдгорлик милоддан аввалги I асрнинг иккинчи ярми ва милоднинг I асрида табиий тепалик юқорисида диаметри 65 метр бўлган ҳалқа шаклида қурилган. 2019 йилда меъморий ёдгорликни қайта таъмирлаш ишлари олиб борилган. Ҳозирда сайёҳлар учун қулай саёҳат масканига айланган. Тепаликка чиқувчи зинапоялар, йўлаклар қурилган, тунги чироқлар ўрнатилиб, атрофи ободонлаштирилган. Маънавият тарғиботчилари Чилпиқ меъморий ёдгорлигига саёҳат жараёнида туманимизнинг туризм салоҳияти билан ҳам танишдилар.
Шу ўринда қайд этиш керакки, бутун юртимиз бўйлаб ўтказилаётган “Маънавият фестивали” аҳолининг кенг қатламлари, аввало, ёшлар қалбида Ватанга муҳаббат ва садоқат, инсонпарварлик фазилатларини тарбиялаш, миллий урф-одат, анъана ва қадриятларнинг ҳаётимиздаги ўрни ва аҳамиятини ҳар томонлама очиб беришга хизмат қилмоқда. Ўтган йиллар давомида фестиваль доирасида ўндан ортиқ лойиҳа ҳаётга татбиқ этилмоқда. Хусусан, «Янги Ўзбекистон – янги Ренессанс сари!», «Маърифат улашиб...», «Янги Уйғониш даври китоб ва кутубхоналардан бошланади», «Менинг фарзандим – Ўзбекистон фахри», «Фаол фуқаро», «Маърифат тур», «Мақом кечалари», “Бахтли болалик” каби лойиҳалар ҳаётга татбиқ этилмоқда.
Жорий йилда ҳам миллийлик ва замонавийлик мужассам бўлган «Маънавият фестивали»ни ўтказишга катта тайёргарлик кўрилди. Фестивални мамлакатимизнинг барча маъмурий ҳудудларида режа асосида ўтказиш белгиланган. Шунга асосан Республика ишчи гуруҳи томонидан барча ҳудудларда, хусусан, Амударё туманида ҳам «Маънавият фестивали»га пухта тайёргарлик кўрилди.
Туманимизда “Янги Ўзбекистонда эркин ва фаровон яшайлик!” шиори остида ўтказилаётган "Маънавият фестивали" доирасида туман Маҳалла ва оилани қуллаб-қувватлаш бўлимида, 82-сонли умумтаълим мактаби ҳамда 9-сонли Болалар мусиқа ва санъат мактабларида маънавият соатлари бўлиб ўтди. Уларда “Маърифат” тарғиботчилар жамияти аъзолари, ҳудуддаги маҳалла фуқаролар йиғини раислари ва зиёлилар, фаол ёшлар иштирок этдилар.
Маънавият соатларида Президент Администрацияси масъул ходими Абдуҳалил Маврулов, “Маърифат” тарғиботчилар жамияти аъзолари - Ўзбекистонда хизмат кўрсатган маданият ходими, шоир Бобур Бобомурод, фалсафа фанлари доктори, профессор Жамила Шермуҳаммедова ҳамда Ўзбекистон халқ артисти Муяссар Раззоқова, Ёзувчилар уюшмаси аъзоси, шоир Ўктам Мирзаёрлар иштирок этдилар.
Маънавият соатларида сўзга чиққанлар мазкур фестивалнинг аҳамияти, амалга оширилаётган лойиҳалар мазмун-моҳияти борасида фикр-мулоҳазаларини билдиришди. Шунингдек, ҳар бир инсон юксак маънавият эгаси бўлишга интилиши лозимлиги, кишилар фель-атворидаги ижобий ҳамда салбий фазилатларнинг инсон ҳаётига таъсири хусусида сўз юритилди. Қолаверса, ҳар бир ҳудуднинг ўзига хослигига қараб лойиҳалар танланаётгани, унда аҳоли вакиллари фаол иштирок этиб, фестивалга катта қизиқиш билдираётгани таъкидланди.
Учрашувларда туманимиздаги ижодкор ёшлар йиғилганларга ўз истеъдодларини намойиш этишди ва томошабинларнинг олқишига сазовор бўлди. Болалар ижросидаги қорақалпоқ миллий рақслари ҳамда қўшиқлари барчага кўтаринки кайфият улашди.
Маънавият соатларида таъкидланганидек, мамлакатимизда ёшларни ҳар томонлама зукко, билимли, жамият ҳаётида фаол этиб тарбиялаш, уларда амалга оширилаётган ислоҳотларга дахлдорлик ҳиссини кучайтириш мақсадида кенг қамровли чора-тадбирлар амалга оширилмоқда. Шу билан бирга учрашувларда ўсиб, вояга етаётган ёш авлодни ҳар томонлама мукаммал ва мустақил фикрлайдиган, қатъий ҳаётий позицияга эга бўлган ёшлар сифатида тарбиялаш, уларда тизимли таҳлил қилиш, мантиқий фикрлаш ва моҳирона мунозара олиб бориш қобилиятини ривожлантириш ҳамда ўқувчи-талабаларда ватанпарварлик туйғусини шакллантиришга катта этибор қаратиш лозимлиги ҳам қайд этилди. Аҳоли вакиллари томонидан берилган саволларга ҳаётий мисоллар билан жавоблар берилди.
Туманимизда ўтказилаётган “Маънавият фестивали” доирасидаги тадбирлар туман маданият ва аҳоли дам олиш масканида, хотира майдонида давом эттирилиши, фестивал доирасида “Мақом кечаси” ташкил қилиниши режалаштирилган.
Амударё тумани ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
