Мактабгача таълим соҳаси тобора ривожланмоқда

Мактабгача таълим соҳасида мисли кўрилмаган ўзгаришларни бугун ҳар бир юртдошимиз сезиб, кузатиб турибди. Таълимнинг пойдевори ҳисобланган мактабгача таълим тизимига давлат томонидан катта эътибор қаратилиб, соҳа ривожи учун кенг қамровли ислоҳотлар амалга оширилмоқда. Қатор қонунлар, фармон ва қарорлар қабул қилиниб, таълим-тарбиянинг асоси бўлган мактабгача таълим тобора тараққий этиб бормоқда. Мактабгача таълим ташкилотлари сони кун сайин ортиб, уларга болаларни қамраб олиш даражаси ошмоқда.

Туманимизда барпо этилаётган таълим-тарбия масканлари замонавий кўриниш касб этмоқда. Эски бинолар ўрнига янгилари қурилмоқда, баъзилари қайта реконструкция қилиниб, болажонларимизнинг сифатли таълим-тарбия олишлари учун барча имконият ҳамда шарт-шароитлар яратилмоқда. Шунингдек, соҳада хусусий секторнинг улуши ҳам йил сайин ортиб бормоқда. Тадбиркорлар ўз маблағлари ва банк кредитлари эвазига замонавий бинолар қуриб, соҳа ривожига муносиб ҳисса қўшмоқдалар. Тош ёп овули худудида жойлашган давлат-хусусий шерикчилик асосидаги “Зебо” мактабгача таълим ташкилоти фикримизнинг яққол далилидир. 

Мазкур нодавлат мактабгача таълим ташкилотининг лойиҳа қимати 2 миллиард 956 миллион 845 минг сўм бўлиб, шундан 2 миллиард 227 миллион сўм “Ўзсаноатқурилишбанк” тамонидан ажратилган имтиёзли кредит маблағларидир. Ушбу маблағлар ҳисобидан Тош ёп овули ҳудудида янги, замонавий кўринишга эга, барча қулайлик, шароитлар яратилган, 100 ўринли таълим-тарбия даргоҳи бунёд этилди. Ушбу ташкилот бунёд этилиши билан 14 та янги иш ўрни яратилди.

Айтиш керакки, давлатимиз раҳбарининг “Мактабгача таълим тизимини янада рағбатлантириш ва ривожлантириш чора-тадбирлари тўғрисида”ги қарори асосида мактабгача таълим тизимини тубдан ислоҳ қилиш ва такомиллаштириш, мактабгача таълим ташкилотларини давлат томонидан бошқаришнинг самарали тизимини яратиш ҳамда унинг моддий-техника базасини мустаҳкамлаш борасида тизимли ишлар қилинмоқда. Ушбу қарор билан мактабгача таълим тизимини янада такомиллаштириш бўйича дастур тасдиқланиб, унинг доирасида мактабгача таълим ташкилотлари фаолиятини тизимли ташкиллаштириш, қуриш, реконструкция қилиш ва мукаммал таъмирлаш борасидаги ишлар олиб борилмоқда.

Шунингдек, Ўзбекистон Республикаси Президентининг “2020-2022 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги қарорига асосан 2020 йилги инвестиция дастури асосида Амударё тумани Тош ёп овули ҳудудида жойлашган 13-сонли мактабгача таълим ташкилоти филиали биносини реконструкция ҳисобидан янгидан қуриш ишлари сифатли тарзда якунига етказилди.

Бино 90 ўринга мўлжалланган бўлиб, умумий қиймати 2 млрд. 685 млн. 600 минг сўмлик қурилиш ишлари бош пудратчи «MANGIT-SERVIS» масъулияти чекланган жамияти томонидан амалга оширилди.

Замонавий кўринишга эга мазкур 2 қаватли бино фойдаланишга топширилиши билан Амударё тумани ҳокимининг 2021 йил 3 декабр кунги “Мактабгача таълим ташкилотига юридик шахс мақоми бериш тўғрисида”ги қарорига асосан илгари филиал сифатида иш юритган мазкур муассасага 51-сонли мактабгача таълим ташкилоти сифатида мустақил юридик шахс мақоми берилди. Бугунги кунда 51-сонли мактабгача таълим ташкилотида 3 та асосий гуруҳ ташкил қилинган бўлиб, ушбу гуруҳларга ҳудуддаги 90 нафар болалар қамраб олинган ва таълим-тарбия олмоқдалар.

Айтиш керакки, бугунги кунда Амударё туманида мактабгача таълим ташкилотларининг умумий сони 115 тани ташкил қилади. Шундан 51 таси давлат, 4 таси давлат-хусусий шерикчилик асосидаги ва 60 таси оилавий нодавлат мактабгача таълим ташкилотлари ҳисобланади. Мазкур таълим-тарбия муассаларига болажонларни қамраб олиш кўрсаткичи йил сайин ортиб бормоқда. Бугун туманимиздаги мактабгача таълим ташкилотларига қамраб олинган болалар сони 11 минг 211 нафар бўлиб, қамров кўрсаткичи 67,2 фоизни ташкил этади. Жорий йилнинг якунига қадар ушбу кўрсаткични 67,4 фоизга етказиш режалаштирилган.

Чарос Арслонова, туман ҳокимлигининг Ахборот хизмати раҳбари.