“Тараққиёт кўзгуси”

Амударё десаларминг эврилиб,

Яхшиликнинг йўлларидан гул териб.

Дил ғуборин, ғамларини сидириб,

Тонглар аро тўлиб-тошиб келгуси –

"Тараққиёт кўзгуси!”

Бор дунёси Сўз-у Қоғоз аслида,

Ўшал Сўзда минг хил парвоз аслида.

Сўзлар дилдан тилга кўчган фаслида,

Кўнгилларга қувонч олиб киргуси –

"Тараққиёт кўзгуси!”

Саксон йилнинг ортларидан мўралаб,

Ҳақ йўлида минг бор қоғоз қоралаб.

Ҳурлик, дея юракларин поралаб

ўтган улуғ боболарнинг орзуси –

"Тараққиёт кўзгуси!”

Қаранглар-а, шунча мазмун, моҳият:

Ватан меҳри энг бебаҳо қадрият.

Саҳфасида қулф уриб маънавият,

Зулматларнинг бағрини ёритгуси –

"Тараққиёт кўзгуси!”

Кўрдингизми, Амударё боғларин,

Эл ризқининг тошиб турган чоғларин.

Баланд-баланд оппоқ ҳосил тоғларин,

Жаҳон кетар йўллар томон элтгуси –

"Тараққиёт кўзгуси!”

Элим, деган мардларнинг юрагида,

Ер кўрмаган алпларнинг курагида.

Соғлом Она, Соғлом Бола тилагида,

Матонат тимсоли бўлиб ёнгуси –

"Тараққиёт кўзгуси!”

Эзгуликка элтар ёруғ юлдуз у.

Тунларнинг бағрини тилган кундуз у.

Адолат йўлида толмас ҳаргиз у,

Курашчан дилларга маёқ бўлгуси –

"Тараққиёт кўзгуси!”

Мен сени жоним, деб жонимга қўйдим,

Бир лаҳза кўрмасам ўзимни йўйдим.

Сен билан қолган дам бир ҳисни туйдим,

Умрим осмонини қучмиш ёғдуси –

"Тараққиёт кўзгуси!”

У – Устоз-муаллим! Муқаддас мактаб,

Унинг-чун эл бахти энг олий матлаб.

Аму болаларин суйиб, эркалаб,

Келажакка элтар сарбон бўлгуси –

"Тараққиёт кўзгуси!”

Кўзгуга бир боқинг, унда ҳаёт бор,

Истиқлолдан унган нурли баёт бор.

Энг улуғ ният бор, тараққиёт бор,

Аму осмонида Қуёш бўлгуси -

"Тараққиёт кўзгуси!”     

Робия ЙЎЛДОШЕВА.