УЗОҚ МАСОФАДАН МАКТАБГА ҚАТНАЙДИГАН 50 НАФАР ЎҚУВЧИ-ЁШЛАРГА ВЕЛОСИПЕДЛАР СОВҒА ҚИЛИНДИ

Амударё туманида 2021 йил давомида ёшлар билан ишлашнинг янгича тизимини жорий этиш бўйича дастур ишлаб чиқилган эди. Ушбу дастур ижросини таъминлаш мақсадида айни пайтда туманда тегишли мутасаддилар ва масъуллар томонидан чора-тадбирлар амалга оширилмоқда.

Мазкур чора-тадбирлар доирасида ёшларни ижтимоий ҳимоя қилиш ва қўллаб-қувватлаш мақсадида туманнинг чекка ҳудудларда жойлашган таълим муассасаларидаги ижтимоий ҳимояга муҳтож, кам таъминланган оилалар фарзандлари, мактабларга 5-6 км. узоқликдан қатнаётган ўқувчи-ёшлар рўйхати шакллантирилган эди. Ушбу жараёнда тумандаги мавжуд 85 та умумий ўрта таълим мактабининг 1-11-синф ўқувчилар орасида 50 нафар ўқувчи-ёшлар узоқ масофадан мактабларга қатнаб,  таълим-тарбия олиб келаётганлиги аниқланди.

31 март  куни туман ҳокимлиги биносида ташкил қилинган тадбирда туман ҳокими Султонбой Йўлдашев ва секторлар раҳбарлари, туман Халқ таълими бўлими, таълим муассасалари масъуллари ҳамда мактабларга узоқ масофалардан қатнаётган 50 нафар ўқувчи ёшлар иштирок этдилар.

Туман ҳокими Султонбой Йўлдашев тадбирда сўзга чиқиб, ёшларга самимий тилакларини билдирди. Юрт келажаги бўлган ёшларнинг комил инсонлар бўлиб вояга етишлари учун давлатимиз томонидан яратилаётган шароит ва имкониятлар ҳақида гапирди.

Дарҳақиқат, кейинги йилларда ёшлар билан ишлаш тизимини янада такомиллаштириш бўйича қатор амалий ишлар қилинмоқда. Ўтган қисқа вақт ичида ёшларни ҳар томонлама қўллаб-қувватлаш, уларнинг ҳуқуқ ва қонуний манфаатларини ҳимоя қилиш, мамлакатимиз истиқболи учун масъулиятни ўз зиммасига олишга қодир, ташаббускор, шижоатли ёшларни тарбиялаш борасида алоҳида тизим яратилди.

Ўзбекистон Республикаси Ёшлар ишлари агентлиги, Олий Мажлис палаталари ҳузурида Ёшлар парламентлари, Ўзбекистон Республикаси Инновацион ривожланиш вазирлиги қошида Ёшлар академияси ташкил қилинди. Ҳудудларда «Лойиҳалар фабрикаси» иш бошлади.

Ёш авлоднинг соғлом ўсиши, сифатли таълим олиши ва баркамол шахс бўлиб вояга етишини таъминлаш, шунингдек, ёшларнинг маданият, санъат, спорт, ахборот технологиялари ва китоб ўқишга бўлган қизиқишини ҳар томонлама қўллаб-қувватлашга қаратилган «беш муҳим ташаббус»ни жорий этиш бўйича самарали ишлар амалга оширилмоқда.

Тадбирда сўзга чиққанлар барча ёшларнинг келгуси ўқишларида аъло баҳоларга ўқиб ўзлари танлаган олий таълим муассасаларига кириб, етук мутахассислар бўлиб етишишларига ишонч билдирди. Шундан сўнг, узоқ масофадан мактабларга қатнайдиган 50 нафар ўқувчиларга 50 дона велосипед топширилди. Топшириш маросимида секторлар раҳбарлари ҳам иштирок этдилар.

Тадбирда фаол ўқувчи-ёшлар сўзга чиқиб, давлатимиз томонидан яратилган барча имкониятлардан унумли фойдаланиб, буюк келажак яратишга қодир инсонлар бўлиб етишиш учун бор куч-ғайрати билан интилишларини айтиб ўтдилар.

Туман ҳокимлигининг ахборот хизмати.