«БУВИЖОНИМ КИЙГАН ЛИБОСЛАР»
18 март куни Амударё туманидаги 27-сонли умумий ўрта таълим мактабида «Бувижоним кийган либослар» деб номланган маънавий-маърифий тадбир бўлиб ўтди.
Давра суҳбати тарзида ташкил этилган тадбирда мактабнинг ўқитувчилари, юқори синфлар ўқувчиларидан ташқари ҳудуд нуроний онахонлари, ибратли оилалар бекалари, тиббиёт ходимлари ҳам иштирок этдилар.
Давра суҳбатида Арнабўйи маҳалла фуқаролар йиғини масъул ходимлари қатнашиб, мактаб ўқитувчилари билан ҳамкорликда ушбу тадбирни ташкил этишдан мақсад ўқувчи қизлар билан онахонларнинг миллий кийимлар ҳақида жонли мулоқоти давомида бувижонлар кийган либослар ҳақида кенгроқ маълумот бериш, бу борада ёшларнинг ҳам фикрларига қулоқ тутиш, уларга йўл-йўриқлар бериш эди.
Ҳудуднинг кайвони онахонлари Бибихадича Ёқубова, Муяссар Бобожонова, Дамагул Холбоевалар ўзларининг ибратли ҳаёт йўли, миллий урф одатларимиз, қадриятларимиз тўғрисида, кийиниш маданият тўғрисида, ҳудудимизда яшаб ўтган табаррук аёллар кийган либослар ҳақида қизиқарли тарзда ҳикоя қилиб бердилар. Шунингдек, замонавий қизларнинг уй, мактаб, меҳмондорчиликда ва байрамларда киядиган кийимлари хусусида ҳам гапирдилар.
Ҳозирги кунда айниқса қизларнинг ўта тор, калта кийимлар кийиб, ўзларига ортиқча оро беришлари баъзан уларни бачкана кўринишга олиб келаётгани, бугунгидай дориломон замонда, бахтиёр яшаётган, илм олаётган қизлар миллийлигимизни унутмаслиги, кийинишда одоб доирасидан чиқмаслиги лозимлигини таъкидланди. Чунки кишининг либоси унинг диди, дунёқараши ҳамда хулқ-атворидан дарак бериши, кийим инсон маънавиятининг кўзгуси эканлиги батафсил тушунтирилди.
Шундан сўнг ўқувчи қизлар бувижонлар кийган либосларни кийиб, намойиш этиб, ушбу кийимлар ҳақида маълумотлар ҳам беришди. Либосларнинг инсон учун қулайлиги, ортиқча ҳашамлардан холи, кўнгилга яқинлиги ва аёлларни маълум маънода ёт нигоҳлардан сақлаганлигига эътибор қаратилди. Ўқувчи қизлар кийиб намойиш этган либослар, тақинчоқлар, зеб-зийнатлар барчанинг эътиборини тортди.
Ўқувчи қизлар қалбига бувижонлар кийган миллий либослардан фахрланиш ҳиссини сингдириш, мода ортидан қувиб, менталитетимизга зид очиқ-сочиқ кийинишдан қайтариш, миллий қадриятларимизга, момоларимизнинг умрбоқий удум ва анъаналарига ҳурматини юксалтириш мақсадида ўтказилган тадбирда ёшларнинг ҳам фикрлари тингланди, қизларнинг бу борада ўз қарашлари борлиги ва бу қарашларда одоб ва миллий ўзлигимиз чуқур жой эгаллагани жуда қувонарлидир.
Кейинги йилларда умумий ўрта таълим мактаблари ўқувчилари орасида кийиниш маданияти, одоби каби мавзуларда тез-тез бундай тадбирлар ўтказилаётгани бежиз эмас. Боиси ёшларга халқимизга хос кийиниш маданиятини сингдиришнинг аҳамияти жуда муҳим.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
