ЁШЛАРГА ОИД ДАВЛАТ СИЁСАТИ СОҲАСИДАГИ ИШЛАР МУҲОКАМА ЭТИЛДИ

Мамлакатимизда келажагимиз ворисларининг ҳуқуқлари, эркинликлари ва қонуний манфаатларини ҳимоя қилиш, кафолатлаш борасида аниқ манзилли ишлар амалга оширилмоқда. Жойлардаги каби туманимизда ҳам очиқ мулоқотлар, юзма-юз суҳбатлар ташкил этилиб, ёшларнинг иш билан бандлиги, уй-жой таъминоти, бўш вақтларини мазмунли ўтказиш, таълим олишга ва касб ўрганишга бўлган талабларини қаноатлантириш чоралари кўрилмоқда.

13 март куни туман ҳокимлигининг мажлислар залида ўтказилган навбатдаги йиғилишда ҳам ёшларга оид давлат сиёсати соҳасидаги ишлар натижадорлиги ва ёшлар билан ишлаш самарадорлигини ошириш борасида олиб борилаётган ишларни ўрганиш, мавжуд муаммоларни бартараф этишга доир масалалар кўриб чиқилди.

Мазкур йиғилишда Ўзбекистон Республикаси Ёшлар ишлари агентлиги бошқарма бошлиғи, 3-ишчи гуруҳ раҳбари Баҳодир Кучаров, Қорақалпоғистон Республикаси транспорт вазири Султонбой Сапаров, Қорақалпоғистон Республикаси Адлия вазири Сайловбой Мамбеткадиров, “Ёшлар – келажагимиз” жамғармаси мутахассиси Темур Айтмурадовлар иштирок этдилар. Шунингдек, туман ҳокими Султонбой Йўлдашев, секторлар раҳбарлари, ҳоким ўринбосарлари, Ёшлар ишлари агентлиги туман бўлими бошлиғи Жасур Давлетов, тегишли корхона, ташкилот ва муассасалар раҳбарлари, ёшлар етакчилари,  56 нафардан ортиқ ёшлар қатнашишди.

Йиғилишни туман ҳокими Султонбой Йўлдашев очиб берди. Ҳоким ўз сўзида ёшларнинг қонуний ҳуқуқ ва манфаатларини таъминлаш, уларнинг орзу-интилишлари, қобилият ва салоҳиятини рўёбга чиқариш, ижтимоий-иқтисодий фаоллигини ошириш бугунги кунда давлат сиёсатининг устувор йўналишларидан бирига айланганини таъкидлаб ўтди. Шунингдек, туманда ёшларнинг бўш вақтларини мазмунли ташкил этиш, уларни тадбиркорлик фаолиятига  кенг жалб қилиш, истиқболли ғоялари, лойиҳаларини амалга ошириш орқали бандлигини таъминлаш борасида амалга оширилаётган чора-тадбирлар хусусида сўз юритди.

Шундан сўнг, Ўзбекистон Республикаси Ёшлар ишлари агентлиги бошқарма бошлиғи, 3-ишчи гуруҳ раҳбари Баҳодир Кучаров сўзга чиқди ва Президент Шавкат Мирзиёевнинг биринчи марта ўтказилган Ўзбекистон ёшлари форумига ташриф буюгани, сўзлаган нутқи ҳақида гапирди. Давлат раҳбарининг Учинчи Ренессанс, ёш волонтёрлар фаолияти, ёшлар билан ишлаш бўйича Тошкент тажрибаси, “Ёшлар: 1+1” дастури, ёшлар кичик саноат зоналарини ташкил этиш кабилар бўйича таклифлар билдириб ўтгани, тадбиркорликка ўқиган ёшларга 14 фоизлик кредитлар ажратиш ва бошқа масалаларга доир муҳим вазифалар белгилангани, ушбу вазифаларнинг амалдаги ижроси хусусида сўз юритди. Президентимизнинг ёшларга ишонч билан “Биз юртимизда қандай ислоҳотларга қўл урмайлик, аввало, сиз каби ёшларга, сизларнинг куч-ғайратингиз, азм-у шижоатингизга суянамиз” деган сўзлари барчага дастуриламал бўлиши лозимлигини таъкидлаб, ёшларни фидойи ва ватанпарвар бўлишга чақирди.

 Йиғилишдан сўнг, ёшлар билан очиқ мулоқот ўтказилди. Тадбир давомида 16 нафар ёшлар томонидан турли масалалар бўйича мурожаатлар келиб тушди. Мурожаатлар асосан тумандаги вакансия ўринлари ҳақида, IT дастурлаш бўйича ўқитишни ташкил этиш, мутахассислигига кўра ишга жойлашишда амалий ёрдам кўрсатиш каби масалалар бўйича қабул қилинди. Шунингдек, 3 нафар ёш “Ҳар бир ёшга – бир гектар” лойиҳаси доирасида ер ажратиб беришда амалий ёрдам сўради.

Ундан ташқари, туманда ёшларнинг уй-жой таъминоти, уларнинг бўш вақтларини мазмунли ўтказиш, таълим олишга ва касб-ҳунар ўрганишга бўлган қизиқишлари борасидаги таклиф ва муаммолари ҳам тингланди.

Йиғилиш сўнггида масъулларга ёшлар томонидан билдирилган ҳар бир таклиф, муаммо ва камчиликлар юзасидан аниқ йўналтирилган чора-тадбирлар дастурини ишлаб чиқиш, белгиланган муддатларда ижросини ўз вақтида ва сифатли таъминлаш чораларини кўриш бўйича амалга оширилган ишлар юзасидан мониторинг юритиш вазифаси топширилди.

Озода Худойберганова.