YoShLARGA OID DAVLAT SIYoSATI SOHASIDAGI IShLAR MUHOKAMA ETILDI

Mamlakatimizda kelajagimiz vorislarining huquqlari, erkinliklari va qonuniy manfaatlarini himoya qilish, kafolatlash borasida aniq manzilli ishlar amalga oshirilmoqda. Joylardagi kabi tumanimizda ham ochiq muloqotlar, yuzma-yuz suhbatlar tashkil etilib, yoshlarning ish bilan bandligi, uy-joy taʼminoti, boʻsh vaqtlarini mazmunli oʻtkazish, taʼlim olishga va kasb oʻrganishga boʻlgan talablarini qanoatlantirish choralari koʻrilmoqda.

13-mart kuni tuman hokimligining majlislar zalida oʻtkazilgan navbatdagi yigʻilishda ham yoshlarga oid davlat siyosati sohasidagi ishlar natijadorligi va yoshlar bilan ishlash samaradorligini oshirish borasida olib borilayotgan ishlarni oʻrganish, mavjud muammolarni bartaraf etishga doir masalalar koʻrib chiqildi.

Mazkur yigʻilishda Oʻzbekiston Respublikasi Yoshlar ishlari agentligi boshqarma boshligʻi, 3-ishchi guruh rahbari Bahodir Kucharov, Qoraqalpogʻiston Respublikasi transport vaziri Sultonboy Saparov, Qoraqalpogʻiston Respublikasi Adliya vaziri Saylovboy Mambetkadirov, “Yoshlar – kelajagimiz” jamgʻarmasi mutaxassisi Temur Aytmuradovlar ishtirok etdilar. Shuningdek, tuman hokimi Sultonboy Yoʻldashev, sektorlar rahbarlari, hokim oʻrinbosarlari, Yoshlar ishlari agentligi tuman boʻlimi boshligʻi Jasur Davletov, tegishli korxona, tashkilot va muassasalar rahbarlari, yoshlar yetakchilari,  56 nafardan ortiq yoshlar qatnashishdi.

Yigʻilishni tuman hokimi Sultonboy Yoʻldashev ochib berdi. Hokim oʻz soʻzida yoshlarning qonuniy huquq va manfaatlarini taʼminlash, ularning orzu-intilishlari, qobiliyat va salohiyatini roʻyobga chiqarish, ijtimoiy-iqtisodiy faolligini oshirish bugungi kunda davlat siyosatining ustuvor yoʻnalishlaridan biriga aylanganini taʼkidlab oʻtdi. Shuningdek, tumanda yoshlarning boʻsh vaqtlarini mazmunli tashkil etish, ularni tadbirkorlik faoliyatiga  keng jalb qilish, istiqbolli gʻoyalari, loyihalarini amalga oshirish orqali bandligini taʼminlash borasida amalga oshirilayotgan chora-tadbirlar xususida soʻz yuritdi.

Shundan soʻng, Oʻzbekiston Respublikasi Yoshlar ishlari agentligi boshqarma boshligʻi, 3-ishchi guruh rahbari Bahodir Kucharov soʻzga chiqdi va Prezident Shavkat Mirziyoyevning birinchi marta oʻtkazilgan Oʻzbekiston yoshlari forumiga tashrif buyugani, soʻzlagan nutqi haqida gapirdi. Davlat rahbarining Uchinchi Renessans, yosh volontyorlar faoliyati, yoshlar bilan ishlash boʻyicha Toshkent tajribasi, “Yoshlar: 1+1” dasturi, yoshlar kichik sanoat zonalarini tashkil etish kabilar boʻyicha takliflar bildirib oʻtgani, tadbirkorlikka oʻqigan yoshlarga 14 foizlik kreditlar ajratish va boshqa masalalarga doir muhim vazifalar belgilangani, ushbu vazifalarning amaldagi ijrosi xususida soʻz yuritdi. Prezidentimizning yoshlarga ishonch bilan “Biz yurtimizda qanday islohotlarga qoʻl urmaylik, avvalo, siz kabi yoshlarga, sizlarning kuch-gʻayratingiz, azm-u shijoatingizga suyanamiz” degan soʻzlari barchaga dasturilamal boʻlishi lozimligini taʼkidlab, yoshlarni fidoyi va vatanparvar boʻlishga chaqirdi.

 Yigʻilishdan soʻng, yoshlar bilan ochiq muloqot oʻtkazildi. Tadbir davomida 16 nafar yoshlar tomonidan turli masalalar boʻyicha murojaatlar kelib tushdi. Murojaatlar asosan tumandagi vakansiya oʻrinlari haqida, IT dasturlash boʻyicha oʻqitishni tashkil etish, mutaxassisligiga koʻra ishga joylashishda amaliy yordam koʻrsatish kabi masalalar boʻyicha qabul qilindi. Shuningdek, 3 nafar yosh “Har bir yoshga – bir gektar” loyihasi doirasida yer ajratib berishda amaliy yordam soʻradi.

Undan tashqari, tumanda yoshlarning uy-joy taʼminoti, ularning boʻsh vaqtlarini mazmunli oʻtkazish, taʼlim olishga va kasb-hunar oʻrganishga boʻlgan qiziqishlari borasidagi taklif va muammolari ham tinglandi.

Yigʻilish soʻnggida masʼullarga yoshlar tomonidan bildirilgan har bir taklif, muammo va kamchiliklar yuzasidan aniq yoʻnaltirilgan chora-tadbirlar dasturini ishlab chiqish, belgilangan muddatlarda ijrosini oʻz vaqtida va sifatli taʼminlash choralarini koʻrish boʻyicha amalga oshirilgan ishlar yuzasidan monitoring yuritish vazifasi topshirildi.

Ozoda Xudoyberganova.