Шоҳлик тожин кийиб, мусофирлик тузини ичган буюк шоир, олим, тарихчи ва этнограф З.М.Бобур бобомизга эҳтиром кўрсатилди
Халқимиз закоси туфайли яратилган «ўзга юртда шоҳ бўлгандан кўра, ўз юртингда гадо бўлмоқ афзал», деган ҳикмат асрлар оша ўз қадр-қимматини йўқотган эмас. Балки ҳаёт тақозосига кўра, олис юртларда ишлаб, оиласи, рўзғори ташвишларида юрган инсонлар учун бу ҳикмат ҳаётий хулосалар чиқаришда янаям кўпроқ жарангламоқда.
Дарвоқе, ўзга юрт шоҳлигидан ўзи туғилиб ўсган Фарғона водийсининг дурру маржони – Андижон кўчаларида бир мартагина ялангоёқ кезишни, бир тилимгина юрт тупроғида унган қовун таъмини қайта ҳис этишни умрининг охиригача орзу қилиб яшаган, шоҳлик даврида мусофирлик тузини ичган, шарқшунос олим Н.Васелевский таъбири билан айтганда: «ботирлигининг чеки бўлмаган, бутун ҳаёти жасорат намуналари билан тўлиб-тошган буюк бобокалонимиз Заҳириддин Муҳаммад Бобур ҳазратлари учун юқоридаги ҳикмат бутун ҳаёти давомида ҳамроҳ бўлган бўлса, не ажаб!
Жорий йилнинг 15 февраль санасида 37-сонли умумтаълим мактабида бўлиб ўтган З.М.Бобур таваллудининг 538 йиллигига бағишланган адабий-мусиқий ва маърифий тадбирда ўқувчи-ёшлар бу ҳақда тўлиб-тошиб сўзладилар. З.М.Бобурнинг жасорат, матонат ҳамда буюк ватанпарварлик туйғуларига йўғрилган маънавий мероси, ўз она юртида бир ҳовуч амалпараст қариндошларининг кирдикорлари туфайли қадр топмаган Бобур Мирзо ёш бўлса-да, ўз қаддини тиклаб, тарихда «Буюк мўғул империяси» деб ном олган давлат тузиб, Ҳинд диёрида мисли кўрилмаган ислоҳотлар олиб боргани, пировардида, тамоман тарқоқ, диний адоватлар кучайиб кетган, эри ўлган аёлни эрининг жасади билан бирга қўшиб, тириклай ёқиб юборишдек ваҳшиёна одатлар авж олган Ҳиндистон заминини яхлит қилиб бирлаштириш билан бирга бу юртда тинчлик, ўзаро ҳурмат, динлараро бағрикенглик тамойилларини йўлга қўйгани, Бобур тузган бу давлатда адабиёт, тарих, маънавият, меъморчилик ривож топгани ҳақида ўқувчи-ёшлар маърузалар ўқидилар.
Мактабнинг 8-10-синфлар ўқувчилари тадбир давомида Бобур ғазаллари ва рубоийларидан ўқиб, уларнинг мазмун-моҳияти хусусида маълумотлар беришди. Ўқувчи-ёшлар икки гуруҳга бўлиниб, баҳри-байтлар айтишиб, ўзаро мусобақалашдилар. «Яхшилиғ» радифли ғазали матнини таҳлил қилишиб, Бобур ижоди ва фаолияти бўйича олган ўз билимларини намойиш этдилар. Шу билан бирга З.М.Бобур ғазаллари билан айтиладиган мумтоз ашулаларга рақсга тушдилар.
Ушбу тадбирни тайёрлашда ҳамжиҳатлик билан иш юритган мактабнинг она тили ва адабиёт фани ўқитувчиси Хосият Жумабоева ҳамда мусиқа фани ўқитувчиси Муҳайё Қурбонбоевалар З.М.Бобур ғазаллари ва рубоийлари тингловчиларга манзур бўлиш учун ўқувчи-ёшлар билан ҳар бир ғазал ва рубоий матни устида тинимсиз ишлагани ва тадбирнинг бошидан охиригача мумтоз мусиқий оҳанглар жаранглаб тургани иштирокчиларда катта таассурот қолдирди. Айниқса, баҳри-байтлар айтиш мусобақаси жуда мароқли ўтди. Бунда иштирокчиларнинг ҳозиржавоблиги, топқирлиги, матнни тўғри ва ифодали, ғазал ва рубоий жанрлари хусусиятларини инобатга олган ҳолда ўқиш услубларига алоҳида эътибор беришди. Бу эса ўқувчи-ёшлар қалбида улуғ бобокалонимиз ижодий меросига бўлган ҳурмат ва эътибор туйғуларини янада мустаҳкамлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
