Shohlik tojin kiyib, musofirlik tuzini ichgan buyuk shoir, olim, tarixchi va etnograf Z.M.Bobur bobomizga ehtirom koʻrsatildi

Xalqimiz zakosi tufayli yaratilgan «oʻzga yurtda shoh boʻlgandan koʻra, oʻz yurtingda gado boʻlmoq afzal», degan hikmat asrlar osha oʻz qadr-qimmatini yoʻqotgan emas. Balki hayot taqozosiga koʻra, olis yurtlarda ishlab, oilasi, roʻzgʻori tashvishlarida yurgan insonlar uchun bu hikmat hayotiy xulosalar chiqarishda yanayam koʻproq jaranglamoqda.
Darvoqe, oʻzga yurt shohligidan oʻzi tugʻilib oʻsgan Fargʻona vodiysining durru marjoni – Andijon koʻchalarida bir martagina yalangoyoq kezishni, bir tilimgina yurt tuprogʻida ungan qovun taʼmini qayta his etishni umrining oxirigacha orzu qilib yashagan, shohlik davrida musofirlik tuzini ichgan, sharqshunos olim N.Vaselevskiy taʼbiri bilan aytganda: «botirligining cheki boʻlmagan, butun hayoti jasorat namunalari bilan toʻlib-toshgan buyuk bobokalonimiz Zahiriddin Muhammad Bobur hazratlari uchun yuqoridagi hikmat butun hayoti davomida hamroh boʻlgan boʻlsa, ne ajab!
Joriy yilning 15-fevral sanasida 37-sonli umumtaʼlim maktabida boʻlib oʻtgan Z.M.Bobur tavalludining 538 yilligiga bagʻishlangan adabiy-musiqiy va maʼrifiy tadbirda oʻquvchi-yoshlar bu haqda toʻlib-toshib soʻzladilar. Z.M.Boburning jasorat, matonat hamda buyuk vatanparvarlik tuygʻulariga yoʻgʻrilgan maʼnaviy merosi, oʻz ona yurtida bir hovuch amalparast qarindoshlarining kirdikorlari tufayli qadr topmagan Bobur Mirzo yosh boʻlsa-da, oʻz qaddini tiklab, tarixda «Buyuk moʻgʻul imperiyasi» deb nom olgan davlat tuzib, Hind diyorida misli koʻrilmagan islohotlar olib borgani, pirovardida, tamoman tarqoq, diniy adovatlar kuchayib ketgan, eri oʻlgan ayolni erining jasadi bilan birga qoʻshib, tiriklay yoqib yuborishdek vahshiyona odatlar avj olgan Hindiston zaminini yaxlit qilib birlashtirish bilan birga bu yurtda tinchlik, oʻzaro hurmat, dinlararo bagʻrikenglik tamoyillarini yoʻlga qoʻygani, Bobur tuzgan bu davlatda adabiyot, tarix, maʼnaviyat, meʼmorchilik rivoj topgani haqida oʻquvchi-yoshlar maʼruzalar oʻqidilar.
Maktabning 8-10-sinflar oʻquvchilari tadbir davomida Bobur gʻazallari va ruboiylaridan oʻqib, ularning mazmun-mohiyati xususida maʼlumotlar berishdi. Oʻquvchi-yoshlar ikki guruhga boʻlinib, bahri-baytlar aytishib, oʻzaro musobaqalashdilar. «Yaxshiligʻ» radifli gʻazali matnini tahlil qilishib, Bobur ijodi va faoliyati boʻyicha olgan oʻz bilimlarini namoyish etdilar. Shu bilan birga Z.M.Bobur gʻazallari bilan aytiladigan mumtoz ashulalarga raqsga tushdilar.
Ushbu tadbirni tayyorlashda hamjihatlik bilan ish yuritgan maktabning ona tili va adabiyot fani oʻqituvchisi Xosiyat Jumaboyeva hamda musiqa fani oʻqituvchisi Muhayyo Qurbonboyevalar Z.M.Bobur gʻazallari va ruboiylari tinglovchilarga manzur boʻlish uchun oʻquvchi-yoshlar bilan har bir gʻazal va ruboiy matni ustida tinimsiz ishlagani va tadbirning boshidan oxirigacha mumtoz musiqiy ohanglar jaranglab turgani ishtirokchilarda katta taassurot qoldirdi. Ayniqsa, bahri-baytlar aytish musobaqasi juda maroqli oʻtdi. Bunda ishtirokchilarning hozirjavobligi, topqirligi, matnni toʻgʻri va ifodali, gʻazal va ruboiy janrlari xususiyatlarini inobatga olgan holda oʻqish uslublariga alohida eʼtibor berishdi. Bu esa oʻquvchi-yoshlar qalbida ulugʻ bobokalonimiz ijodiy merosiga boʻlgan hurmat va eʼtibor tuygʻularini yanada mustahkamladi.

Robiya YOʻLDOShEVA.