ТАБИИЙ ФАНЛАР БЎЙИЧА БЕЛЛАШУВ ЎТКАЗИЛДИ
Республикамизда барча халқ таълими муассасаларида ўтган ой мобайнида кимё, биология ва физика фанлари ойлиги ўтказилди. Фан ойлиги давомида ўқитувчиларнинг ижодий фаолликларини кучайтириш, истеъдодли, ижодкор ўқитувчиларни аниқлаш, уларнинг тажрибаларини ўрганиш, тарғибот қилиш, таълим сифатини ошириш ҳамда таълим жараёнида қўлланилаётган услубларни такомиллаштириш мақсадида очиқ дарслар ва бошқа тадбирлар ташкил этилди.
Тумандаги 1-сонли умумтаълим ўрта мактабида ҳам кимё, биология, физика фанлари ойлигига бағишланган тадбирлар самарали ўтказилди. Ойликнинг дастлабки куни муносабати билан ўтказилган тадбирлардан бошлаб, кейинги жараёнлардаги очиқ ўқув машғулотлари, давра суҳбатлари, лаборатория машғулотлари, кўргазмали семинарлар ўқувчиларнинг табиий фанларга бўлган қизиқишларини янада оширди.
Айниқса, ойлик якунида ўтказилган “Табиий фанлар издошлари” номли тадбирда ўқувчилар фан бўйича олган билимлари янада ошгани, кўпроқ маълумотларга эга бўлганини намоён қилдилар.
Тадбирда мактабнинг 7-синф ўқувчиларининг “Менделеев”, “Ибн Сино” ҳамда “Исаак Ньютон” жамоалари беллашдилар. Тадбирни мактаб директорининг маънавият ва маърифат масалалари бўйича ўринбосари очиб бериб, фан ойлиги доирасида ўтказилган тадбирларнинг таълим сифатини оширишдаги аҳамиятига кенг тўхталди. Шунингдек, ўқувчиларга мазкур фанларнинг аҳамияти, ҳаёт давомидаги ўрни ҳақида кенг тушунчалар бериб, беллашув иштирокчиларига муваффақият тилади.
Тадбирни мактабнинг 10-синф ўқувчи-қизлари чиройли қўшиқ ва рақс билан бошлаб берди. Шундан сўнг, ўқувчилар тадбирни ўзларининг фанга доир шеърлари, савол-жавоб тарзидаги билимлар синови, қизиқарли кимёвий тажрибалар, сканвордлар ечиш ва эркин мавзу каби шартлар бўйича тайёрлаган чиқишлари билан давом эттирдилар.
Тадбирда иштирок этган ўқувчилардан Адҳам Раҳимов, Ҳакимбек Тўраев, Аҳрор Соатбоев, Фарида Норимбетова, Шаҳзода Эгамбергановалар томонидан кимё фани бўйича кўрсатиб берилган тажрибалар барчанинг қизиқишини оширди. Тажриба ўтказиш бўйича намойишларда 8-синф ўқувчиси Ҳилола Бозорбоева ҳам фаол иштирок этиб, фан бўйича кўникмаларга эга эканлигини кўрсатиб берди. Ундан ташқари, биология фанидан Сирож Муродбоев, Умида Жамоловалар, физика фани бўйича Акбар Маткаримов, Сурож Омонбоевлар қизиқарли тажрибалар кўрсатишди. Ўқувчилар сканвордлар ечиш шарти давомида ҳам табиий фанлардан эгаллаган билим ва кўникмаларидан келиб чиқиб, маҳоратларини намойиш этишди. Эркин мавзу бўйича чиқишларда ҳам ўқувчилар моҳирона ижролари билан томошабинларнинг эътиборини қозонди.
Тадбир таассуротларга бой тарзда жуда қизиқарли ўтказилди. Мактабнинг кимё фани ўқитувчилари Наргиза Холбоева, Инобат Ибрагимова ва кимё-биология фанлари бўйича лаборант Роза Мадраҳимова, биология фани ўқитувчиси Мўътабар Аҳмедова, физика фани ўқитувчиси Дилноза Қодирова ва лаборанти Наргиза Ўрозбоевалар томонидан ўқувчилар билан ҳамкорликда ташкиллаштирилган тадбир барча ўқувчиларга ва ўқитувчиларга ниҳоятда манзур бўлди.
О. Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
