TABIIY FANLAR BOʻYIChA BELLAShUV OʻTKAZILDI
Respublikamizda barcha xalq taʼlimi muassasalarida oʻtgan oy mobaynida kimyo, biologiya va fizika fanlari oyligi oʻtkazildi. Fan oyligi davomida oʻqituvchilarning ijodiy faolliklarini kuchaytirish, isteʼdodli, ijodkor oʻqituvchilarni aniqlash, ularning tajribalarini oʻrganish, targʻibot qilish, taʼlim sifatini oshirish hamda taʼlim jarayonida qoʻllanilayotgan uslublarni takomillashtirish maqsadida ochiq darslar va boshqa tadbirlar tashkil etildi.
Tumandagi 1-sonli umumtaʼlim oʻrta maktabida ham kimyo, biologiya, fizika fanlari oyligiga bagʻishlangan tadbirlar samarali oʻtkazildi. Oylikning dastlabki kuni munosabati bilan oʻtkazilgan tadbirlardan boshlab, keyingi jarayonlardagi ochiq oʻquv mashgʻulotlari, davra suhbatlari, laboratoriya mashgʻulotlari, koʻrgazmali seminarlar oʻquvchilarning tabiiy fanlarga boʻlgan qiziqishlarini yanada oshirdi.
Ayniqsa, oylik yakunida oʻtkazilgan “Tabiiy fanlar izdoshlari” nomli tadbirda oʻquvchilar fan boʻyicha olgan bilimlari yanada oshgani, koʻproq maʼlumotlarga ega boʻlganini namoyon qildilar.
Tadbirda maktabning 7-sinf oʻquvchilarining “Mendeleyev”, “Ibn Sino” hamda “Isaak Nyuton” jamoalari bellashdilar. Tadbirni maktab direktorining maʼnaviyat va maʼrifat masalalari boʻyicha oʻrinbosari ochib berib, fan oyligi doirasida oʻtkazilgan tadbirlarning taʼlim sifatini oshirishdagi ahamiyatiga keng toʻxtaldi. Shuningdek, oʻquvchilarga mazkur fanlarning ahamiyati, hayot davomidagi oʻrni haqida keng tushunchalar berib, bellashuv ishtirokchilariga muvaffaqiyat tiladi.
Tadbirni maktabning 10-sinf oʻquvchi-qizlari chiroyli qoʻshiq va raqs bilan boshlab berdi. Shundan soʻng, oʻquvchilar tadbirni oʻzlarining fanga doir sheʼrlari, savol-javob tarzidagi bilimlar sinovi, qiziqarli kimyoviy tajribalar, skanvordlar yechish va erkin mavzu kabi shartlar boʻyicha tayyorlagan chiqishlari bilan davom ettirdilar.
Tadbirda ishtirok etgan oʻquvchilardan Adham Rahimov, Hakimbek Toʻrayev, Ahror Soatboyev, Farida Norimbetova, Shahzoda Egamberganovalar tomonidan kimyo fani boʻyicha koʻrsatib berilgan tajribalar barchaning qiziqishini oshirdi. Tajriba oʻtkazish boʻyicha namoyishlarda 8-sinf oʻquvchisi Hilola Bozorboyeva ham faol ishtirok etib, fan boʻyicha koʻnikmalarga ega ekanligini koʻrsatib berdi. Undan tashqari, biologiya fanidan Siroj Murodboyev, Umida Jamolovalar, fizika fani boʻyicha Akbar Matkarimov, Suroj Omonboyevlar qiziqarli tajribalar koʻrsatishdi. Oʻquvchilar skanvordlar yechish sharti davomida ham tabiiy fanlardan egallagan bilim va koʻnikmalaridan kelib chiqib, mahoratlarini namoyish etishdi. Erkin mavzu boʻyicha chiqishlarda ham oʻquvchilar mohirona ijrolari bilan tomoshabinlarning eʼtiborini qozondi.
Tadbir taassurotlarga boy tarzda juda qiziqarli oʻtkazildi. Maktabning kimyo fani oʻqituvchilari Nargiza Xolboyeva, Inobat Ibragimova va kimyo-biologiya fanlari boʻyicha laborant Roza Madrahimova, biologiya fani oʻqituvchisi Moʻʼtabar Ahmedova, fizika fani oʻqituvchisi Dilnoza Qodirova va laboranti Nargiza Oʻrozboyevalar tomonidan oʻquvchilar bilan hamkorlikda tashkillashtirilgan tadbir barcha oʻquvchilarga va oʻqituvchilarga nihoyatda manzur boʻldi.
O. Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
