МУҚАДДАМ СУДЛАНГАН ФУҚАРОЛАРГА НИСБАТАН МАЪМУРИЙ НАЗОРАТ ЎРНАТИЛДИ

Ўтган давр мобайнида мамлакатимизда инсон ҳуқуқ ва эркинликларини таъминлаш масаласи давлат сиёсати даражасига кўтарилиб, қатор ислоҳотлар амалга оширилди. Айниқса, шахс ҳуқуқлари ҳимоясига алоҳида эътибор қаратилди. Инсонпарварлик,  адолат ва қонун устуворлиги сингари принциплар суд-ҳуқуқ тизимини ислоҳ қилиш ҳамда маъмурий ва жиноят қонунчилигини либераллаштириш соҳасида амалга оширилган ишларда ўзининг амалий ифодасини топди.

Таъкидлаш жоизки, суд томонидан жазони ижро этиш муассасаларидан озод қилинган шахслар устидан маъмурий назорат ўрнатилиши,  маълум чекловлардан иборат тарбиявий таъсир чорасини қўллаш натижасида қайта жиноят содир этилишининг олди олинмоқда. Мазкур тоифадаги шахслар билан якка тартибдаги профилактик тадбирлар ўтказилиб, ҳаётда тўғри йўл топишларига кўмаклашилмоқда.

Шу йил 20-21 январь кунлари туман Ички ишлар бўлими ҳамда Чойкўл, Ўрта Қалъа овуллари фуқаролар йиғини биноларида ана шундай тоифадаги, яъни жазони ижро этиш муассасаларидан озод этилган шахсларга маъмурий назорат ўрнатиш мақсадида сайёр суд мажлислари ўтказилди. Сайёр судда туман Ички ишлар бўлимининг ҳуқуқбузарликлар профилактика бўлинмасида ҳисобда турган муқаддам судланган фуқароларга нисбатан маъмурий назорат тўғрисидаги тақдимномаларига доир иш материаллари кўриб чиқилди.

Суд мажлисида Жиноят ишлари бўйича Амударё тумани суди раиси Султонмурод Давлетмуродов, туман прокурори ўринбосари Раҳмон Санкибоев ва туман Ички ишлар бўлимининг ҳуқуқбузарликлар профилактикаси бўлинмаси бошлиғи Орифжон Қосимовлар иштирок этдилар. Суд томонидан муқаддам судланиб, эндиликда озодликка чиққан шахслар устидан маъмурий назорат ўрнатиш масаласини кўриб чиқиш юзасидан ўтказилган мазкур суд мажлисларида фуқаролар йиғинлари масъуллари ҳам қатнашдилар.

Суд мажлисларида Жиноят ишлари бўйича Амударё тумани суди раиси Султонмурод Давлетмуродов Ўзбекистон Республикасининг 2019 йилдаги «Жазони ижро этиш муассасаларидан озод қилинган айрим тоифадаги шахслар устидан маъмурий назорат тўғрисида»ги Қонунида белгиланган тартибга кўра қандай шахсларга нисбатан маъмурий назорат ўрнатилиши тўғрисида маълумот берди. Шунингдек, маъмурий назорат шахснинг судланганлик ҳолатининг тугатилиши ёки судланганликнинг олиб ташланиши муддатлари доирасида ўрнатилишини айтиб ўтди.

Қонунга кўра, суд томонидан ўта хавфли рецидивист деб топилган, оғир ёки ўта оғир жиноятлар содир этганлик учун озодликдан маҳрум қилишга ҳукм этилган, ҳар қандай қасддан қилинган жиноятлар учун икки ёки ундан ортиқ марта озодликдан маҳрум қилишга ҳукм этилган шахсларга нисбатан маъмурий назорат ўрнатиш чораси қўлланилади. Шунингдек, Ўзбекистон Республикасининг Жиноят кодексига биноан оғир ёки ўта оғир жиноят ҳисобланадиган қилмишларни содир этганлик учун бошқа давлат ҳудудида озодликдан маҳрум қилиш тарзидаги жазони ўтаганларга ўрнатилади.

Мажлисларда туман ҳудудида яшаб, муқаддам жиноят содир қилганлиги учун бошқа давлат ҳудудида озодликдан маҳрум қилиш тарзидаги жазони ўтаб келган ушбу шахслар эндиликда тегишли муддатгача мунтазам назорат остида бўлиши таъкидланди. Қайта жиноят содир қилинишининг олдини олиш мақсадида улар  билан ҳар ой икки марта якка тартибда профилактик ишлар олиб борилиши маълум қилиниб, назорат остидаги шахсга нисбатан қўлланиладиган чеклов чоралари тушунтирилди.

Муқаддам жиноят содир қилганлиги учун бошқа давлат ҳудудида озодликдан маҳрум қилиш тарзидаги жазони ўтаб келган шахсларга нисбатан маъмурий назорат ўрнатиш юзасидан суд мажлиси сайёр тарзда Қиличбой овулида ҳам ўтказилди.

Орифжон Қосимов, туман ИИБ ҲПБ бошлиғи.