ХАТОНИ ОТА-ОНА ҚИЛИБ, ЖАЗОСИНИ ГЎДАКЛАР ТОРТАДИМИ?
Халқимизда кирпи боласини юмшоғим, қарға оппоғим, деб суяди деган гап бор. Ҳаётга чуқурроқ назар солиб қарасак, чиндан-да баъзи ҳолларда ҳайвонлар, қушлар Яратган энг мукаммал қилиб яратилган зот – инсонлардан болажонроқ эканлигини, улар келгуси авлоди учун ғамхўрроқ эканлигини англагандай бўламиз. Оммавий ахборот воситаларида ҳаётимиз бор бўйича акс этаётган бугунги кунда қайси амалдорнинг қандай машина сотиб олаётгани, қайси амалдор қандай яшаши-ю қўл остидагиларга қандай муомалада бўлиши, ким оиласини қандай боқаяпти-ю кимнинг ким билан турмуш қуриб, кимлар ажрашаётгани, шоу бизнес вакиллари қанча пул топаётгани ва нималарга сарфлаётгани, аввалги, кейинги турмуши ҳақида барча маълумотларни, дунё мамлакатларига доир маълумотларни ҳам ижтимоий тармоқлардан бемалол топа оламиз. Майли буларни ривожланиш, глобаллашув маҳсули деб қабул қиламиз.
Шуниси ачинарлики, кейинги йилларда ўз боласини пулга (!) янги уй олиш, боқишда қийинчиликларга учраётгани, ё биров билиб қолмаслиги учун (албатта, никоҳсиз туғилганини) сотаётган оналар, оиласидаги арзимаган муаммолар сабаб ҳатто уларга ўт қўяётган, сувга чўктираётган оналар, кўксига пичоқ қадаётган оталар ҳақида ёзилган мақолаларни ўқиб, “тавба” дея ёқа ушлайди, одам. Хатони ота-оналар қилишади жазосини гўдаклар тортадими? Бу қандай бағритошлик?
Яқиндагина Сирдарёда кўзмунчоқдай ширинтой икки ўғлини ва ўзини сувга ташлаб ўлдирмоқчи бўлган аёл тўхтатиб қолинган эди. Зоминда бешикда ётган икки ойлик норасида гўдак қизини оилавий низоларга бардош беролмай, уриб ўлдирган эркакка беш йил озодликдан маҳрум этиш жазоси тайинлангани ҳақида ўқиб, даҳшатдан қотиб қолдим. Ахир оламга эндигина кўзларини катта-катта очиб боқаётган, ота-онаси меҳрини, оғушини ҳис қила бошлаган гўдакда, қизалоқда не айб? Муаммо гирдобида қолган бўлса, инсонларча муомала билан эр-хотин ўзлари ҳал қилсалар бўлмасмиди? Наҳот улар қиз бола нафақат фарзанд, балки жаннат калити деган таърифга лойиқ эканлигидан бехабар бўлишса? Жоҳиллик, бағритошлик ҳам шунчалик бўлар эканми – ота ўз пуштикамаридан дунёга келган икки ойлик фарзанди аржумандини уриб ўлдиришгача бориб етса? Наҳот у фарзанд Яратганнинг энг бебаҳо неъмати эканлигига, чор-атрофида тирноққа зор қанча одамлар борлигига ақли етмайдиган даражада бўлса?
Билмадим, билмадим. Бироқ ўша эркак мурғак норасиданинг уволига қолгани аниқ.
Майли, кун-кунни қувиб ўтиб, ўша отанинг беш йил озодликдан маҳрум қилиш жазо (назаримда жуда кам белгиланган) муддати ҳам тугар. Бироқ ўша вақтда у эл юзига қандай қарайди, ким унинг йўлини кутади? Менимча бу саволлар унга беш йиллик жазодан ҳам оғир бўлар, эҳтимол? Яратганнинг ўзи одамларнинг барчасига инсоф берсин!
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
