ЎҚУВЧИ-ЁШЛАР ШИМОЛИЙ-ҒАРБИЙ ҲАРБИЙ ОКРУГДА БЎЛИБ, ҲАРБИЙЛАР ҲАЁТИ БИЛАН ТАНИШДИЛАР

Дунёда касблар, ҳунарлар кўп. Шу баробарида инсон юрагида уйғонувчи орзулар ҳам бисёр. Айниқса, йигит киши ҳаётида ҳеч бўлмаса бир марта ҳарбий либос қийишни, она Ватан сарҳадларида мағрур туриб, аскар қасамини қабул қилишни болаликдан орзу қилиб яшайди. Туман Мудофаа ишлари бўлими томонидан умумтаълим мактаблари билан ҳамкорликда ўтказиладиган тадбирларда бу яққол намоён бўлади.

Яқинда, 2020 йилнинг 24 декабрь санасида туман ҳокимлиги ёрдами билан туман Мудофаа ишлари бўлими ҳамда Халқ таълими бўлими ҳамкорликда ташкил этилган “Ватанпарварлик ойлиги” доирасида 16-, 22-, 38-, 55-, 56-сонли мактабларнинг бир гуруҳ ўқувчилари туман Мудофаа ишлари бўлими ходими М.Мадраҳимов бошчилигида Шимолий-ғарбий ҳарбий округининг дала машғулоти майдонида бўлиб, ҳарбийлар ҳаёти билан яқиндан танишдилар.

Ўсиб келаётган ёш авлод қалбида ватанпарварлик туйғуларини янада мустаҳкамлаш, глобаллашув жараёнида ёшларни мафкуравий хуружлардан ҳимоялаш, уларга мамлакатимизнинг тинчликпарвар сиёсати, ҳарбий салоҳияти, минтақада дўстлик ва тинчлик ўрнатишга қўшаётган беқиёс катта ҳиссаси ҳақида кенг тушунчалар беришга қаратилган ушбу тадбирлда 55-сонли умумтаълим мактаб ўқувчи-ёшлари ҳам фаол иштирок этишди.

Мактабнинг Чақириққа қадар бошланғич тайёргарлик раҳбари Н.Ўрозбоев бошчилигида мазкур тадбирда иштирок этган ўқувчи-ёшларга, аввало, мароқли концерт дастури, сўнгра Шимолий-ғарбий ҳарбий округ зобит ва аскарлари томонидан амалга оширилган ҳарбий тактик-ўқув машғулотлари, кўргазмали чиқишлар намойиш этилиб, замонавий ҳарбий қуроллар кўргазмаси ташкил этилди.

Ўқувчи-ёшлар зобит ва аскарларнинг она Ватанни ҳимоя қилиш ҳар бир йигит кишининг бурчи, мамлакатимиз мустақиллигини мустаҳкамлашга ҳисса қўшиш эса ҳар бир инсон учун шон-шараф эканлиги хусусидаги сўзларини мароқ билан тингладилар. Қўмондонлик томонидан ўқувчи-ёшларга кўрсатилган катта эътибор учун ёшлар ўз миннатдорчиликларини изҳор этдилар.

“Ватанпарварлик ойлиги” доирасида туманимиз мактаблари ўқувчиларининг Шимолий-ғарбий ҳарбий округ зобит ва аскарлари билан учрашуви ҳамда дала машғулоти майдонида ўтказилган кўргазмали ҳарбий тактик-ўқув машғулотлари, ҳарбий қуроллар кўргазмаси ёшларда катта таассуротлар қолдирди.

Б.УТАБОЕВ, 55-сонли мактаб ўқитувчиси.