ЁШЛАР ИШТИРОКИДАГИ ТАДБИРДА ҲАРБИЙ ТЕХНИКАЛАР КЎРГАЗМАСИ ТАШКИЛ ЭТИЛДИ
Амударё туманида ўтказилаётган Ёшлар фестивали доирасида Амир Темур номли овулда шу ҳудуд ёшлари иштирокида маънавий-маърифий тадбир ўтказилди. Учрашув тадбирида Ўзбекистон Ёшлар агентлиги туман бўлими бошлиғи Жасур Давлетов, 9202-ҳарбий қисм командирининг ўринбосари Санжарбек Тошматов, туман ҳокимининг чегара масалалари бўйича ёрдамчиси Ойбек Шомуродов, туман Халқ таълими бўлими мутахассиси Зафар Абдуллаев, Амир Темур номли овул фуқаролар йиғини раиси Ойбек Юсупов, 4-сонли умумтаълим мактаби директори Отабек Хидирбоев ҳамда Амир Темур номли овул фуқаролар йиғинида истиқомат қилувчи ёшлар иштирок этишди.
Ёшлар билан дилдан суҳбат, ошкора ва самимий мулоқот руҳида ўтган учрашув тадбирида масъуллар ёшлар ўртасида турли спорт мусобақаларини ўтказиш, уларнинг ўзлари қизиққан спорт йўналишлари билан мунтазам шуғулланишлари учун давлатимиз томонидан, хусусан, туманимизда яратилаётган шарт-шароитлардан унумли фойдаланиб, юқори натижаларга эришаётган ёшлар ҳақида фахрланиб гапирдилар. Шу баробарида овул ёшлари томонидан амалга оширилаётган ишлар, айниқса, ўқишда, ишда, тадбиркорлик соҳасида, спортда ўз қобилиятларини намоён этаётган ёшлар номини тилга олиб, уларнинг келгуси ишларида ютуқлар тиладилар.
Тадбирда замонавий ҳарбий техникалар кўргазмаси ҳам ташкил этилди. Овул ёшлари ушбу кўргазмани катта қизиқиш билан томоша қилдилар. Шу билан бирга қалбларида жўш урган ватанпарварлик туйғуларини ҳам яширмадилар. Улар келажакда ҳарбий бўлиш, Ватан олдидаги ўз йигитлик бурчларини шараф билан адо этишга тайёр эканликларини изҳор этдилар.
Ҳарбий техникалар кўргазмаси орқали Ватанимизнинг ҳарбий куч-қудрати ва салоҳияти билан яқиндан танишган ёшлар ўзларини қизиқтирган саволлар билан мурожаат қилдилар. Тадбирда иштирок этаётган ҳарбий мутахассислар ёшлар томонидан берилган барча саволларга батафсил жавоб қайтардилар.
Бўлиб ўтган учрашув тадбири ёшларни жисмоний чиниқтириш, спорт соҳасидаги интилишларини рағбатлантиришга қаратилгани билан муҳим аҳамият касб этди ва ёшлар қалбида она Ватанга муҳаббат туйғуларини янада мустаҳкамлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
