МАНҒИТ ДЕҲҚОН БОЗОРИДА ОЗИҚ-ОВҚАТ МАҲСУЛОТЛАРИ ЯРМАРКАСИ ТАШКИЛ ЭТИЛДИ

Айни кунларда мамлакатимизнинг барча ҳудудларида бўлгани каби туманимиздаги бозорларда ҳам тўкин-сочинлик. Маҳсулот турлари ва сифати, нархлари ҳам  ҳамёнбоп. Яъни одатдаги кунлардагидан анча арзон. Оиласи, фарзандлари даврасида Янги йил байрамини хушчақлик билан ўтказиш ниятида  озиқ-овқат маҳсулотлари, мевалар харид қилиш учун бозорларга ташриф буюрган фуқаролар қувона-қувона  керакли харидини қилиб кетишаяпти. Айниқса, Манғит деҳқон бозори олдидаги ярмарка савдоларидан барча хурсанд. Боиси – яратилган бу қулайликлар, арзончиликлар ортида давлатимизнинг фуқароларга ғамхўрлиги мужассам. Шуниси эътиборлики, Ўзбекистон Республикаси Вазирлар Маҳкамасининг 2020 йил 18 декабрдаги “Янги йил байрами арафасида ва байрам кунлари ички истеъмол бозорини асосий турдаги озиқ-овқат маҳсулотлари билан кафолатли тўлдириш ва нарх-наволарнинг барқарор сақланишини таъминлаш мақсадида ҳудудларда янги йил ярмарка савдоларини ташкил этишга қаратилган қўшимча чора-тадбирлар тўғрисида”ги 03/1-2623-сонли йиғилиш баёни топшириқлари ижросини таъминлаш мақсадида республиканинг  барча вилоятлари йирик шаҳарларида ва барча туманлар марказларида жорий йилнинг 20 декабридан 2021 йил 10 январига қадар ижтимоий муҳим турдаги озиқ- овқат маҳсулотлари билан савдо қилувчи яркаларкалар ташкил қилинган.

Йиғилиш баёнига мувофиқ Янги йил савдо ярмаркаларини самарали ташкил этиш бўйича Республика ишчи гуруҳи тузилди, ярмарка расталарига етказиб бериладиган маҳсулотлар турларининг намунавий рўйхати белгиланди.

Ушбу ярмаркаларга тадбиркорлик субъектларни жалб этишга вилоятлар, туман, шаҳар ҳокимликлари бевосита масъул ҳисобланади.

Бу борада туманимизда олиб борилган саъй-ҳаракатлар натижасида Манғит Деҳқон бозорида ҳам озиқ-овқат маҳсулотлари ярмаркаси 20 декабрдан ўз фаолиятини бошлади. Ҳозирги кунда ушбу ярмаркада  гўшт, тухум, товуқ гўшти, гуруч, шакар, ун, ун маҳсулотлари, мевалар ва сабзавотлар одатдаги бозор нархидан анча арзон сотилмоқда.

Шуниси эътиборликки, янги йил байрами арафасида бозорларда озиқ-овқат маҳсулотлари нархининг сунъий равишда ошиб кетишининг  олдини олиш мақсадида амалга  оширилаётган бу тадбирнинг  аҳамиятини барча юртдошларимиз сидқидилдан ҳис қилмоқда. Озиқ-овқат маҳсулотлари ярмаркасидан сифатли ва ҳамёнбоп маҳсулотларни қувона-қувона харид қилмоқда. Нархларнинг барқарорлиги Бош прокуратура ҳузуридаги иқтисодий жиноятларга қарши курашиш департаменти туман бўлими томонидан мунтазам назорат қилинмоқда.

Янги йил! Бу байрамни барча ёшдаги одамлар ўзгача қувонч, эзгу орзулар оғушида қарши олади, тўкин дастурхон атрофида кириб келаётган йилнинг хайрли бўлишини, эл тинч-омонлигини тилаб дуолар қилинади. Озиқ-овқат маҳсулотлари ярмаркалари юртдошларимизнинг байрам қувончига қувонч қўшиши аниқ. Ярмарка фаолияти 2021 йилнинг 10 январигача давом этади.

Ойгул РАЖАБОВА.