Давлат хизматлари марказлари ташкил қилинганига 3 йил тўлди

Ўзбекистон Республикаси Президентининг 2017 йил 12 декабрдаги Фармонига мувофиқ Ўзбекистон Республикаси Адлия вазирлиги ҳузуридаги Давлат хизматлари Агентлиги ташкил қилинган эди.

Ўтган қисқа вақт ичида аҳолига давлат хизматлари кўрсатиш тизими изчил ва тизимли равишда ислоҳ қилинмоқда ҳамда такомиллаштирилиб борилмоқда. Ҳар бир туман ва шаҳарда аҳолига давлат хизматлари кўрсатишни замон талаблари даражасига етказиш мақсадида замонавий технологиялар билан жиҳозланган хизмат кўрсатиш бинолари қурилиб, фойдаланишга топширилаётгани давлат хизматларидан фойдаланиш учун мурожаат этувчи аҳоли ва тадбиркорлар учун қулайлик яратмоқда. Шу боис, кўрсатилаётган хизматлар сони ошиб, аҳолининг давлат органларига нисбатан ишончи мустаҳкамланиб бормоқда.

Соҳага сўнгги жорий қилинган хизматлар ичида – жисмоний шахслар томонидан СТИР олиш, судланмаганлик ҳолати тўғрисида маълумотнома олиш  хизматларидан фойдаланаётган аҳоли  миннатдор бўлмоқда. Шунингдек, хизмат олувчиларга қулайлик яратиш мақсадида Марказларда иш вақти 20:00гача узайтирилди.

Аҳолига кенг турда хизмат кўрсатилаётган ушбу Агентлик ташкил қилинган сана муносабати билан Амударё тумани Давлат хизматлари марказида байрам тадбири ўтказилди. Тадбирда марказга ташриф буюрган фуқаролар яхши кайфиятда кутиб олиниб, очиқ дастурхонга таклиф этилди.

Шунингдек, тадбирда фуқароларга Агентлик томонидан тайёрланган байрам совғалари тақдим қилинди. Бу каби тадбирдан фуқаролар янада мамнун бўлишди.

Мамлакатимизда Давлат хизматлари марказлари ташкил қилинганига кўп вақт бўлгани йўқ. Лекин ўтган қисқа вақт – 3 йил ичида марказлар орқали кўрсатиладиган давлат хизматлари сони бир неча мартага кўпайди.

  Бундан ташқари, ҳар бир туманда марказларнинг янги бинолари қурилиши режалаштирилган бўлиб, ўтган давр мобайнида бир қанча Давлат хизматлари марказларининг янги бинолари фойдаланишга топширилди. Туманимизда ҳам Давлат хизматлари маркази биноси янгидан бунёд этилди. Бу билан аҳолига намунали хизмат кўрсатиш имконияти яратилди.

Шуни алоҳида эътироф этиш керакки, Давлат хизматлари марказлари томонидан давлат хизматлари кўрсатиш соҳасига энг замонавий услуб ва янгиликлар жорий килинмоқда. Марказлар ўз фаолиятини тадбиркорлик субьектларига давлат хизматлари кўрсатишдан бошлаган бўлса, ҳозирги кунга келиб, жисмоний ва юридик шахсларга 100дан ортиқ давлат хизматлари кўрсатиб келинмоқда.

Сана муносабати билан 64-сонли умумтаълим мактаби ўқувчиларининг устозлари раҳбарлигида марказга саёҳат ҳам ташкил этилди. Маркази мутахассислари ўқувчиларга марказ фаолияти, давлат хизматларидан электрон шаклда фойдаланиш қоидалари  ҳақида тушунтириш бердилар.

Давлат хизматлари марказига саёҳат давомида ўқувчи-ёшлар ҳужжатларнинг электрон шаклларини тайёрлаш, умумтаълим мактабларини тугатгандан сўнг олий таълим муассасаларига ўз ҳужжатларини электрон усулда топшириш, шунингдек, бу жараёнда талаб қилинадиган ҳужжатларнинг турлари ҳақидаги саволларига Марказ ходимлари томонидан тўлиқ жавоб олдилар.

Давлат хизматлари маркази ташкил топган сана Марказ ходимлари, аҳоли вакиллари ва ёшлар иштирокида кенг нишонланди. Халққа қулай, тезкор, шаффоф ва сифатли давлат хизмат кўрсатаётган ходимлар учун ҳам 12 декабрь санаси эсда қоларли кун бўлди.

Р. Йўлдошева.