Davlat xizmatlari markazlari tashkil qilinganiga 3-yil toʻldi

Oʻzbekiston Respublikasi Prezidentining 2017-yil 12-dekabrdagi Farmoniga muvofiq Oʻzbekiston Respublikasi Adliya vazirligi huzuridagi Davlat xizmatlari Agentligi tashkil qilingan edi.

Oʻtgan qisqa vaqt ichida aholiga davlat xizmatlari koʻrsatish tizimi izchil va tizimli ravishda isloh qilinmoqda hamda takomillashtirilib borilmoqda. Har bir tuman va shaharda aholiga davlat xizmatlari koʻrsatishni zamon talablari darajasiga yetkazish maqsadida zamonaviy texnologiyalar bilan jihozlangan xizmat koʻrsatish binolari qurilib, foydalanishga topshirilayotgani davlat xizmatlaridan foydalanish uchun murojaat etuvchi aholi va tadbirkorlar uchun qulaylik yaratmoqda. Shu bois, koʻrsatilayotgan xizmatlar soni oshib, aholining davlat organlariga nisbatan ishonchi mustahkamlanib bormoqda.

Sohaga soʻnggi joriy qilingan xizmatlar ichida – jismoniy shaxslar tomonidan STIR olish, sudlanmaganlik holati toʻgʻrisida maʼlumotnoma olish  xizmatlaridan foydalanayotgan aholi  minnatdor boʻlmoqda. Shuningdek, xizmat oluvchilarga qulaylik yaratish maqsadida Markazlarda ish vaqti 20:00gacha uzaytirildi.

Aholiga keng turda xizmat koʻrsatilayotgan ushbu Agentlik tashkil qilingan sana munosabati bilan Amudaryo tumani Davlat xizmatlari markazida bayram tadbiri oʻtkazildi. Tadbirda markazga tashrif buyurgan fuqarolar yaxshi kayfiyatda kutib olinib, ochiq dasturxonga taklif etildi.

Shuningdek, tadbirda fuqarolarga Agentlik tomonidan tayyorlangan bayram sovgʻalari taqdim qilindi. Bu kabi tadbirdan fuqarolar yanada mamnun boʻlishdi.

Mamlakatimizda Davlat xizmatlari markazlari tashkil qilinganiga koʻp vaqt boʻlgani yoʻq. Lekin oʻtgan qisqa vaqt – 3-yil ichida markazlar orqali koʻrsatiladigan davlat xizmatlari soni bir necha martaga koʻpaydi.

  Bundan tashqari, har bir tumanda markazlarning yangi binolari qurilishi rejalashtirilgan boʻlib, oʻtgan davr mobaynida bir qancha Davlat xizmatlari markazlarining yangi binolari foydalanishga topshirildi. Tumanimizda ham Davlat xizmatlari markazi binosi yangidan bunyod etildi. Bu bilan aholiga namunali xizmat koʻrsatish imkoniyati yaratildi.

Shuni alohida eʼtirof etish kerakki, Davlat xizmatlari markazlari tomonidan davlat xizmatlari koʻrsatish sohasiga eng zamonaviy uslub va yangiliklar joriy kilinmoqda. Markazlar oʻz faoliyatini tadbirkorlik subektlariga davlat xizmatlari koʻrsatishdan boshlagan boʻlsa, hozirgi kunga kelib, jismoniy va yuridik shaxslarga 100dan ortiq davlat xizmatlari koʻrsatib kelinmoqda.

Sana munosabati bilan 64-sonli umumtaʼlim maktabi oʻquvchilarining ustozlari rahbarligida markazga sayohat ham tashkil etildi. Markazi mutaxassislari oʻquvchilarga markaz faoliyati, davlat xizmatlaridan elektron shaklda foydalanish qoidalari  haqida tushuntirish berdilar.

Davlat xizmatlari markaziga sayohat davomida oʻquvchi-yoshlar hujjatlarning elektron shakllarini tayyorlash, umumtaʼlim maktablarini tugatgandan soʻng oliy taʼlim muassasalariga oʻz hujjatlarini elektron usulda topshirish, shuningdek, bu jarayonda talab qilinadigan hujjatlarning turlari haqidagi savollariga Markaz xodimlari tomonidan toʻliq javob oldilar.

Davlat xizmatlari markazi tashkil topgan sana Markaz xodimlari, aholi vakillari va yoshlar ishtirokida keng nishonlandi. Xalqqa qulay, tezkor, shaffof va sifatli davlat xizmat koʻrsatayotgan xodimlar uchun ham 12-dekabr sanasi esda qolarli kun boʻldi.

R. Yoʻldosheva.