КУЮК КЎПИР ОВУЛИДА АВТОМОБИЛЛАРГА МЕТАН ГАЗ ҚУЙИШ ШОҲОБЧАСИ ИШ БОШЛАДИ

“Автомобилларни газ билан тўлдириш компрессор станциялари тармоғини ривожлантириш ва автотранспорт воситаларини сиқилган табиий газга босқичли ўтказиш, ҳамда уларда газбаллон асбоб-ускуналарини хавфсиз ишлатишни таъминлаш қўшимча чора-тадбирлари тўғрисида” Ўзбекистон Республикаси Вазирлар Маҳкамасининг 2017 йил 11 октябрда қабул қилган қарори автотранспорт воситаларини экологик хавфсиз ёқилғи тури билан таъминлаш, уларда сиқилган табиий газ баллонларининг хавфсиз ишлатилишига эришиш  борасида муҳим қадам бўлаётир.

Қарорга  мувофиқ, хавфсизлик қоидаларига тўла риоя этилган ҳолда қурилган автотранспортларга сиқилган газ қуйиш шохобчалари сони кўпайди. Бу ўз навбатида автотранспорт воситалари ҳайдовчилари учун жуда яхши қулайлик бўлмоқда.

Куюк кўпир овулида фаолият юритаётган “Бунёдбек-Аминбой” масъулияти чекланган жамиятида 2011 йилда бунёд этилган автомобилларга ёқилғи қуйиш шохобчасида фақат бензин сотилар эди. Ўзбекистон Республикаси Вазирлар Маҳкамасининг 815-сонли қарорига мувофиқ, 2016 йилдан пропан сиқилган газ қуйиш  шохобчаси қурилиши ҳам бошланиб, 2017 йилда ишга туширилган эди.

Жорий йилнинг 4 декабридан бошлаб, аҳоли эҳтиёжига кўра автотранспорт воситаларига метан сиқилган гази қуйиш шохобчаси ҳам ишга туширилди. Бунинг учун масъулияти чекланган жамият раиси Гулмирза Мамутов “Халқ банки”нинг  туман филиалидан 3 миллиард 850 миллион сўмга тенг  хорижий валютада кредит олди ва ушбу шохобчанинг қурилиш ишларига сарф этди.

Янгидан иш бошлаган шохобчани бунёд этиш учун трубалар Нукус полимер заводидан, асосий  қурилма Хитойдан, колонкалари эса Кореядан келтирилди ва етук  мутахассис қурувчилар қурилиш ишларига жалб этилди. Шохобча учун табиий газ Манғит-1 газ тақсимлаш станциясидан тортиб келинди.

Метан газ қуйиш асбоб-ускуналари хавфсизлик қоидаларига риоя  қилинган ҳолда ўрнатилди ва айни пайтда аҳолига хизмат кўрсата бошлади. Бу билан “Бунёдбек-Аминбой” масъулияти чекланган жамиятида  янгидан 15 та ишчи ўрин яратилди ва ишсиз фуқаролар доимий ишга жойлашди. Эндиликда ҳудуд аҳолиси транспорт воситаларига ёқилғи қуйиш учун бошқа ҳудудларга бориб, овора бўлиб юришига ҳожат қолмади. Шунинг учун ҳам  ушбу объектнинг ишга туширилиши  кўпчилик учун қувонарли бўлди.

Шохобчанинг ишга туширилиши худди байрам тусини олди. Унда иштирок этган  масъуллар янги иш бошлаётган тадбиркорга  муваффақиятлар, халқимизга хизмат кўрсатишда толмас куч-ғайрат тиладилар.

Туманимизнинг қайси бир ҳудудига борманг,  деярли ҳамма хонадонларда турли  русумдаги автомобиллар бор. Бироқ, узоғимизни яқин, оғиримизни енгил қиладиган машиналарга ёқилғи қуйиш учун соатлаб, баъзан ярим суткалаб навбат кутган вақтларни кўпчилик яхши эслашади. Ҳозирги кунда эса тобора кўпаяётган ёқилғи қуйиш шохобчаларининг автотранспорт ҳайдовчиларига қулай шароитларда тезкор хизмат кўрсатиши натижасида, вақтини  тежашга, сарсонликнинг олдини олишга муваффақ бўлишаяпти.

Қувонарлиси, булар – халқимиз турмуш фаровонлиги ошаётганидан, тадбиркорлик қўллаб-қувватланаётганидан дарак.

О.РАЖАБОВА.