KUYuK KOʻPIR OVULIDA AVTOMOBILLARGA METAN GAZ QUYISh ShOHOBChASI ISh BOShLADI
“Avtomobillarni gaz bilan toʻldirish kompressor stantsiyalari tarmogʻini rivojlantirish va avtotransport vositalarini siqilgan tabiiy gazga bosqichli oʻtkazish, hamda ularda gazballon asbob-uskunalarini xavfsiz ishlatishni taʼminlash qoʻshimcha chora-tadbirlari toʻgʻrisida” Oʻzbekiston Respublikasi Vazirlar Mahkamasining 2017-yil 11-oktyabrda qabul qilgan qarori avtotransport vositalarini ekologik xavfsiz yoqilgʻi turi bilan taʼminlash, ularda siqilgan tabiiy gaz ballonlarining xavfsiz ishlatilishiga erishish borasida muhim qadam boʻlayotir.
Qarorga muvofiq, xavfsizlik qoidalariga toʻla rioya etilgan holda qurilgan avtotransportlarga siqilgan gaz quyish shoxobchalari soni koʻpaydi. Bu oʻz navbatida avtotransport vositalari haydovchilari uchun juda yaxshi qulaylik boʻlmoqda.
Kuyuk koʻpir ovulida faoliyat yuritayotgan “Bunyodbek-Aminboy” masʼuliyati cheklangan jamiyatida 2011-yilda bunyod etilgan avtomobillarga yoqilgʻi quyish shoxobchasida faqat benzin sotilar edi. Oʻzbekiston Respublikasi Vazirlar Mahkamasining 815-sonli qaroriga muvofiq, 2016-yildan propan siqilgan gaz quyish shoxobchasi qurilishi ham boshlanib, 2017-yilda ishga tushirilgan edi.
Joriy yilning 4-dekabridan boshlab, aholi ehtiyojiga koʻra avtotransport vositalariga metan siqilgan gazi quyish shoxobchasi ham ishga tushirildi. Buning uchun masʼuliyati cheklangan jamiyat raisi Gulmirza Mamutov “Xalq banki”ning tuman filialidan 3 milliard 850 million soʻmga teng xorijiy valyutada kredit oldi va ushbu shoxobchaning qurilish ishlariga sarf etdi.
Yangidan ish boshlagan shoxobchani bunyod etish uchun trubalar Nukus polimer zavodidan, asosiy qurilma Xitoydan, kolonkalari esa Koreyadan keltirildi va yetuk mutaxassis quruvchilar qurilish ishlariga jalb etildi. Shoxobcha uchun tabiiy gaz Mangʻit-1 gaz taqsimlash stantsiyasidan tortib kelindi.
Metan gaz quyish asbob-uskunalari xavfsizlik qoidalariga rioya qilingan holda oʻrnatildi va ayni paytda aholiga xizmat koʻrsata boshladi. Bu bilan “Bunyodbek-Aminboy” masʼuliyati cheklangan jamiyatida yangidan 15 ta ishchi oʻrin yaratildi va ishsiz fuqarolar doimiy ishga joylashdi. Endilikda hudud aholisi transport vositalariga yoqilgʻi quyish uchun boshqa hududlarga borib, ovora boʻlib yurishiga hojat qolmadi. Shuning uchun ham ushbu obʼektning ishga tushirilishi koʻpchilik uchun quvonarli boʻldi.
Shoxobchaning ishga tushirilishi xuddi bayram tusini oldi. Unda ishtirok etgan masʼullar yangi ish boshlayotgan tadbirkorga muvaffaqiyatlar, xalqimizga xizmat koʻrsatishda tolmas kuch-gʻayrat tiladilar.
Tumanimizning qaysi bir hududiga bormang, deyarli hamma xonadonlarda turli rusumdagi avtomobillar bor. Biroq, uzogʻimizni yaqin, ogʻirimizni yengil qiladigan mashinalarga yoqilgʻi quyish uchun soatlab, baʼzan yarim sutkalab navbat kutgan vaqtlarni koʻpchilik yaxshi eslashadi. Hozirgi kunda esa tobora koʻpayayotgan yoqilgʻi quyish shoxobchalarining avtotransport haydovchilariga qulay sharoitlarda tezkor xizmat koʻrsatishi natijasida, vaqtini tejashga, sarsonlikning oldini olishga muvaffaq boʻlishayapti.
Quvonarlisi, bular – xalqimiz turmush farovonligi oshayotganidan, tadbirkorlik qoʻllab-quvvatlanayotganidan darak.
O.RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
