БОЛАЖОНЛАР КОНСТИТУЦИЯМИЗНИНГ 28 ЙИЛЛИГИНИ БАЙРАМ ҚИЛДИЛАР

Мамлакатимизда байрамлар кўп. Бири-биридан гўзал, бетакрор байрамлар барчага, шу баробарида жажжи болажонларга олам-олам завқ бағишлайди. Шу боис, декабрь ойининг илк кунлариданоқ  туманимиздаги барча умумтаълим мактабларида, мактабгача таълим ташкилотларида 8 декабрь – Ўзбекистон Республикаси Конституцияси қабул қилинганлигининг 28 йиллигига бағишланган маданий-маърифий тадбирлар, давра суҳбатлари, адабий-бадиий  мусиқий кечалар бошланиб кетди.

Ана шундай тадбирлардан бири 3-сонли МТТда  ҳам кўтаринки руҳда ўтказилди. “Конституциямиз – бахтимиз Қомуси” деб номланган мазкур маънавий-маърифий тадбирда МТТ тарбияланувчилари, уларнинг ота-оналари ҳам педагог-тарбиячилар иштирок этишди.

Шуни алоҳида эътироф этиш керакки, тадбирда Конституциямизнинг  халқимиз, айниқса, мурғак болажонлар ҳаётида  тутган ўрни, ундаги ҳар бир модданинг мазмун-моҳиятини мурғак болажонлар онгига сингдириш мақсадида оналик ва болаликни муҳофаза этиш, бахтиёр болалик, уларнинг вояга етиши, ўқиши, яхши шароитларда яшаши, келажаги ҳақидаги давлатимизнинг беқиёс ғамхўрлигини болажонларнинг ўз оилавий ҳаёти ҳамда яратилган  шарт-шароитлар мисолида тарбиячи-боғча  опалари томонидан тушунтириб берилди.

Ўз навбатида болажонлар ҳам тарбиячи-боғча опалари ёрдамида ёдлаган она Ватанни, ота-онани, дўстлик ва тинчликни мадҳ этувчи шеър ва қўшиқларини ижро этишди. Конституциямизнинг бола ҳуқуқларига оид моддаларини тараннум этувчи  шеърлар ўқишиб, тадбир иштирокчилари бўлган ота-оналарига фахр ва қувонч бағишладилар.

Тадбирда болажонлар томонидан ватанпарварлик, она табиат, дўстлик мавзуларидаги болажонлар солган суратлар ҳам намойиш этилди. Айниқса, миллатлараро тотувликни ўзида мужассам этган болажонларнинг қувноқ рақслари барчага манзур бўлди.

Байрам тадбирида туман Мактабгача таълим ташкилоти бўлими услубчилари Нодира Тожимуродова ҳамда Нафиса Ўрозметовалар иштирок этишиб, болажонларни Конституциямизнинг 28 йиллиги байрами билан табриклашди. Болажонларнинг келажакда билимдон, она Ватанга муносиб фарзандлар бўлиб вояга етишларида эзгу тилаклар тилашди.

Байрам тадбирини тайёрлашда тарбиячи-педагоглар Манзура Аллақулова, Саида Аллаберганова, Светлана Ўтабоева, Латофат Жумамуродова, Нодира Ўтабоева, Нафиса Абдуллаева, Саида Искандарова, Ирода Ибодуллаевалар ҳамкорликда иш олиб боришди. Байрамни катта шодиёналик билан, ҳамжиҳатликда нишонлаш мақсадида болажонлар билан биргаликда муассаса залини безатишди. Кичкинтойларнинг ўз қўллари билан ясаган пластилин ўйинчоқлар, ранг-баранг гуллар ва шарлар, эртак қаҳрамонлари акс эттирилган расмлар кўргазмаси ташкил этилгани байрамга янада ўзгача шукуҳ бағишлади.

“Конституциямиз – бахтимиз Қомуси” деб номланган мазкур байрам тадбири якунида бирдамлик, тинчлик ва дўстлик ҳамда ватанпарварликни мадҳ этувчи куй-қўшиқлар янгради. Болажонлар ота-оналари, тарбиячи-боғча опалари билан биргаликда жўр бўлиб, қўшиқ куйладилар ва рақсга тушдилар.

Муяссар ХАЛИЛЛАЕВА.