BOLAJONLAR KONSTITUTsIYaMIZNING 28 YILLIGINI BAYRAM QILDILAR

Mamlakatimizda bayramlar koʻp. Biri-biridan goʻzal, betakror bayramlar barchaga, shu barobarida jajji bolajonlarga olam-olam zavq bagʻishlaydi. Shu bois, dekabr oyining ilk kunlaridanoq  tumanimizdagi barcha umumtaʼlim maktablarida, maktabgacha taʼlim tashkilotlarida 8-dekabr – Oʻzbekiston Respublikasi Konstitutsiyasi qabul qilinganligining 28 yilligiga bagʻishlangan madaniy-maʼrifiy tadbirlar, davra suhbatlari, adabiy-badiiy  musiqiy kechalar boshlanib ketdi.

Ana shunday tadbirlardan biri 3-sonli MTTda  ham koʻtarinki ruhda oʻtkazildi. “Konstitutsiyamiz – baxtimiz Qomusi” deb nomlangan mazkur maʼnaviy-maʼrifiy tadbirda MTT tarbiyalanuvchilari, ularning ota-onalari ham pedagog-tarbiyachilar ishtirok etishdi.

Shuni alohida eʼtirof etish kerakki, tadbirda Konstitutsiyamizning  xalqimiz, ayniqsa, murgʻak bolajonlar hayotida  tutgan oʻrni, undagi har bir moddaning mazmun-mohiyatini murgʻak bolajonlar ongiga singdirish maqsadida onalik va bolalikni muhofaza etish, baxtiyor bolalik, ularning voyaga yetishi, oʻqishi, yaxshi sharoitlarda yashashi, kelajagi haqidagi davlatimizning beqiyos gʻamxoʻrligini bolajonlarning oʻz oilaviy hayoti hamda yaratilgan  shart-sharoitlar misolida tarbiyachi-bogʻcha  opalari tomonidan tushuntirib berildi.

Oʻz navbatida bolajonlar ham tarbiyachi-bogʻcha opalari yordamida yodlagan ona Vatanni, ota-onani, doʻstlik va tinchlikni madh etuvchi sheʼr va qoʻshiqlarini ijro etishdi. Konstitutsiyamizning bola huquqlariga oid moddalarini tarannum etuvchi  sheʼrlar oʻqishib, tadbir ishtirokchilari boʻlgan ota-onalariga faxr va quvonch bagʻishladilar.

Tadbirda bolajonlar tomonidan vatanparvarlik, ona tabiat, doʻstlik mavzularidagi bolajonlar solgan suratlar ham namoyish etildi. Ayniqsa, millatlararo totuvlikni oʻzida mujassam etgan bolajonlarning quvnoq raqslari barchaga manzur boʻldi.

Bayram tadbirida tuman Maktabgacha taʼlim tashkiloti boʻlimi uslubchilari Nodira Tojimurodova hamda Nafisa Oʻrozmetovalar ishtirok etishib, bolajonlarni Konstitutsiyamizning 28 yilligi bayrami bilan tabriklashdi. Bolajonlarning kelajakda bilimdon, ona Vatanga munosib farzandlar boʻlib voyaga yetishlarida ezgu tilaklar tilashdi.

Bayram tadbirini tayyorlashda tarbiyachi-pedagoglar Manzura Allaqulova, Saida Allaberganova, Svetlana Oʻtaboyeva, Latofat Jumamurodova, Nodira Oʻtaboyeva, Nafisa Abdullayeva, Saida Iskandarova, Iroda Ibodullayevalar hamkorlikda ish olib borishdi. Bayramni katta shodiyonalik bilan, hamjihatlikda nishonlash maqsadida bolajonlar bilan birgalikda muassasa zalini bezatishdi. Kichkintoylarning oʻz qoʻllari bilan yasagan plastilin oʻyinchoqlar, rang-barang gullar va sharlar, ertak qahramonlari aks ettirilgan rasmlar koʻrgazmasi tashkil etilgani bayramga yanada oʻzgacha shukuh bagʻishladi.

“Konstitutsiyamiz – baxtimiz Qomusi” deb nomlangan mazkur bayram tadbiri yakunida birdamlik, tinchlik va doʻstlik hamda vatanparvarlikni madh etuvchi kuy-qoʻshiqlar yangradi. Bolajonlar ota-onalari, tarbiyachi-bogʻcha opalari bilan birgalikda joʻr boʻlib, qoʻshiq kuyladilar va raqsga tushdilar.

Muyassar XALILLAYeVA.