Ноябрь – хорижий тиллар фан ойлиги

Ҳар йили 36-сонли умумтаълим мактабида  умумтаълим фанлари ойликлари катта таассуротлар билан, жуда қизиқарли ўтади. “Ноябрь – хорижий тиллар фан ойлиги” доирасидаги тадбирлар ҳам бир ой давомида мактаб ўқувчилари учун янада қизиқарли дарс-машғулотлар, синфлараро беллашувлар, билимдонлар баҳслари орқали бири-биридан завқли лаҳзаларга бой тарзда ўтди.

Фан ойлиги доирасидаги тадбирлар ва дарс-машғулотларда ўқувчилар инглиз ва рус тилларида диктантлар, иншолар ёзишди. Кроссворд ва тестлар ечишди, хориж ёзувчиларининг асарларини ўқиб, шеърлар ёдлашди. Ҳар доимгидан кўпроқ амалий машқлар бажаришди. Мактабнинг ёш, истеъдодли рассомлари “Золотая осень” мавзусида  пейзаж жанридаги расмларни чизишди. Хорижий тиллар ўқитувчилари Нодира Солиева, Зоҳида Бекмуродова, Раъно Аҳмедова, Насиба Аҳмедова, Муҳаббат Турсунбоева, Хосият Ражабова, Райҳон Ўрозбоева, Замира Отажонова, Дилдор  Холменова, Дилнура Бобониёзова, Шаҳло Искандарова, Моҳирахон Эгамберганова ҳамда Мадинахон Файзуллаевалар  мактабда “Хорижий тиллар фан ойлиги”нинг муваффақиятли ўтишини таъминладилар. Ўқувчиларнинг рус ва инглиз тилларини пухта ўзлаштиришларини таъминлаш мақсадида амалга оширилган барча тадбирларга бош-қош бўлдилар.

Жорий йилнинг 21 ноябрь санасида фан ойлигининг якуний босқичига бағишланган байрамона тадбир ўтказилиб, унда фан ойлиги давомида амалга оширилган барча амалий машғулотлар, очиқ дарслар, турли мавзулардаги кўрик-танловлар, адабий-маърифий ҳамда мусиқий кечалар, семинар-тренинглар умумлаштирилди. Яъни, учта тилда, хорижий тиллар ўқитувчилари томонидан тайёрланган сценарий асосида фан ойлигининг якуний босқичи ўтказилди.

Тадбирни мактабимизнинг энг билимдон ўқувчилари, фанлар олимпиадалари ва билимлар беллашуви танловларининг фаол иштирокчилари Ф.Ҳабиева ўзбек, Ш.Ибодуллаева рус, К.Қўчқорова инглиз тилларида моҳирлик билан бошқаришди. Мактаб директорининг ўқув-тарбиявий ишлари бўйича ўринбосари С.Қутлимуродов ҳамда маънавий-маърифий масалалар бўйича директор ўринбосари Б.Хўжамуродовлар мактабда “Хорижий тиллар фан ойлиги” муваффақиятли ўтгани билан барчани табрикладилар.

Тадбирни 3-«А» синф ўқувчилари ўзларининг қувноқ рус халқ рақслари билан бошлаб беришди. 1-синф ўқувчиси Н.Янгибоев эса инглиз тилида шеър ўқиди.

Тадбир давомида 11-синф ўқувчиси З.Шарипова буюк рус ёзувчиси М.Горькийнинг ҳаёти ва ижоди ҳақида ёддан, эркин ҳикоя қилди. Унинг М.Горький ижоди ва фаолиятини пухта ўрганиб, соф рус тилида, ҳеч бир хатосиз ҳикоя қилганидан барча мамнун бўлди. Шунингдек, 10-синф ўқувчиси А.Жадигерова К.Симоновнинг  “Жди меня” шеърини ниҳоятда таъсирли қилиб ёддан айтиб берди.

Ўқувчи-ёшлардан Д.Раҳимбоева эса Сергей Есениннинг таржимаи ҳолини М.Раҳимбоева эса А.С.Пушкиннинг “Узник” шеърини жуда чиройли ўқиб беришди.

Бундан ташқари, 5-синф ўқувчилари ижросидаги  “Катюша” рақси, 4-синф ўғил болалари талқинидаги ўзбек мумтоз ашуласининг инглиз тилида янграгани барчада фахрланиш туйғусини уйғотди. Кичкинтойлар ижросидаги масхарабозлик ўйинлари, 5-синф ўқувчилари талқинидаги “Дружба”, 6-синф ўқувчилари маҳорат билан ижро этган “Ты морячка – я моряк”, 8-синф ўқувчилари ижросидаги инглизча рақслар, айниқса, 6-синф ўқувчиси Р.Байназаров ижросидаги замонавий рақс, 8-синф қизлари талқинидаги “Selena gomez” инглизча рақс, рассом қизларимиз томонидан ижод этилган куз манзараларини акс эттирувчи расмлар намойиши тадбирга ажойиб, бетакрор файз бағишлади.

Тинчлик, бахт-саодат, эзгуликни, дўстликни ўзида мужассам этиб,  ҳилпираб турган Ўзбекистон байроғи остида ниҳоясига етган “Хорижий тиллар фан ойлиги” доирасидаги тадбирларимизнинг якуний босқичи барчага олам-олам завқ бағишлади. Ўқувчиларнинг хорижий тилларни ўрганишга бўлган ихлосини янада ошириб, бу боради билим ва кўникмалари мустаҳкамланди.

Тадбир якунида мактаб директори Қ.Нуримбетов фаол ўқувчиларга фахрий ёрлиқлар топширди.

Насиба Аҳмедова, 36-сонли мактабнинг рус тили ва адабиёт фани ўқитувчиси.