Пахтачиликда ҳал қилувчи палла: “Долзарб 30 кун” ойлиги доирасида семинар ўтказилди
Мамлакатимиз қишлоқ хўжалигининг етакчи тармоғи бўлган пахтачиликда айни кунларда энг масъулиятли ва ҳал қилувчи палла давом этмоқда. Ҳосил тақдирини белгиловчи ушбу муҳим даврда юртимиз бўйлаб “Пахтачиликда долзарб 30 кун” ойлиги уюшқоқлик билан ўтказилмоқда. Мазкур ойлик доирасида Ўзбекистон Республикаси Қишлоқ хўжалиги вазири ташаббуси билан жорий йилнинг июль-август ойлари мобайнида биринчи навбатда амалга ошириладиган тизимли агротехник тадбирлар режаси ишлаб чиқилган бўлиб, у дала меҳнаткашлари учун ўзига хос йўл харитаси вазифасини бажармоқда. Айни жазирама ёз фаслида, ғўза ривожининг энг муҳим палласида амалга ошириладиган ушбу агротехник тадбирлар келгуси ҳосил тақдирини ҳал қилувчи асосий омилдир.
Мазкур илмий асосланган кечиктириб бўлмас агротехник тадбирлар шунчаки қоғоздаги кўрсатмалар эмас, балки кўп йиллик тажриба ва илм-фан ютуқларига таянган муҳим амалий қўлланмадир. Асосий мақсад – ғўза ривожини жадаллаштириш, зараркунандаларга қарши тизимли курашиш, сув ресурсларидан оқилона фойдаланиш ҳамда озиқлантириш ишларини тўғри йўлга қўйишдан иборат.
Албатта, ҳар қандай пухта ишланган дастур бевосита даланинг ўзида, деҳқоннинг қўли билан амалиётга жорий этилгандагина кутилган натижани беради. Айнан мана шу мақсадни кўзлаган ҳолда, жойларда кўргазмали дала семинарлари, ўқув-амалий машғулотлари ўтказилмоқда. Хусусан, Қорақалпоғистон Республикасининг қишлоқ хўжалигида улкан салоҳиятга эга бўлган ҳудудларидан бири – Амударё туманида ҳам бу борада салмоқли ишлар амалга оширилмоқда.
Дўрман овули ҳудудида фаолият юритаётган “Камоладдин Бекниёз” фермер хўжалигининг 12 гектарлик пахта майдонида ушбу долзар масалаларга бағишланган кўргазмали семинар ташкил қилинди. Мазкур тадбир шунчаки йиғилиш эмас, балки ҳақиқий тажриба алмашиш, илм ва амалиётни бирлаштириш майдонига айланди. Даланинг ўзида ўтган ушбу мулоқотга ҳудуддаги пахта-тўқимачилик кластерлари ва фермер хўжаликлари раҳбарлари, шунингдек, тажрибали агрономлар жалб этилди. “Долзарб 30 кун” тадбирлари доирасида белгиланган барча муҳим агротехник тадбирларнинг туб моҳияти, уларнинг ҳосилдорликни оширишдаги ўрни ва аҳамияти бевосита ер эгаларига, дала меҳнаткашларига батафсил тушунтириб берилди.
Семинарда Пахтачилик кенгашининг Қорақалпоғистон Республикаси туманларига бириктирилган вакиллари, илмий-тадқиқот институтларининг етук олимлари ва Қорақалпоғистон Республикаси агрохизматлар марказининг малакали ходимлари ҳам иштирок этишди. Семинарда Амударё тумани ҳокими Собир Хўжаметов туманда қишлоқ хўжалиги соҳасида фаолият юритаётган барча дахлдор ташкилотларнинг раҳбарлари ва фермерларга пахтадан мўл ҳосил олиш мақсадида июль-август ойларида амалга оширилиши лозим бўлган устувор масалалар бўйича топшириқ ва тавсиялар берди.
Мутахассисларнинг йўриқномалари, олимларнинг тавсиялари ва деҳқонларнинг кўп йиллик ҳаётий тажрибаси бир жойда уйғунлашган бундай кўргазмали тадбирлар шубҳасиз келгусида ўз мевасини беради. Мавсумнинг ҳар бир кунини ғанимат билиб, эрта тонгдон то қоронғугача далада тер тўкаётган деҳқон ва фермерларимизнинг машаққатли меҳнати тез орада юксак хирмонларда ўз аксини топади. Зеро, бугун далада тўғри ва ўз вақтида қилинган ҳар бир агротехник ҳаракат – эртанги мўл ҳосил, фаровонлик ва иқтисодий барқарорликнинг мустаҳкам кафолатидир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
