Paxtachilikda hal qiluvchi palla: “Dolzarb 30 kun” oyligi doirasida seminar oʻtkazildi

Mamlakatimiz qishloq xoʻjaligining yetakchi tarmogʻi boʻlgan paxtachilikda ayni kunlarda eng masʼuliyatli va hal qiluvchi palla davom etmoqda. Hosil taqdirini belgilovchi ushbu muhim davrda yurtimiz boʻylab “Paxtachilikda dolzarb 30 kun” oyligi uyushqoqlik bilan oʻtkazilmoqda. Mazkur oylik doirasida Oʻzbekiston Respublikasi Qishloq xoʻjaligi vaziri tashabbusi bilan joriy yilning iyul-avgust oylari mobaynida birinchi navbatda amalga oshiriladigan tizimli agrotexnik tadbirlar rejasi ishlab chiqilgan boʻlib, u dala mehnatkashlari uchun oʻziga xos yoʻl xaritasi vazifasini bajarmoqda. Ayni jazirama yoz faslida, gʻoʻza rivojining eng muhim pallasida amalga oshiriladigan ushbu agrotexnik tadbirlar kelgusi hosil taqdirini hal qiluvchi asosiy omildir.

Mazkur ilmiy asoslangan kechiktirib boʻlmas agrotexnik tadbirlar shunchaki qogʻozdagi koʻrsatmalar emas, balki koʻp yillik tajriba va ilm-fan yutuqlariga tayangan muhim amaliy qoʻllanmadir. Asosiy maqsad – gʻoʻza rivojini jadallashtirish, zararkunandalarga qarshi tizimli kurashish, suv resurslaridan oqilona foydalanish hamda oziqlantirish ishlarini toʻgʻri yoʻlga qoʻyishdan iborat.

Albatta, har qanday puxta ishlangan dastur bevosita dalaning oʻzida, dehqonning qoʻli bilan amaliyotga joriy etilgandagina kutilgan natijani beradi. Aynan mana shu maqsadni koʻzlagan holda, joylarda koʻrgazmali dala seminarlari, oʻquv-amaliy mashgʻulotlari oʻtkazilmoqda. Xususan, Qoraqalpogʻiston Respublikasining qishloq xoʻjaligida ulkan salohiyatga ega boʻlgan hududlaridan biri – Amudaryo tumanida ham bu borada salmoqli ishlar amalga oshirilmoqda.

Doʻrman ovuli hududida faoliyat yuritayotgan “Kamoladdin Bekniyoz” fermer xoʻjaligining 12 gektarlik paxta maydonida ushbu dolzar masalalarga bagʻishlangan koʻrgazmali seminar tashkil qilindi. Mazkur tadbir shunchaki yigʻilish emas, balki haqiqiy tajriba almashish, ilm va amaliyotni birlashtirish maydoniga aylandi. Dalaning oʻzida oʻtgan ushbu muloqotga hududdagi paxta-toʻqimachilik klasterlari va fermer xoʻjaliklari rahbarlari, shuningdek, tajribali agronomlar jalb etildi. “Dolzarb 30 kun” tadbirlari doirasida belgilangan barcha muhim agrotexnik tadbirlarning tub mohiyati, ularning hosildorlikni oshirishdagi oʻrni va ahamiyati bevosita yer egalariga, dala mehnatkashlariga batafsil tushuntirib berildi.

Seminarda Paxtachilik kengashining Qoraqalpogʻiston Respublikasi tumanlariga biriktirilgan vakillari, ilmiy-tadqiqot institutlarining yetuk olimlari va Qoraqalpogʻiston Respublikasi agroxizmatlar markazining malakali xodimlari ham ishtirok etishdi. Seminarda Amudaryo tumani hokimi Sobir Xoʻjametov tumanda qishloq xoʻjaligi sohasida faoliyat yuritayotgan barcha daxldor tashkilotlarning rahbarlari va fermerlarga paxtadan moʻl hosil olish maqsadida iyul-avgust oylarida amalga oshirilishi lozim boʻlgan ustuvor masalalar boʻyicha topshiriq va tavsiyalar berdi.

Mutaxassislarning yoʻriqnomalari, olimlarning tavsiyalari va dehqonlarning koʻp yillik hayotiy tajribasi bir joyda uygʻunlashgan bunday koʻrgazmali tadbirlar shubhasiz kelgusida oʻz mevasini beradi. Mavsumning har bir kunini gʻanimat bilib, erta tongdon to qorongʻugacha dalada ter toʻkayotgan dehqon va fermerlarimizning mashaqqatli mehnati tez orada yuksak xirmonlarda oʻz aksini topadi. Zero, bugun dalada toʻgʻri va oʻz vaqtida qilingan har bir agrotexnik harakat – ertangi moʻl hosil, farovonlik va iqtisodiy barqarorlikning mustahkam kafolatidir.