“ХОРИЖИЙ ТИЛЛАР ФАН ОЙЛИГИ” ДОИРАСИДАГИ ТАДБИРЛАР ЎҚУВЧИЛАР БИЛИМИНИ ОШИРИШ ИМКОНИНИ БЕРМОҚДА

Пандемия сабабли ўрнатилгандан карантин юмшатилиб, анъанавий таълим тартибига ўтказилган умумтаълим мактабларида фан ойликларига бағишланган тадбирлар бошлаб юборилди. Бундай тадбирларнинг ўтказилиши ўқувчиларнинг дарс жараёнида олган билим, кўникмаларини фан ойлиги давомида янада мустаҳкамлаш, ривожлантириш имконини беради.

Туманимиздаги 13-сонли умумий ўрта таълим мактабида ҳам “Ноябрь – хорижий тиллар фан ойлиги” доирасида турли мавзуларда танловлар, очиқ дарслар, синфлараро беллашувлар, семинарлар ўтказилди. 9-синф ўқувчилари орасида ўтказилган “Француз тили билимдони” танловида Севинч Ражабова танловнинг барча йўналишларида ғолиб деб топилди. Ўқув-тарбия жараёнининг сифатини ошириш, хорижий тилларни ўқитишда қўлланилаётган замонавий услубларни таълим жараёнига татбиқ қилиш, синфдан ва мактабдан ташқари ишларнинг ўқув жараёни билан узвийлигини таъминлаш мақсадида турли мавзуларда семинар-тренинглар ўтказилди. Хусусан, инглиз тили фани ўқитувчиси Жаҳонгир Султонов инглиз тили дарсларида қўлланилаётган замонавий услубларнинг таълим сифатини оширишдаги роли ҳақида семинар-тренинг ўтказди.

Семинар-тренингда хорижий тилларни ўқитишда қўлланилаётган замонавий таълим услубларининг ўқувчилар билим сифатини оширишдаги муҳим ўрнига алоҳида урғу берилди. Бу услублар ўқувчиларнинг чет тилларни ўрганишга бўлган қизиқишини янада орттириши, уларнинг қобилиятларини юзага чиқариши, мустақил фикр юритишларига ундаши ҳақида фикрлар билдирилди.

“Ноябрь – хорижий тиллар фан ойлиги” доирасида мактабнинг инглиз тили фани ўқитувчиси Гўзал Жуманиёзова 1-3-синф ўқувчилари орасида “Инглиз тилини ўрганамиз” номли тадбир ўтказди. Тадбирда ўқувчилар дарс жараёнида олган билимлари асосида турли мавзуларда чиқишлар қилишди. Диалог, шеърлар, саҳна кўринишлари намойиш этишди. Француз тили фани ўқитувчиси Малика Шомуродова эса “Француз қўшиқлари” мусиқа фестивалини ўтказди. Бунда 5-9-синфлар ўқувчилари, тўгарак аъзолари томонидан француз тилида шеърлар, қўшиқлар, рақслар намойиш этилди.

“Ноябрь – хорижий тиллар фан ойлиги” доирасида ўтказилган тадбирларга мактабнинг барча  қуйи ва юқори синфлар ўқувчилари қамраб олиниб, уларнинг 1-чорак давомида хорижий тилларни қай даражада ўзлаштирганликлари тўлиқ ўз ифодасини топди. Албатта, бунда хорижий тиллар бўйича фан ўқитувчилари томонидан фан ойлиги  доирасида ўтказилган семинар-тренинглар, тажриба-алмашув машғулотлари, синфлараро беллашувлар ҳамда очиқ дарслар, турли мавзудаги танловлар муҳим аҳамиятга эга бўлди. Айниқса, француз тили ўқитувчиси Малика Шомуродова томонидан ташкиллаштирилган “Француз қўшиқлари” мусиқа фестивали, 9-синф ўқувчилари ўртасида ўтказилган “Француз тили билимдони” танлови ҳамда инглиз тили фани ўқитувчиси Жаҳонгир Султонов томонидан ўтказилган семинар-тренинг фан ойлигининг муваффақиятли ўтказилишини таъминлади.

Тадбирда фан ойлигида фаол қатнашган ўқувчилар фахрий ёрлиқлар билан тақдирланишди.

Муяссар ХАЛИЛЛАЕВА.