“XORIJIY TILLAR FAN OYLIGI” DOIRASIDAGI TADBIRLAR OʻQUVChILAR BILIMINI OShIRISh IMKONINI BERMOQDA

Pandemiya sababli oʻrnatilgandan karantin yumshatilib, anʼanaviy taʼlim tartibiga oʻtkazilgan umumtaʼlim maktablarida fan oyliklariga bagʻishlangan tadbirlar boshlab yuborildi. Bunday tadbirlarning oʻtkazilishi oʻquvchilarning dars jarayonida olgan bilim, koʻnikmalarini fan oyligi davomida yanada mustahkamlash, rivojlantirish imkonini beradi.

Tumanimizdagi 13-sonli umumiy oʻrta taʼlim maktabida ham “Noyabr – xorijiy tillar fan oyligi” doirasida turli mavzularda tanlovlar, ochiq darslar, sinflararo bellashuvlar, seminarlar oʻtkazildi. 9-sinf oʻquvchilari orasida oʻtkazilgan “Frantsuz tili bilimdoni” tanlovida Sevinch Rajabova tanlovning barcha yoʻnalishlarida gʻolib deb topildi. Oʻquv-tarbiya jarayonining sifatini oshirish, xorijiy tillarni oʻqitishda qoʻllanilayotgan zamonaviy uslublarni taʼlim jarayoniga tatbiq qilish, sinfdan va maktabdan tashqari ishlarning oʻquv jarayoni bilan uzviyligini taʼminlash maqsadida turli mavzularda seminar-treninglar oʻtkazildi. Xususan, ingliz tili fani oʻqituvchisi Jahongir Sultonov ingliz tili darslarida qoʻllanilayotgan zamonaviy uslublarning taʼlim sifatini oshirishdagi roli haqida seminar-trening oʻtkazdi.

Seminar-treningda xorijiy tillarni oʻqitishda qoʻllanilayotgan zamonaviy taʼlim uslublarining oʻquvchilar bilim sifatini oshirishdagi muhim oʻrniga alohida urgʻu berildi. Bu uslublar oʻquvchilarning chet tillarni oʻrganishga boʻlgan qiziqishini yanada orttirishi, ularning qobiliyatlarini yuzaga chiqarishi, mustaqil fikr yuritishlariga undashi haqida fikrlar bildirildi.

“Noyabr – xorijiy tillar fan oyligi” doirasida maktabning ingliz tili fani oʻqituvchisi Goʻzal Jumaniyozova 1-3-sinf oʻquvchilari orasida “Ingliz tilini oʻrganamiz” nomli tadbir oʻtkazdi. Tadbirda oʻquvchilar dars jarayonida olgan bilimlari asosida turli mavzularda chiqishlar qilishdi. Dialog, sheʼrlar, sahna koʻrinishlari namoyish etishdi. Frantsuz tili fani oʻqituvchisi Malika Shomurodova esa “Frantsuz qoʻshiqlari” musiqa festivalini oʻtkazdi. Bunda 5-9-sinflar oʻquvchilari, toʻgarak aʼzolari tomonidan frantsuz tilida sheʼrlar, qoʻshiqlar, raqslar namoyish etildi.

“Noyabr – xorijiy tillar fan oyligi” doirasida oʻtkazilgan tadbirlarga maktabning barcha  quyi va yuqori sinflar oʻquvchilari qamrab olinib, ularning 1-chorak davomida xorijiy tillarni qay darajada oʻzlashtirganliklari toʻliq oʻz ifodasini topdi. Albatta, bunda xorijiy tillar boʻyicha fan oʻqituvchilari tomonidan fan oyligi  doirasida oʻtkazilgan seminar-treninglar, tajriba-almashuv mashgʻulotlari, sinflararo bellashuvlar hamda ochiq darslar, turli mavzudagi tanlovlar muhim ahamiyatga ega boʻldi. Ayniqsa, frantsuz tili oʻqituvchisi Malika Shomurodova tomonidan tashkillashtirilgan “Frantsuz qoʻshiqlari” musiqa festivali, 9-sinf oʻquvchilari oʻrtasida oʻtkazilgan “Frantsuz tili bilimdoni” tanlovi hamda ingliz tili fani oʻqituvchisi Jahongir Sultonov tomonidan oʻtkazilgan seminar-trening fan oyligining muvaffaqiyatli oʻtkazilishini taʼminladi.

Tadbirda fan oyligida faol qatnashgan oʻquvchilar faxriy yorliqlar bilan taqdirlanishdi.

Muyassar XALILLAYeVA.