ҚУРИЛИШДА ХАВФСИЗЛИК ҚОИДАЛАРИГА АМАЛ ҚИЛИШ ЮЗАСИДАН ТАРҒИБОТ ТАДБИРЛАРИ ЎТКАЗИЛДИ
Инсоннинг тинч ва хотиржам, эмин-эркин яшаши учун энг муҳим ва қулай шароит унинг хонадонидир. Шу боис, ҳар бир киши ўз ҳаёти давомида ҳеч бўлмаганда бир марта иморат қуради. Албатта, қурилиш-таъмирлаш ишларини амалга оширишда биринчи галда техник хавфсизлик қоидаларига амал қилиш, қурилишда ишлаётганларининг хавфсизлигини таъминлаш муҳим аҳамиятга эга.
Манғит шаҳрининг Гулзор маҳалласи ҳудудида қад ростлаётган 3 та кўп қаватли турар жой биноси қурилишида фаолият юритаётган «Амударё махсус қурилиш» масъулияти чекланган жамияти қурувчиларининг техник хавфсизлик қоидаларига амал қилиши, электр ускуналаридан фойдаланиши ҳамда биноларда электр, газ пайвандлаш ишларини қай даражада амалга ошираётганлари ўрганилди. Ўрганишлар жараёнида юқори қаватларда таъмирлаш-пардозлаш ишларини олиб бораётган қурувчиларга баланд ҳавозаларга чиқиб ишлаганда ҳимоя камарларидан фойдаланиш, электр ускуналарини пайвандлаш жараёнида у хонадан бу хонага ички электр тармоқларини ўтказишда хавфсизлик қоидаларига амал қилиш бўйича тушунтиришлар ва тавсиялар берилди.
Шунингдек, Ойбек номли маҳалла ҳудудида «Қиз кетган махсус қурилиш» масъулияти чекланган жамияти томонидан барпо этилаётган 150 ўринли мактабгача таълим ташкилоти биноси қурувчиларининг амалий ишлари ҳам кўздан кечирилиб, Фавқулодда вазиятлар бошқармаси мутахассислари томонидан «Қурилиш ишларида хавфсизлик қоидаларига эътиборли бўлинг!» мавзусида тушунтириш-тарғибот ишлари олиб борилди. Унда қурувчиларнинг ҳар куни ишни бошлашдан аввал техник хавфсизлик бўйича йўриқномада белгиланган талаблар юзасидан синовдан ўтиши муҳим аҳамиятга эга эканлиги таъкидланди. Айниқса, ички электр пайвандлаш ишларини олиб бораётганда симларнинг очиқ қолиши кўнгилсиз оқибатларга олиб келиши, электр токидан зарарланиш аксарият ҳолларда инсон ўлимига сабаб бўлиши, ички газ тармоқларини асосий тармоқдан узиб, кейин пайвандлашни бажариш зарурлиги, акс ҳолда ёнғин келиб чиқиши ҳақида кенг тушунтиришлар берилиб, ҳар қандай ҳолатда хавф-хатарнинг олдини олиш бахтсиз ҳодисалар юз бермаслиги учун энг муҳим тадбир эканлиги амалда кўрсатиб берилди.
Туманимизда ҳар йили бир неча ҳудудларда кўп қаватли уйлар бунёд этилиб, халқимиз ҳаётига кўрк бағишламоқда. Бундай кўркам иморатларни бунёд этаётган қурилиш ташкилотлари ишчи-хизматчилари, шунингдек, ёлланма пудратчи-қурувчиларнинг хавфсизлигини таъминлаш, иш жараёнида техник хавфсизлик қоидаларига амал қилишларига алоҳида эътиборли бўлиш, уларга бу борада зарур йўл-йўриқлар ва тушунчалар бериш кўнгилсиз ҳолатларнинг олдини олишда муҳим аҳамият касб этади.
Б.Аллабергенов, туман ФВБ НТБ бошлиғи, катта лейтенант.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
