QURILIShDA XAVFSIZLIK QOIDALARIGA AMAL QILISh YuZASIDAN TARGʻIBOT TADBIRLARI OʻTKAZILDI

Insonning tinch va xotirjam, emin-erkin yashashi uchun eng muhim va qulay sharoit uning xonadonidir. Shu bois, har bir kishi oʻz hayoti davomida hech boʻlmaganda bir marta imorat quradi. Albatta, qurilish-taʼmirlash ishlarini amalga oshirishda birinchi galda texnik xavfsizlik qoidalariga amal qilish, qurilishda ishlayotganlarining xavfsizligini taʼminlash muhim ahamiyatga ega.

Mangʻit shahrining Gulzor mahallasi hududida qad rostlayotgan 3 ta koʻp qavatli turar joy binosi qurilishida faoliyat yuritayotgan «Amudaryo maxsus qurilish» masʼuliyati cheklangan jamiyati quruvchilarining texnik xavfsizlik qoidalariga amal qilishi, elektr uskunalaridan foydalanishi hamda binolarda elektr, gaz payvandlash ishlarini qay darajada amalga oshirayotganlari oʻrganildi. Oʻrganishlar jarayonida yuqori qavatlarda taʼmirlash-pardozlash ishlarini olib borayotgan quruvchilarga baland havozalarga chiqib ishlaganda himoya kamarlaridan foydalanish, elektr uskunalarini payvandlash jarayonida u xonadan bu xonaga ichki elektr tarmoqlarini oʻtkazishda xavfsizlik qoidalariga amal qilish boʻyicha tushuntirishlar va tavsiyalar berildi.

Shuningdek, Oybek nomli mahalla hududida «Qiz ketgan maxsus qurilish» masʼuliyati cheklangan jamiyati tomonidan barpo etilayotgan 150-oʻrinli maktabgacha taʼlim tashkiloti binosi quruvchilarining amaliy ishlari ham koʻzdan kechirilib, Favqulodda vaziyatlar boshqarmasi mutaxassislari tomonidan «Qurilish ishlarida xavfsizlik qoidalariga eʼtiborli boʻling!» mavzusida tushuntirish-targʻibot ishlari olib borildi. Unda quruvchilarning har kuni ishni boshlashdan avval texnik xavfsizlik boʻyicha yoʻriqnomada belgilangan talablar yuzasidan sinovdan oʻtishi muhim ahamiyatga ega ekanligi taʼkidlandi. Ayniqsa, ichki elektr payvandlash ishlarini olib borayotganda simlarning ochiq qolishi koʻngilsiz oqibatlarga olib kelishi, elektr tokidan zararlanish aksariyat hollarda inson oʻlimiga sabab boʻlishi, ichki gaz tarmoqlarini asosiy tarmoqdan uzib, keyin payvandlashni bajarish zarurligi, aks holda yongʻin kelib chiqishi haqida keng tushuntirishlar berilib, har qanday holatda xavf-xatarning oldini olish baxtsiz hodisalar yuz bermasligi uchun eng muhim tadbir ekanligi amalda koʻrsatib berildi.

Tumanimizda har yili bir necha hududlarda koʻp qavatli uylar bunyod etilib, xalqimiz hayotiga koʻrk bagʻishlamoqda. Bunday koʻrkam imoratlarni bunyod etayotgan qurilish tashkilotlari ishchi-xizmatchilari, shuningdek, yollanma pudratchi-quruvchilarning xavfsizligini taʼminlash, ish jarayonida  texnik xavfsizlik qoidalariga amal qilishlariga alohida eʼtiborli boʻlish, ularga bu borada zarur yoʻl-yoʻriqlar va tushunchalar berish koʻngilsiz holatlarning oldini olishda muhim ahamiyat kasb etadi.

B.Allabergenov, tuman FVB NTB boshligʻi, katta leytenant.