“ҲУҚУҚБУЗАРЛИКЛАРГА ҚАРШИ КУРАШИШ ВА ХИЗМАТ ФАОЛИЯТИНИ ТАКОМИЛЛАШТИРИШ ОЙЛИГИ” ДОИРАСИДА НАЗОРАТ ИШЛАРИ ОЛИБ БОРИЛМОҚДА

Республикамизда жамоат тартибини сақлаш, йўл ҳаракати хавфсизлигини таъминлаш ҳамда ҳуқуқбузарликлар профилактикаси соҳасида иш фаолияти самарадорлигини янада ошириш мақсадида 2020 йил 15 октябрдан 15 ноябргача “Ҳуқуқбузарликларга қарши  курашиш ва хизмат фаолиятини такомиллаштириш” ойлиги эълон қилинди. Ўзбекистон Республикаси Ички ишлар вазирининг 2020 йил 10 октябрь кунги 147-сонли фармойиши ва Қорақалпоғистон Республикаси Ички ишлар вазирининг 2020 йил 10 октябрь кунги 127-сонли фармойишларига асосан ташкил этилган мазкур ойлик доирасида туманимизда жиноятчиликка қарши курашиш, ҳуқуқбузарликларнинг олдини олиш бўйича бир қатор профилактик чоралар кўрилмоқда. Хусусан, туманимиздаги ов қуроллари билан боғлиқ жиноятларнинг олдини олиш, ов қуролига эга бўлган фуқаролар ўртасида профилактик суҳбатлар ўтказиш ҳамда уларга нисбатан тўпланган йиғма  жилдлари ва қурол сақлаш тартиблари алоҳида назоратга олиниб, текширилмоқда.

Бугунги кунда туман Ички ишлар бўлими ҳисобидаги 377 нафар фуқарода 441 та ов қуроллари мавжуд. Ўтказилган профилактик тадбирлар давомида туман Ички ишлар бўлими ходимлари томонидан бир кунда 44 нафар, тадбир бошланганидан эса 288 нафар ов қуроли эгалари ва мазкур қуролларнинг сақланиш ҳолатлари текширувдан ўтказилди.

Текширувлар жараёнида айрим ов қуроли эгалари томонидан қуролни сақлаш ва ундан фойдаланиш бўйича тартиб-қоидаларга амал қилмаслик ҳолатлари ҳам қайд этилди. Хусусан, ов қуролини  сақлаш ва олиб юриш, овда фойдаланиш муддатлари тугаган, рухсатнома муддатларини ўз вақтида узайтирмаган шахслар ҳам аниқланди. Тартибга кўра йилига  икки марта ўтказилиб келинаётган назорат тартибидаги текширувлар “Ҳуқуқбузарликларга қарши курашиш ва хизмат фаолиятини такомиллаштириш” ойлиги жараёнида қатъий рўйхат асосида олиб борилмоқда. Ойлик давомидаги текширувларда кунига бир, баъзан ундан ҳам кўпроқ, тадбир бошлангандан бери эса 27 нафар ов қуролига эга шахслар ов қуролидан фойдаланиш, сақлаш, олиб юриш, ов қилиш муддатларини ўз вақтида узайтирмаганлари маълум бўлди. Бу борадаги тартиб-қоидаларга амал қилмаган ов қуроли эгалари Ўзбекистон Республикаси Маъмурий жавобгарлик тўғрисидаги Кодекснинг 221-моддасига асосан маъмурий жавобгарликка тортилдилар.

Айни пайтда “Ҳуқуқбузарликларга қарши курашиш ва хизмат фаолиятини такомиллаштириш ойлиги” давом этмоқда. Мазкур ойлик жараёнида туман Ички ишлар бўлими ҳисобида турувчи ов қуролига эга бўлган 377 нафар фуқароларга тегишли 441 та ов қуроллари туман Ички ишлар бўлимининг жамоат тартибини сақлаш гуруҳи ходимлари томонидан текширувдан ўтказилди. Шунингдек, рухсатнома муддатлари тугаган ов қуроллари эгаларига нисбатан маъмурий чоралар кўрилди. Аҳоли ўртасида бу борадаги тушунтириш-тарғибот ишлари қатъий режа-жадвал асосида олиб борилмоқда.

Қадрли юртдошлар, агар сизнинг хонадонингизда ёки яқинларингизда туман Ички ишлар бўлими томонидан ҳисобга олинмаган, ов қуролини сақлаш ва олиб юриш, ов қилиш учун рухсатномага эга бўлмаган ов қуроли мавжуд бўлса, бу ҳақда, албатта, бўлимга маълум қилишингизни, “Ҳуқуқбузарликларга қарши курашиш ва хизмат фаолиятини такомиллаштириш” ойлигида фаол иштирок этишингизни илтимос қиламиз. Зеро, бу билан Сиз халқимизнинг тинчлиги ва осойишталигига ўз ҳиссангизни қўшган бўласиз.

Каримжон ТАДЖИБОЕВ, туман ИИБ Жамоат тартибини сақлаш гуруҳи инспектори, катта сержант.