ТУМАНИМИЗДАГИ МАКТАБЛАРДА PIRLS ХАЛҚАРО БАҲОЛАШ ДАСТУРИНИНГ ТАЖРИБА-СИНОВ ЖАРАЁНИ БЎЛИБ ЎТДИ
Мамлакатимизда таълим тизимини янада ривожлантириш борасида кенг қамровли ислоҳотлар амалга оширилмоқда. Республика халқ таълими тизимида таълим сифатини баҳолаш соҳасида халқаро тадқиқотларни ташкил этиш, ўқувчи-ёшларнинг илмий-тадқиқот ва инновация фаолиятини, ижодий ғоялари ва ижодкорлигини ҳар томонлама қўллаб-қувватлаш, рағбатлантириш бўйича қатор амалий ишлар қилинмоқда. Шу мақсадда қабул қилинган Ўзбекистон Республикаси Вазирлар Маҳкамасининг “Халқ таълими тизимида таълим сифатини баҳолаш соҳасидаги халқаро тадқиқотларни ташкил этиш чора-тадбирлари тўғрисида”ги қарори ижросини таъминлаш борасида ҳам самарали ишлар олиб борилмоқда. Ушбу қарор асосида белгиланган PIRLS – бошланғич синф ўқувчиларининг матнни ўқиш ва тушуниш даражасини баҳолаш бўйича халқаро тадқиқот дастурининг тажриба-синов жараёнлари бошлаб юборилди.
Тажриба-синов жараёнлари ўзбек тилида 21-22 октябрь кунлари туманимиздаги 31-,28-сонли умумтаълим мактабларида ўтказилди. Жараённи Таълим сифатини назорат қилиш давлат инспекцияси ҳузуридаги Таълим сифатини баҳолаш бўйича халқаро тадқиқотларни амалга ошириш миллий маркази бош мутахассислари Комил Мамаджанов ҳамда Aвазбек Шокировлар олиб бордилар.
Aйтиш керакки, 2021 йилда ўтказиладиган PIRLS халқаро баҳолаш дастурида 70 га яқин давлатлар қаторида мамлакатимиздаги мактабларнинг 4-синф ўқувчилари ҳам илк маротаба иштирок этади. Келаётган 2021 йил тадқиқотнинг бешинчи даврийлиги бўлиб, ҳар беш йилда ўтказиладиган PIRLS дастури 4-синф ўқувчиларининг ўқиб тушуниш кўникмасини халқаро даражада баҳолайди. Ўқувчиларнинг эришган ютуқларини баҳолаш барча ўқувчилардан эмас, балки ушбу қатлам вакиллари сифатида танлаб олинган ўқувчилардан обьектив тестларни ўтказиш орқали амалга оширилади. Шунингдек, мактаб директорлари, ўқитувчилар, ўқувчилар, ҳаттоки ота-оналардан сўровномалар ўтказилиб, таълим сифатига таъсир этувчи омилларга доир қимматли маълумотлар тўпланади.
PIRLS халқаро тадқиқотининг тажриба-синов жараёнини ташкил этишда туманимиздаги ҳар иккала мактабларда мактаб координаторлари тайинланган бўлиб, улар мактабнинг бошланғич синфлари ўқувчилари ва уларга таълим бераётган ўқитувчилар рўйхатини шакллантирдилар. Танлаб олинган синфлар, ўқувчилар, ўқитувчилар ва назорат шаклларини тўлдиришга кўмаклашдилар. Тест материалларини текшириб, улар айнан тест топшираётган синф ўқувчилари ва ўқитувчиларига тегишли эканини назорат қилиб олдилар ҳамда мактабда барча тест топшираётган ўқувчи ва ўқитувчилар учун етарлича нусхалар мавжудлигини аниқладилар.
Тажриба-синов жараёнини ўтказиш мақсадида ҳар бир танланган мактабдан битта синф танлаб олинди ва ундаги барча ўқувчилар жараёнда иштирок этдилар. Синфлар PIRLS дастури талабларига биноан тасодифий танлаб олинди. Синфларга тест ўтказиш шаклининг бланкаси тақдим этилди. Ҳар бир тест жараёнини ўтказиш учун мактаблардаги тинч, кенг ва ўқувчилар топшириқларни ҳеч қандай ноқулайликларсиз бажара олишга имкон берадиган хоналар танлаб олинди. Умумий жараён учун зарурий тайёргарлик, баҳолаш тестини ўтказиш ва ўқувчи сўровномасини тўлдириши учун 2 ярим - 3 соат вақт ажратилди.
PIRLS халқаро тадқиқот дастурининг тажриба-синов жараёнлари туманимизда самарали ташкил этилиб, муваффақиятли ўтказилди.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
