ТЕРИМ СУРЪАТИ ЮҚОРИ, ХИРМОНЛАР БАЛАНД

Бўз ёп овулида ўз ишининг кўзини биладиган фидойи деҳқонлар кўп. Ерларни баҳорги экишга тайёрлашдан тортиб, то ҳосилни йиғиштириб олгунга қадар даладан бери келмайдиган фидойилар меҳнати ҳақида қанча гапирсак ҳам камлик қилади. “Тўлқин Норбой” фермер хўжалиги раҳбари Озод Тўрабоев ана шундай фидойилардан.
Эрта баҳорда 78 гектар ерга “Султон” навли эрта пишар пахта навини экилган хўжалик далалари бугун чинакам меҳнат майдонига айланган. Бир текис пишиб-етилган кўсаклар оппоқ чаманзор тусини олган пахтазорларда деҳқонлар таъбири билан айтганда, “ғалвир сувдан кўтарилаётир”. Фермер хўжалигининг қайси даласига борманг, баланд ҳосил хирмонларини кўриб, кўзингиз қувонади. Албатта, далаларда мўл ҳосил етиштиришнинг  ўзи бўлгани йўқ. Хўжаликнинг 78 гектар пахта майдони чигит униб чиқиши билан 67 нафар пудратчига бўлиб берилди. Агротехник тадбирларнинг ўз вақтида ўтказилгани, айниқса, ёзнинг жазирама иссиқ кунларида ғўзани тунда суғориш ишлари ташкил этилгани, шарбат усулида суғориш, бегона ўтлардан тозалаш, чилпиш, зараркунандаларга қарши биологик ва кимёвий ишлов беришга алоҳида эътибор қаратилгани ўзининг самарасини берди. Далаларда мўл ҳосил тўпланди. 78 гектар пахта майдонида шартномавий режадаги 182 тонна юқори навли саноат хом ашёси териб олинди.
Йиғим-терим мавсуми тўғри ташкил этилгани боис, овулдаги вақтинчалик ишсиз, пандемия даврида жорий этилган карантин қоидалари туфайли ишга чиқиб кета олмаган овул ёшларидан иборат кўнгилли  ҳашарчилар ҳосилни йиғиб-териб олишда пудратчилар билан мусобақалашиб пахта теришди. Теримчиларга дала бошида тушлик қилишлари учун зарур шарт-шароитлар яратилиб, иш ҳақлари ҳар беш кунда ҳисоб-китоб қилиб борилди. Натижа эса кутилганидан зиёда бўлди. фермер хўжалигида шартномавий режа шараф билан бажарилди.
Пахта йиғим-терими билан бирга фермер хўжалигининг 17 гектар ерга экилган кузги буғдойзорида ҳам агротехник тадбирлар уюшқоқлик билан олиб борилмоқда. Серҳосил, “Антоним” навли буғдой уруғи экилган хўжалик ғаллазорларида кузги зараркунанда ҳашаротларга қарши кимёвий ишлов бериш, озиқлантирувчи суспензияларни пуркаш, далалар бошига маҳаллий ўғит ва номбор жамғариш каби ишларга ҳам алоҳида аҳамият берилмоқда. Хўжалик буғдойзорлари эса кундан-кунга ям-яшил тус олиб, баравж ривожланмоқда.
Фермер хўжалиги пахтазорларида эса ҳали ҳосил мўл. Терим суръати ҳам юқори. Ўз вақтида иш ҳақларини олиб, моддий манфаатдорлик кўраётган теримчилар кунига ҳар бири ўртача 80-90 килограммдан пахта теришга эришмоқдалар.
Овул ҳудудидаги “Маҳкам сари” фермер хўжалиги пахтакорлари ҳам дастлабки довондан ошдилар. 77 гектар майдонга “Султон” навли чигит экилиб, асосий майдонлар уруғлик пахта учун мўлжаллангани туфайли агротехник тадбирларни алоҳида эътибор билан ўтказишни тақозо этди. Фермер хўжалиги раҳбари Маҳкамжон Сапаримбетовнинг мавсум юмушларини тўғри ташкил этгани, иш юритишдаги узвийлик туфайли хўжалик далаларида юқори ҳосил етиштирилди. 42 нафар пудратчи ўзларига беркитилган далаларни бегона ўтлардан тозалаш, айниқса, уруғлик пахта экилган далаларда қўшимча озиқлантириш ишларини меъёрида олиб боришга эришганлари йиғим-терим мавсумининг муваффақиятли бошланишини таъминлади.
Натижада фермер хўжалиги далаларидан 182 тонна пахта териб олиниб, шартномавий режа шараф билан уддаланди. Етиштирилган ҳосилнинг 100 тоннаси уруғлик чигит учун мўлжалланган бўлиб, ушбу ҳосил алоҳида эътибор билан, тоза терилиб, юқори навга топширилди, сифати ва толаси талаблар даражасида эканлиги боис, даромад ҳам юқори бўлиши кутилмоқда.
Хўжалик далаларида йиғим-теримда қатнашаётган пудратчилар ва кўнгилли ҳашарчиларга иш ҳақлари шу куннинг ўзида, тарози бошида ҳисоб-китоб қилиниб, ҳар бир килограмм пахта учун вақтида ҳақ пул тўланаётгани, терим суръатининг  янада юқори бўлишини таъминламоқда. Илғор теримчилардан Гулруҳ Сапарниёзова, Сайёра Юсуповалар кунига биринчи теримда 180-200, айни пайтда эса 100-120 килодан, мавсум бошидан эса хўжалик хирмонига ҳар бири 2,5-3 тоннадан зиёд пахта териб тўкдилар. Терилган пахта ҳосилини пахтани қабул қилиш масканига сифатли тарзда етказиб беришда механизатор Икром Ражабовнинг хизмати катта бўлмоқда.
Мазкур хўжалик далаларида ҳам ҳали ҳосил мўл. Фермер хўжалиги раҳбари Маҳкамжон Сапаримбетовнинг ҳисоб-китобига кўра, яна 30 тоннадан зиёд ҳосил йиғиб-териб олиш, зиммасидаги мажбуриятини ҳам ошириб бажариш имконияти мавжуд.
Шуни алоҳида эътироф этиш керакки, фермер хўжалигининг 17 гектар майдондаги буғдойзорида ҳам текис ниҳол олиниб, ғалла экилган майдонлар ям-яшил тус олган. Кузги мавсумий ишлар эса маромида олиб борилмоқда. Хўжаликнинг 2 гектар еридаги янги узумзор боғдаги токлар ҳам баравж ривожланиб, келгуси йилдан ҳосилга кириши кутилмоқда. Шунингдек, 50 қути асалари уяларида ҳам кузги асал йиғиш, қишга тайёргарлик тадбирлари олиб борилмоқда.
Айни пайтда фермер хўжалиги далаларида етиштирилган пахта ҳосилини изғиринли, ёғин-сочинли кунларга қолдирмасдан йиғиб-териб олиш ишлари қизғин давом эттирилмоқда.

Робия ЙЎЛДОШЕВА.