ЭЛ-ЮРТ ҲУРМАТИГА САЗОВОР УСТОЗ
Инсонни келажакка умид, ишонч туйғуси ва эзгу орзулар улғайтиради, дейишади донолар. Ҳақиқатан ҳам эртанги кунни, ёруғ тонгларни кутиб, орзу-умидлар сари интилиб яшаш инсонга куч бағишлайди, яхши ниятларга йўлдош бўлиб яшашга ўргатади. Ўқувчилик давриданоқ ана шундай яхши ниятлар, орзу-умидлар ва келажакка ишонч туйғулари оғушида яшаб, ўқитувчилик касбига ҳавас қилган ва шу касбни эгаллаб, умрини ёш авлодга билим беришга бағишлаган Гуласал Матёқубова деярли 38 йил давомида таълим соҳасида фаолият кўрсатди. Яқинда уни ўзи 13 йилдан буён директорлик қилиб келаётган 10-сонли мактаб жамоаси катта ҳурмат ва эҳтиром билан пенсияга кузатишди. Йиллар давомида бир таълим даргоҳида, бир мақсад йўлида ёнма-ён меҳнат қилган ҳамкасблари, шогирдлари устозга самимий дил сўзларини изҳор этдилар.
Гуласал Матёқубова Тошкентдаги Рус тили ва адабиёти институтини 1982 йилда тамомлаган. У дастлаб 30-сонли рус тилига ихтисослашган умумтаълим мактабига ёшлар етакчиси қилиб ишга юборилди. У беш йил давомида мазкур мактабда ёшлар етакчиси ва рус тили ўқитувчиси сифатида фаолият юритиб, 1987 йилда туман ёшлар ташкилотида етакчи мутахассис сифатида ўз фаолиятини давом эттирди.
Гуласал Матёқубова 1991 йилда 10-сонли мактабда рус тили ва адабиёти фани ўқитувчиси вазифасида ишлай бошлади. У ўқитувчилик фаолияти давомида қатъиятлилиги, атрофидагиларга, ўзига нисбатан талабчанлиги, дарс машғулотларини ўтказишдаги ўзига хос услуби, ишни қатъий интизом асосида ташкил этиш қобилияти билан мактаб ўқитувчилар жамоасининг ҳурматига сазовор бўлди ва уни 2007 йилда 10-сонли мактаб директори вазифасига тайинлашди.
Гуласал Матёқубова раҳбарлигида мазкур мактаб педагогика жамоаси таълим-тарбия соҳасини замон талаблари даражасига кўтариш, мактаб таълимида инновацион ғоялардан фойдаланган ҳолда ҳар бир фан бўйича алоҳида таълимий режалар ишлаб чиқиш бўйича ҳамжиҳатликда иш олиб боришди. Фан тўгараклари самарадорлигига эришилди. Дарсдан ташқари машғулотларнинг узвийлиги таъминланди. Ўқувчиларнинг фанларни ўзлаштириш даражаси ошди. Натижада мактаб битирувчилари олий таълим муассасаларига ўқишга кириш бўйича юқори натижаларга эришилди. Мактабда ўзаро ҳамжиҳатлик, қатъий меҳнат интизомига эга педагогика жамоаси шаклланди. Эришилган бу ютуқлар Гуласал Матёқубовага ҳам, мактаб педагогика жамоасига ҳам обрў-эътибор келтирди. Халқ депутатлари туман Кенгашига бўлиб ўтган сайловларда кетма-кет икки марта Гуласал Матёқубова номзодини сайловчилар қўллаб-қувватлашди ва у 2011-2019 йилларда “Миллий тикланиш” Демократик партиясидан халқ депутатлари Амударё туман Кенгаши депутати сифатида туман ижтимоий-сиёсий ҳаётида фаол иштирок этди.
Ўз меҳнати, фидойилиги билан обрў-эътибор топган, халқ ишончини қозонган Гуласал Матёқубованинг ҳалол ва шарафли меҳнати давлатимиз томонидан муносиб баҳоланди. У Қорақалпоғистон Республикаси Халқ таълими аълочиси, “Мустақилликнинг 20 йиллиги” кўкрак нишони соҳибаси бўлди. Намунали оила бекаси сифатида умр йўлдоши, раҳматли, Қўшназар ака билан 3 нафар фарзандни эл-юрт корига камарбаста инсонлар қилиб вояга етказишди.
Эл-юрт ишончини қозонган, юзлаб шогирдларнинг фидойи устози Гуласал Матёқубовага она Ватанга, халққа содиқ фарзанд сифатида қилган хизматлари роҳат-фароғатини кўриб яшаш бахти насиб этсин, деб қоламиз.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
