ШОГИРДЛАРИДАН МИННАТДОР УСТОЗ
Инсоннинг ҳаётда ўз ўрнини топиши, турмушдаги машаққатларни сабр-бардош билан енгиб ўтишида унга энг тўғри йўлни кўрсатувчи зот – ота-онадан кейин ўқитувчи-устоздир. Ҳали ҳаёт ташвишларидан мутлақо бехабар, идрокидаги беғубор олам қувончлари билан яшаётган болажонлар онгида дунёвий тасаввурлар уйғотиб, мўъжизалар сари етаклагувчи ўқитувчи ва мураббийлар сиймоси шунинг учун ҳам ҳар бир инсон учун азиз, мукаррам.
Куюк кўпирлик Аминбой Раҳимов ўқитувчилик касбига меҳр қўйганида эндигина оқ-қорани таний бошлаган беғубор бола эди. 5-сонли мактаблараро ўқув-ишлаб чиқариш комбинати директори вазифасида ишловчи отаси Озодбой ака Раҳимовнинг илм ҳақидаги суҳбатлари, устозларининг меҳр билан дарс ўтишларига юрагида ҳавас уйғонган Аминбой умумтаълим мактабида аъло баҳоларга ўқиди. Айниқса, физика-математика фанлари унинг жон-у дили эди. Мактабни тугатиб, 1983 йилда Низомий номидаги Тошкент давлат Педагогика институтига умумтехника фанлари ва меҳнат таълими йўналиши бўйича ўқишга кирди. Талабалик даврида ҳарбий хизмат бурчини адо этиб, 1990 йилда институтни муваффақиятли тугатди.
Илк меҳнат фаолиятини отасига шогирд сифатида, 5-сонли мактаблараро ўқув-ишлаб чиқариш комбинати ўқитувчиси бўлиб ишлашдан бошлаган А.Раҳимов, мана 30 йилдирки, 19-сонли умумтаълим мактабида ўқувчиларга таълим-тарбия беришдек шарафли вазифани адо этиб келмоқда. У 12 йил давомида мактабда ўқувчиларга физика фанидан сабоқ берди, бир вақтнинг ўзида мактаб директорининг маънавий-маърифий ишлар бўйича ўринбосари вазифасида ҳам фаолият юритди. А.Раҳимов таҳсилини олган собиқ ўқувчилари орасида турли соҳа фидойилари, таниқли иқтисодчилар, бугунги кунда устоз-мураббийлар даражасига эришган ўқитувчилар, шифокорлар бор. Айни пайтда АҚШда, Халқаро Валюта жамғармасида иқтисодчи бўлиб ишлаётган Ботир Болтабоев эришаётган ютуқлар ҳақида А.Раҳимов доим фахрланиб сўзлайди.
Устоз фахри, шогирдидан миннатдорлик туйғуси – унинг ўз касбий фаолиятининг энг юқори чўққисидир. А.Раҳимов учун шундан улуғроқ мансаб ва мартаба йўқ. Оилада эса бири-биридан ақлли, тарбияли фарзандларнинг отаси, намунали хонадоннинг ибратли аъзоси. Ҳаётда ҳамиша энг яқин дўст ва маслаҳатгўй отаси Озодбой оға катта хонадонга, невара-чевараларига бош-қош.
Аминбойнинг ўғли Элбек Тошкент Давлат Ахборот технологиялари Университетини муваффақиятли тугатди, қизи Мафтунахон эса НДПИ 2-босқич талабаси. Умр йўлдоши Ферузахон Казиева меҳр-муҳаббатли уй бекаси, фидойи умр йўлдош.
Айни кунларда Қорақалпоғистон халқ таълими аълочиси А.Раҳимов ва 19-сонли умумтаълим мактаби жамоасининг қувончлари чексиз. Бу йилги битирувчи ёшларнинг кўпчилиги ОТМлар талабаси бўлишди. Гарчи мактабда дарслар онлайн тарзда олиб борилаётган бўлса-да, ўқувчилар жуда фаол.
Биз жонкуяр ва фидойи устоз Аминбой Раҳимовни ўқитувчи ва мураббийлар куни билан самимий табриклаймиз. Ёш авлод келажаги йўлидаги ишларида ютуқлар тилаймиз.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
