ЎЗБЕКИСТОН ЧЕМПИОНИ ЭЛЁР МАШАРИПОВ УСТОЗЛАРИНИ БАЙРАМ БИЛАН ТАБРИКЛАДИ

Устоз меҳнати қадрини, машаққатини ўлчайдиган мезон йўқ. Улар ёш авлод камоли йўлида оталар, оналар каби фидойилик қилувчи, қалб қўрини, куч-қувватини уларнинг камоли йўлида сарфлагувчи инсонлардир. Шу боисдан ҳам устоз-мураббийлар бир умр шогирдлари эҳтиромида, эъзозида яшайдилар.

Шу йилнинг 28 октябрида туман Болалар-ўсмирлар спорт мактаби директори, жаҳон, Европа, Осиё миқёсидаги ғолиб ва совриндор полвонларни тарбиялаб вояга етказган мураббий, таниқли полвон Чоршам Тожимуродов 60 ёшга тўлди. Бу сана пандемия муносабати билан нишонланмаган бўлса-да, йўқлагувчилар, қўнғироқ қилувчилар кўп бўлди.

Шу куни ушбу спорт мактаб тарбияланувчиси, спортнинг дзю-до, самбо, кураш турлари бўйича бир неча бор Ўзбекистон чемпиони, Осиё, Европа очиқ турнири ғолиби, “Мард ўғлон” давлат мукофоти соҳиби,  манғитлик Элёр полвон Машарипов ҳам қувончли кунида мураббийини йўқлаб келди. Имтиёзли равишда Қорақалпоқ давлат университетига қабул қилинган, уни муваффақиятли тугатиб чиққан Элёр, бир неча йилдирки, Ўзбекистон Миллий гвардиясининг  Қорақалпоғистон бошқармасига қарашли ҳарбий қисмда хизмат қилмоқда. Ушбу қисм командири 1 октябрь – Ўқитувчилар ва мураббийлар куни байрами муносабати билан Чоршам Тожимуродовни қутлаб ташаккурномаси йўллади. Уни Элёр Машарипов устозига тантанали тарзда топширди. Мураббийлар шу мактабда кураш сирларини ўрганган Элёр полвоннинг бутун жамоани байрам билан қутлаганидан, спорт мактабидан ана шундай юртнинг донғини жаҳон аро тартаётган полвон етишиб чиққанидан фахрландилар.

Шундан сўнг Элёр Машарипов спорт мактабда дзю-до кураши билан шуғулланаётган болалар, мураббийлар билан ҳам учрашди. Учрашув давомидаги суҳбат чоғида ўзи ҳам ушбу залда илк машғулотларда кураш маҳоратини ўргангани, мураббийлари кўмагида ютуқларга эришгани ҳақида гапириб берди.

Таниқли полвон шу куни ўзи илк таълим олган 36-сонли мактабга ҳам бориб, биринчи ўқитувчиси Муборак Жумашевани ҳам байрам билан муборакбод этди.

Элёр Машарипов биринчи устозига ўзи хизмат қилаётган қисм командирининг шундай полвон, юртига садоқатли, хизмат вазифасини сидқидилдан адо этаётган ўғлонни тарбиялаб вояга етказгани учун миннатдорчилик изҳор этилган ташаккурномасини топширди. Муборак Жумашева шу мактабда илк бор ҳарф танитган собиқ ўқувчиси, айни пайтдаги таниқли спортчи Элёр Машариповни ўқувчиларига таништирди. Барчасини Элёрдай юрт корига ярайдиган инсонлар бўлиб етишишга чақирди.

Элёр Машарипов ўқувчиларга 1999 йилда шу мактабнинг биринчи синфига ўқишга келганини, шу устоздан ўқишни, ёзишни ўрганганини ҳаяжон билан сўзлади. Ўзининг шўхликларини, синфдошларининг ота-оналари шикоят қилиб келишганида устоз доим ёнини олганини, буни асло унутмаганини ҳам гапирди. Хизмат вазифасида жиддий топшириқлар олганида кўз ўнгида ота-онаси ва албатта, билим бериб, меҳр ҳам кўрсатган  устози жонланишини, уларга муносиб бўлишга ҳаракат қилишни, доим эҳтиром билан яшашини фахр билан айтиб ўтди. Шунингдек, ўқувчиларни ҳам  юртимизга муносиб бўлиб улғайишларини тилаб, яхши ўқишга даъват этди.

Шундан сўнг, суҳбат ўқитувчилар хонасида устозлар қуршовида яна давом этди. Байрам билан қутлаб келган спортчи шогирдига устозлар ҳам улкан миннатдорчилик билдирди, ишларида муваффақиятлар тилади.

Ойгул РАЖАБОВА.