OʻZBEKISTON ChEMPIONI ELYoR MAShARIPOV USTOZLARINI BAYRAM BILAN TABRIKLADI

Ustoz mehnati qadrini, mashaqqatini oʻlchaydigan mezon yoʻq. Ular yosh avlod kamoli yoʻlida otalar, onalar kabi fidoyilik qiluvchi, qalb qoʻrini, kuch-quvvatini ularning kamoli yoʻlida sarflaguvchi insonlardir. Shu boisdan ham ustoz-murabbiylar bir umr shogirdlari ehtiromida, eʼzozida yashaydilar.

Shu yilning 28-oktyabrida tuman Bolalar-oʻsmirlar sport maktabi direktori, jahon, Yevropa, Osiyo miqyosidagi gʻolib va sovrindor polvonlarni tarbiyalab voyaga yetkazgan murabbiy, taniqli polvon Chorsham Tojimurodov 60 yoshga toʻldi. Bu sana pandemiya munosabati bilan nishonlanmagan boʻlsa-da, yoʻqlaguvchilar, qoʻngʻiroq qiluvchilar koʻp boʻldi.

Shu kuni ushbu sport maktab tarbiyalanuvchisi, sportning dzyu-do, sambo, kurash turlari boʻyicha bir necha bor Oʻzbekiston chempioni, Osiyo, Yevropa ochiq turniri gʻolibi, “Mard oʻgʻlon” davlat mukofoti sohibi,  mangʻitlik Elyor polvon Masharipov ham quvonchli kunida murabbiyini yoʻqlab keldi. Imtiyozli ravishda Qoraqalpoq davlat universitetiga qabul qilingan, uni muvaffaqiyatli tugatib chiqqan Elyor, bir necha yildirki, Oʻzbekiston Milliy gvardiyasining  Qoraqalpogʻiston boshqarmasiga qarashli harbiy qismda xizmat qilmoqda. Ushbu qism komandiri 1-oktyabr – Oʻqituvchilar va murabbiylar kuni bayrami munosabati bilan Chorsham Tojimurodovni qutlab tashakkurnomasi yoʻlladi. Uni Elyor Masharipov ustoziga tantanali tarzda topshirdi. Murabbiylar shu maktabda kurash sirlarini oʻrgangan Elyor polvonning butun jamoani bayram bilan qutlaganidan, sport maktabidan ana shunday yurtning dongʻini jahon aro tartayotgan polvon yetishib chiqqanidan faxrlandilar.

Shundan soʻng Elyor Masharipov sport maktabda dzyu-do kurashi bilan shugʻullanayotgan bolalar, murabbiylar bilan ham uchrashdi. Uchrashuv davomidagi suhbat chogʻida oʻzi ham ushbu zalda ilk mashgʻulotlarda kurash mahoratini oʻrgangani, murabbiylari koʻmagida yutuqlarga erishgani haqida gapirib berdi.

Taniqli polvon shu kuni oʻzi ilk taʼlim olgan 36-sonli maktabga ham borib, birinchi oʻqituvchisi Muborak Jumashevani ham bayram bilan muborakbod etdi.

Elyor Masharipov birinchi ustoziga oʻzi xizmat qilayotgan qism komandirining shunday polvon, yurtiga sadoqatli, xizmat vazifasini sidqidildan ado etayotgan oʻgʻlonni tarbiyalab voyaga yetkazgani uchun minnatdorchilik izhor etilgan tashakkurnomasini topshirdi. Muborak Jumasheva shu maktabda ilk bor harf tanitgan sobiq oʻquvchisi, ayni paytdagi taniqli sportchi Elyor Masharipovni oʻquvchilariga tanishtirdi. Barchasini Elyorday yurt koriga yaraydigan insonlar boʻlib yetishishga chaqirdi.

Elyor Masharipov oʻquvchilarga 1999-yilda shu maktabning birinchi sinfiga oʻqishga kelganini, shu ustozdan oʻqishni, yozishni oʻrganganini hayajon bilan soʻzladi. Oʻzining shoʻxliklarini, sinfdoshlarining ota-onalari shikoyat qilib kelishganida ustoz doim yonini olganini, buni aslo unutmaganini ham gapirdi. Xizmat vazifasida jiddiy topshiriqlar olganida koʻz oʻngida ota-onasi va albatta, bilim berib, mehr ham koʻrsatgan  ustozi jonlanishini, ularga munosib boʻlishga harakat qilishni, doim ehtirom bilan yashashini faxr bilan aytib oʻtdi. Shuningdek, oʻquvchilarni ham  yurtimizga munosib boʻlib ulgʻayishlarini tilab, yaxshi oʻqishga daʼvat etdi.

Shundan soʻng, suhbat oʻqituvchilar xonasida ustozlar qurshovida yana davom etdi. Bayram bilan qutlab kelgan sportchi shogirdiga ustozlar ham ulkan minnatdorchilik bildirdi, ishlarida muvaffaqiyatlar tiladi.

Oygul RAJABOVA.