АМУДАРЁ ТУМАНИДА ҲАМ “АҚЛЛИ” ЭЛЕКТР ҲИСОБЛАГИЧЛАР ЎРНАТИЛМОҚДА

Тежамкорлик – барча соҳалар тараққиётини таъминлашда муҳим аҳамият касб этади. Айниқса, электр энергияси таъминотида тежамкорликка эришиш мамлакат ишлаб чиқаришининг барча йўналишларида барқарор ривожланишни таъминлайди. Шу боис, мамлакатимизда энергия-тежамкор ресурслардан унумли фойдаланиш билан бирга, соҳага инновацион технологияларни кенг жорий этиш, сарфланган электр энергиясининг аниқ ҳисоб-китобини юритиш, истеъмолчиларни электр энергияси билан таъминлашда электр энергиясини ҳисобга олиш ва назорат қилишнинг автоматлаштирилган тизимини кенг жорий этиш орқали уларга замонавий шарт-шароитлар яратиш борасида тизимли ишлар олиб борилмоқда.

Маълумки, Президентимизнинг 2018 йил 23 октябрда “Электр энергияси тармоғини жадал ривожлантириш ва молиявий барқарорлигини таъминлаш чора-тадбирлари тўғрисида”ги Қарори қабул қилинган эди. Унга асосан “Ҳудудий электр тармоқлари” акционерлик жамияти томонидан 2020 йил якунигача мамлакатимизда 7 млн.дан ортиқ истеъмолчиларнинг барчаси электр энергиясини ҳисобга олиш ва назорат қилишнинг автоматлаштирилган тизимига уланиши белгилаб берилиб, бу борада тизимли ишлар амалга оширила бошланди.

Мазкур тизимнинг афзалликлари шундаки, тизимга уланган истеъмолчилар электр таъминоти корхонаси ёки банклар эшигида навбатга туришмайди, ҳисоблагич ўрнатилгач, тизимга уланади ва код киритилиб, ҳисоб рақам очилади. Истеъмолчиларга барча маълумотлар СМС хабар орқали автоматик тарзда етказиб турилади, ҳисоблагичдаги маълумотларни компьютер қатъий назорат қилади.

Айни кунларда Қорақалпоғистон Республикасининг энг йирик туманларидан бири ҳисобланган Амударё туманида ҳам аҳоли хонадонларига ва юридик субъектларига замонавий ҳисоблагичлар ўрнатиш ва электр энергиясини ҳисобга олиш ва назорат қилишнинг автоматлаштирилган тизимига улаш ишлари олиб борилмоқда. Туман электр таъминоти корхонаси томонидан энергия ресурсларини ҳисобга олиш ва назорат қилиш ускуналари ўрнатиш бўйича ишлар бошланишидан олдин жойлардаги фуқароларнинг ўзини ўзи бошқариш органлари орқали маиший истеъмолчиларни бу борада хабардор қилиш ишлари амалга оширилмоқда. Бундан ташқари, жойларда туман электр таъминоти корхонаси мутахассислари томонидан янги ҳисоблагичнинг афзалликлари, ундан фойдаланиш йўл-йўриқлари ҳақида аҳолига кенг тушунчалар берилаётгани боис, истеъмолчилар билан таъминотчи корхона ўртасида ҳеч қандай тушунмовчилик ва муаммо бўлмаяпти.

Шуни алоҳида таъкидлаш жоизки, 2020 йил охиригача тумандаги 38 минг истеъмолчи электр энергиясини ҳисобга олиш ва назорат қилишнинг автоматлаштирилган тизимига уланиши кўзда тутилган. Йил охиригача тумандаги 35 минг 600 та аҳоли хонадонларига 100 фоиз, юридик субъектларга эса 2400 та янги электр ҳисоблагичлар ўрнатилади. Бунинг учун 38 мингта янги ҳисоблагич ускуналари келтирилиб, айни  пайтда ушбу ҳисоблагичларни аҳоли хонадонларига ўрнатиш ишлари бошлаб юборилди.

Амударё туманида айни пайтда ҳисоблагичлар махсус мутахассис ходимлар томонидан Ойбек, Навоий, Беруний номли, Олмазор, Бўстон, Чордара маҳаллаларидаги хонадонларга ўрнатилиб, бошқа маҳаллаларда, овулларда ҳам давом эттирилмоқда. Шу қаторда аҳолига янги ҳисоблагичларнинг ишлаш тизими тўғрисида кенг тушунчалар ҳам бериб борилмоқда. Янги электр ҳисоблагичлар истеъмолчиларга “Ҳудудий электр тармоқлари” акциядорлик жамияти маблағлари ҳисобидан бепул ўрнатилмоқда.

Шу ўринда юртдошларимиздан мутахассисларнинг электр энергиясини ҳисоблаш қурилмаларини ўрнатишларига имкон яратиш мақсадида ўз маҳалласига ёки кўчасига электр таъминоти корхонаси вакиллари ташриф буюрганида уйида бўлишларини сўраймиз. Шуни ҳам унутмаслик керакки, янги ҳисоблаш қурилмасини тизимга бепул улатишга қаршилик кўрсатган ёки бунга бепарво қараган имтеъмолчилар тармоқдан ажратилади ва кейинчалик электр ҳисоблагичларни ўз ҳисобидан ўрнатишларига тўғри келади.

Робия ЙЎЛДОШЕВА.